ຫົວພັນ ສະຫຼອງວັນຄູແຫ່ງຊາດຄົບຮອບ 25 ປີ

 ພິທີໂຮມຊຸມນຸມຫວນຄືນມູນເຊື້ອປະຫວັດຄວາມເປັນມາຂອງຄູລາວ ແລະສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 25 ປີ ໄດ້ຈັດຂຶ້ນຢູ່ເດີ່ນກີລາແຂວງຫົວ ພັນ ໃນວັນທີ 4 ຕຸລາ 2019 ໂດຍ ການເປັນປະທານຂອງທ່ານ ມົນທອງ ລຽນຕິຄຸນ ຫົວໜ້າພະແນກ ສຶກສາທິການ ແລະກີລາແຂວງ ຫົວພັນ (ສກຂ), ໃຫ້ກຽດເຂົ້າ ຮ່ວມຂອງທ່ານ ພູໂຊນ ທຳມະວີ ໄຊ ຮອງເຈົ້າແຂວງຫົວພັນ, ຜູ້ຊີ້ນຳຂົງເຂດວັດທະນະທຳ-ສັງຄົມ ຂັ້ນແຂວງ,ມີບັນດາພະແນກການ, ກົມກອງອ້ອມຂ້າງແຂວງ, ເມືອງ ຊຳເໜືອ, ຫ້ອງການສຶກສາທິການ ແລະກີລາ 10 ເມືອງ, ພະນັກງານ, ຄູ-ອາຈານ, ນັກສຶກສາ ແລະນ້ອງຫຼານນັກຮຽນຈາກບັນດາໂຮງ ຮຽນອ້ອມຂ້າງເທສະບານແຂວງ ເຂົ້າຮ່ວມຢ່າງຄຶກຄື້ນ.

ທ່ານ ມົນທອງ ລຽນຕິຄຸນ ໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນຂອງອາຊີບຄູ ແລະເລົ່າຄືນມູນເຊື້ອຄວາມເປັນມາຂອງຄູລາວ ໂດຍສະເພາະແມ່ນປະຫວັດຂອງນາຍຄູຄຳ ຄູລາວຜູ້ທຳອິດທີ່ມີຈິດ ໃຈຮັກຊາດຮັກບ້ານເກີດເມືອງນອນທັງເປັນຜູ້ໂຄສະນາ,ປຸກລະດົມຄະນະສົງ ແລະປະຊາຊົນລາວຕໍ່ສູ້ກັບລັດທິລ່າເມືອງຂຶ້ນຝຣັ່ງໃນປີ 1920 ແຕ່ກໍ່ປະລາໄຊ,ພາຍຫຼັງປະຊາຊົນ ລາວໄດ້ລຸກຮືຂຶ້ນຍຶດອຳນາດຈາກ ຝຣັ່ງວັນທີ 12 ຕຸລາ 1945 ເປັນຕົ້ນມາ,ການສຶກສາມີລັກສະນະຊາດ ຈຶ່ງຄ່ອຍໆປະກົດຕົວເປັນຮູບ ຮ່າງຂຶ້ນມາ ແລະພາຍຫຼັງຈາກສະຖາປະນາເປັນ ສປປ ລາວ ໃນວັນ ທີ 2 ທັນວາ 1975 ການສຶກສາຍິ່ງໄດ້ຮັບການພັດທະນາຢ່າງບໍ່ຢຸດ ຢັ້ງ, ຈາກເຫດການປະຫວັດສາດດັ່ງກ່າວໄດ້ກາຍເປັນເງື່ອນໄຂເອື້ອ ອຳນວຍໃຫ້ແກ່ການສຶກສາຢູ່ລາວໄດ້ຮັບການພັດທະນາ, ໂຮງຮຽນໄດ້ຂະຫຍາຍຕົວຈາກຕົວເມືອງໄປຫາຊົນນະບົດເຫັນໄດ້ໃນປີ1905 ທົ່ວປະເທດລາວມີໂຮງຮຽນແຕ່ 2 ແຫ່ງ, ມີຄົນລາວພຽງ 1 ຄົນໄດ້ເຂົ້າຮຽນ, ມາເຖິງປີ 1907 ປະເທດລາວມີຄູພຽງ 1 ຄົນ, ມີພະສົງ (ນັກຮຽນ) ໄດ້ເຂົ້າຮຽນພຽງ 50 ອົງ, ມາເຖິງປະຈຸບັນ (ປີ 2019) ທົ່ວປະເທດລາວມີໂຮງຮຽນ 14.079 ແຫ່ງ, ມີຄູ 76.572 ຄົນ, ຍິງ 40.952 ຄົນ, ມີນັກຮຽນທັງໝົດ 1.670.917 ຄົນ.

ສຳລັບຢູ່ແຂວງຫົວພັນມີໂຮງ ຮຽນທັງໝົດ 1.242 ແຫ່ງ, ມີໂຮງ ຮຽນລ້ຽງເດັກ-ອະນຸບານ 372  ແຫ່ງ, ໂຮງຮຽນປະຖົມ 724  ແຫ່ງ, ໂຮງຮຽນມັດທະຍົມຕອນຕົ້ນ 91 ແຫ່ງ, ໂຮງຮຽນມັດທະຍົມຕອນປາຍ 1 ແຫ່ງ, ໂຮງຮຽນມັດທະຍົມສົມບູນ 52 ແຫ່ງ, ມີພະນັກງານບໍລິຫານ  413  ຄົນ, ມີຄູ  4.540 ຄົນ, ຍິງ 2.058 ຄົນ,ມີນັກຮຽນ ທັງໝົດ 91.583 ຄົນ, ນອກນັ້ນ, ສາມາດປະກາດຈົບຊັ້ນປະຖົມ ແລະມັດທະຍົມບຳລຸງໄດ້ 10 ເມືອງທົ່ວ ແຂວງ,ອັດຕາເຂົ້າຮຽນຂອງເດັກອາຍຸ 3-5 ປີ ໄດ້ 69,41%, ເດັກ 5 ປີໄດ້ 80,62%, ອັດຕາເຂົ້າຮຽນສຸດທິຊັ້ນປະຖົມໄດ້ 98,83% ມັດທະຍົມຕອນຕົ້ນ 96,07%, ຊັ້ນ ມັດທະຍົມຕອນປາຍ 60,10%.

ພ້ອມດຽວກັນນີ້ຫົວໜ້າພະແນກສຶກສາແຂວງຫົວພັນ ຍັງໄດ້ຮຽກຮ້ອງໃຫ້ຜູ້ບໍລິຫານການສຶກສາ ແລະກີລາ, ຄູ-ອາຈານ,ນັກຮຽນ ແລະທຸກພາກສ່ວນຈົ່ງພ້ອມກັນເອົາ ໃຈໃສ່ຈັດຕັ້ງປະຕິບັດໜ້າທີ່ວຽກ ງານຂອງຕົນດ້ວຍຄວາມຮັບຜິດ ຊອບສູງ ແລະພ້ອມກັນສູ້ຊົນຕາມ 5 ຄາດໝາຍທີ່ກະຊວງສຶກສາທິການ ແລະກີລາວາງໄວ້ຄື:ຂະຫຍາຍໂອ ກາດເຂົ້າຮຽນແຕ່ຕົວເມືອງຫາຊົນນະບົດເພື່ອເຮັດໃຫ້ເດັກທີ່ມີເກນ ອາຍຸໄດ້ເຂົ້າເຖິງການສຶກສາ; ຄູ ທຸກຄົນຕ້ອງປະຕິບັດໜ້າທີ່ ແລະ ຈັນຍາບັນຂອງຄູໃຫ້ໄປຕາມ 3 ລັກສະນະ,5 ຫຼັກມູນ ແລະ3 ຂໍ້ແຂ່ງ ຂັນຂອງຂະແໜງການສຶກສາເພື່ອເຮັດໃຫ້ຄຸນນະພາບຂອງການສຶກສາ ແລະກີລາດີຂຶ້ນ; ຍົກສູງຄຸນນະພາບຂອງການສຶກສາແຕ່ລະຂັ້ນ ແລະແຕ່ລະຊັ້ນໃຫ້ເທົ່າທຽມກັບລະດັບພາກພື້ນ ແລະສາກົນ;ສົ່ງເສີມການເຂົ້າຮຽນສາຍອະຊີວະສຶກສາ-ຝຶກອົບຮົມວິຊາຊີບໃນລະດັບຕ່າງໆ  ແລະສົ່ງເສີມມົນຊົນທຸກເພດ, ທຸກໄວຫັນມາຫຼິ້ນກີລາເພື່ອສຸຂະພາບ-ຫ່າງໄກຈາກສິ່ງເສບຕິດ.

ໂອກາດດຽວກັນນີ້, ທ່ານ ພູໂຊນ ທຳມະວີໄຊ ຕາງໜ້າການ ນໍາແຂວງຫົວພັນ ໄດ້ຕີລາຄາສູງ ຕໍ່ຄວາມບຸກບືນ,ພະຍາຍາມຂອງ ຜູ້ບໍລິຫານການສຶກສາ, ຄູ-ອາຈານ ແລະທຸກພາກສ່ວນໃນສັງຄົມທີ່ສຸມ ທຸກສະຕິປັນຍາ, ເຫື່ອແຮງຂອງ ຕົນປະກອບສ່ວນເຂົ້າໃນວຽກງານ ການສຶກສາກໍ່ຄືການສ້າງສາພັດທະນາແຂວງຫົວພັນ ພ້ອມນີ້,ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານທີ່ຍາດມາໄດ້ ແລະ ຮຽກຮ້ອງໃຫ້ສືບຕໍ່ຈັດຕັ້ງປະຕິບັດ ໜ້າທີ່ວຽກງານຂອງຕົນດ້ວຍຈິດໃຈບຸກທະລຸ ແລະມີຜົນສຳເລັດທີ່ເປັນຮູບປະທຳ, ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ສູງຂຶ້ນ,ປະຕິບັດໜ້າທີ່ຢ່າງເຂັ້ມງວດ ແລະເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ຕ້ານ ແລະສະກັດກັ້ນປະກົດການຫຍໍ້ທໍ້ ຕ່າງໆ ແລະພ້ອມກັນຜ່ານຜ່າຄວາມ ຫຍຸ້ງຍາກເພື່ອຜົນສຳເລັດໜ້າທີ່ີ່ໄດ້ ຮັບການມອບໝາຍ.

ໂອກາດສະເຫຼີມສະຫຼອງວັນຄູ ແຫ່ງຊາດຄົບຮອບ 25 ປີໃນຄັ້ງນີຍັງໄດ້ຈັດພິທີມອບໃບຍ້ອງຍໍຂອງ ທ່ານເຈົ້າແຂວງຫົວພັນ ໃຫ້ແກ່ກົມກອງລວມໝູ່ຈຳນວນ 19 ກົມກອງ ທີ່ມີຜົນງານດີເດັ່ນໃນການປະກອບ ສ່ວນເຂົ້າໃນພາລະກິດປົກປັກຮັກ ສາ ແລະສ້າງສາພັດທະນາປະເທດຊາດ ແລະຍ້ອງບຸກຄົນ 63 ທ່ານ  ທີ່ມີຜົນງານດີເດັ່ນໃນການຈັດຕັ້ງປະຕິບັດໜ້າທີ່ວຽກງານພະນັກງານ-ລັດຖະກອນພະແນກສຶກສາທິການ ແລະກີລາແຂວງຫົວພັນປະຈຳປີ 2018 ຕື່ມອີກ.

-----------------------

 ໜັງສືພິມເສດຖະກິດ-ສັງຄົມ

แชร์