ຫັດຖະກຳຕໍ່າຫູກ ອາຊີບໜຶ່ງສາມາດສ້າງລາຍຮັບເຂົ້າຄອບຄົວເປັນກອບເປັນກຳ

  ຫາກເວົ້າເຖິງການຕໍ່າຫູກທໍໄໝບັນດາທ່ານຄົງຈະຄຸ້ນເຄີຍ ແລະເປັນທີ່ຮູ້ຈັກກັນດີວ່າ: ການຕໍ່າຫູກທໍໄໝແມ່ນກິດຈະກໍາໜຶ່ງທີ່ຕິດພັນກັບການດໍາລົງຊີວິດຂອງປະຊາ ຊົນລາວບັນດາເຜົ່າມາແຕ່ດຶກດຳບັນ ແລະໄດ້ຮັບການປົກປັກຮັກສາ, ສືບທອດກັນມາຫຼາຍເຊັ່ນຄົນຈົນກາຍເປັນມູນເຊື້ອທາງດ້ານວັດທະນະທຳເຖິງທຸກວັນນີ້.

  ການຕໍ່າຫູກທໍໄໝແມ່ນຫັດຖະກຳຕໍ່າແຜ່ນແພທີ່ເຕັມໄປດ້ວຍລວດລາຍ ແລະອຸດົມສົມບູນໄປດ້ວຍສິລະປະວັດທະນະທຳ, ສີໄມ້ລາຍມືອັນສວຍງາມ; ໃນເມື່ອກ່ອນການ ຕໍ່າຫູກທໍໄໝແມ່ນເພື່ອໃຊ້ເປັນເຄື່ອງນຸ່ງຫົ່ມພາຍໃນຄອບຄົວເທົ່ານັ້ນແຕ່ປະຈຸບັນຜ້າໄໝລາວໄດ້ກາຍເປັນສິນຄ້າທີ່ນິຍົມຂອງສັງຄົມນັບທັງພາຍໃນ ແລະຕ່າງປະເທດນອ ກຈາກນີ້ຍັງໄດ້ກາຍເປັນແຫຼ່ງລາຍຮັບອັນສໍາຄັນໃນການສ້າງເສດຖະກິດຄອບຄົວໃຫ້ຫຼຸດພົ້ນອອກຈາກຄວາມທຸກຍາກຄືດັ່ງຄອບຄົວຂອງ ທ່ານນາງ ບົວລອຍ ແພງແສງແກ້ວ ປະຊາຊົນບ້ານວຽງແກ້ວ, ເມືອງຫົງສາ, ແຂວງໄຊຍະບູລີ ຊຶ່ງເປັນຄອບຄົວໜຶ່ງທີ່ປະສົບຜົນສຳເລັດໃນການສ້າງເສດຖະກິດຄອບຄົວດ້ວຍການຕໍ່າຫູກທໍໄໝ, ຂາຍເປັນສິນຄ້າ.

 ທ່ານ ນາງ ບົວລອຍ ແພງແສງແກ້ວ ອາຍຸ 54 ປີ ເລົ່າຕໍ່ຜູ້ຂຽນຟັງວ່າ: ຊີວິດຂອງຄອບຄົວໃນເມື່ອກ່ອນແມ່ນພົບຄວາມຫຍຸ້ງຍາກຫຼາຍເນື່ອງຈາກອາໄສເຮັດນາເປັນອາ ຊີບຕົ້ນຕໍບວກກັບການຕໍ່າຫູກຂາຍເປັນສິນຄ້າພຽງເລັກນ້ອຍ,ຊີວິດການເປັນຢູ່ຂອງຄອບຄົວໃນຕອນນັ້ນຍັງຂາດຫຼາຍປັດໄຈ; ພາຍຫຼັງໃຊ້ຊີວິດແບບເດີມໆມາຫຼາຍປີເຫັນວ່າບໍ່ໄດ້ຮັບການພັດທະນາດີຂຶ້ນແຕ່ກົງກັນຂ້າມຄ່າຄອງຊີບ ແລະຄ່າໃຊ້ຈ່າຍພາຍໃນຄອບຄົວພັດນັບມື້ນັບເພີ່ມຂຶ້ນ,ດັ່ງນັ້ນຈຶ່ງໄດ້ປຶກສາຫາລືກັບຄອບຄົວ ແລະຕົກລົງເຫັນ ດີເປັນກະພາບເລືອກເອົາການຕໍ່າຫູກເປັນສິນຄ້າສ້າງລາຍຮັບເຂົ້າໃນຄອບຄົວເນື່ອງຈາກຕົນເອງມີຄວາມຮູ້ ແລະມີຄວາມຊໍານານງານດ້ານນີ້ມາກ່ອນ.

 ໃນເບື້ອງຕົ້ນລົງທຶນ 3 ລ້ານກີບ ເພື່ອຊື້ກີ່ຕໍ່າຫູກ 4 ກີ່, ຊື້ຟືມ, ຊື້ຝ້າຍ ແລະອຸປະກອນຕ່າງໆ ພ້ອມທັງຈ້າງຄົນຜູ້ທີ່ມີຄວາມຮູ້ກ່ຽວກັບການຕໍ່າຫູກທໍໄໝ 4 ຄົນມາຕໍ່າໃຫ້, ສໍາລັບຄ່າແຮງງານແມ່ນອີງຕາມລວດລາຍ ແລະແບບຂອງສິ້ນລາຄາຕໍ່າສຸດແມ່ນຜືນລະ 20 ພັນກີບ, ສູງສຸດແມ່ນ 1,5 ແສນ ກີບຕໍ່ຜືນ; ວັດສະດຸເພື່ອທີ່ຈະເອົາ ມາທັກທໍ ຫຼືເອົາຕໍ່າເປັນສິ້ນສ່ວນຫຼາຍແມ່ນເອົາມາຈາກທໍາມະຊາດເປັນຕົ້ນ: ຝ້າຍກໍ່ຕ້ອງເປັນຝ້າຍທີ່ປະຊາຊົນປູກເອງ, ສີຍ້ອມກໍ່ເອົາຈາກເປືອກໄມ້ຄັ່ງ, ຂີ້ມິ້ນ,ໃບຫ້ອມ ແລະສ່ວນອື່ນໆ ທັງນີ້ເພື່ອເຮັດໃຫ້ຜະລິດຕະພັນອອກມາມີຄຸນນະພາບດີ ແລະມີເອກະລັກສະເພາະດັ້ງເດີມ (ສິ້ນຝາຍດໍານິນ).

 ພາຍຫຼັງຜະລິດອອກມາແລ້ວນໍາເອົາຂາຍຕາມທ້ອງຕະຫຼາດ ແລະສັງຄົມກໍໄດ້ຄວາມຕອບຮັບດີ ແລະມີກໍາໄລງາມຊຶ່ງນັບແຕ່ນັ້ນມາຄອບຄົວຕົນເອງຈຶ່ງຢຶດຖືເອົາການຕໍ່າຫູກເປັນສິນຄ້າສ້າງເສດຖະກິດຄອບຄົວຊຶ່ງໄດ້ເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນເປັນກ້າວໆມາ.

  ມາຮອດປີ 2010 ທາງພັກ-ລັດກໍຄືອໍານາດການປົກຄອງເມືອງໄດ້ລົງມາຊຸກຍູ້ສົ່ງເສີມ ແລະຈັດຕັ້ງເປັນກຸ່ມຫັດຖະກໍາຂຶ້ນເພື່ອສ້າງວຽກເຮັດງານທໍາ, ມີຫຼາກຫຼາຍຜະລິດຕະພັນ ແລະສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງຕະຫຼາດຫຼາຍຂຶ້ນ; ຈາກນັ້ນ, ຕົນເອງກໍໄດ້ປຸກລະດົມໃຫ້ເອື້ອຍນ້ອງແມ່ຍິງພາຍໃນບ້ານວຽງແກ້ວ ຜູ້ທີ່ມີຄວາມສົນໃຈກ່ຽວກັບຫັດຖະກໍາເຂົ້າມາຮ່ວມນັບມື້ນັບເພີ່ມຂຶ້ນຈົນມາຮອດປະຈຸບັນພາຍໃນກຸ່ມມີ 54 ຄົນ, ແບ່ງອອກເປັນ 3 ກຸ່ມຄື: ກຸ່ມຕໍ່າຫູກ, ກຸ່ມຍ້ອມສີ ແລະກຸ່ມຕັດຫຍິບ.

  ສໍາລັບຄ່າແຮງງານແຕ່ລະກຸ່ມກໍມີຄວາມແຕກຕ່າງກັນເຊັ່ນ: ກຸ່ມຕໍ່າຫູກແມ່ນຄິດໄລ່ເປັນຜືນ, ກຸ່ມຍ້ອມຝ້າຍຈະຄິດໄລ່ເປັນກິໂລ ແລະກຸ່ມຕັດຫຍິບຄິດໄລ່ຄ່າແຮງງານເປັນໂຕອີງຕາມຄວາມສາມາດຜະລິດໄດ້ຫຼາຍໄດ້ໜ້ອຍສະເລ່ຍລວມແລ້ວລາຍຮັບໃສ່ຫົວໄດ້ປະມານ 1,5 ລ້ານກີບຫາ 2,5 ລ້ານກີບຕໍ່ຄົນຕໍ່ເດືອນ, ສະເລ່ຍລວມແລ້ວສະມາຊິກຜູ້ໜຶ່ງຈະມີລາຍຮັບເຂົ້າໃນຄອບຄົວປີລະ 24 ລ້ານຕໍ່ປີ; ຜະລິດພັນຂອງກຸ່ມຫັດຖະກໍາຂອງພວກເຮົານອກຈາກຕໍ່າສິ້ນດໍານິນເປັນຜະລິດຕະພັນຫຼັກແລ້ວຍັງມີຜະລິດຕະພັນອື່ນໆຕື່ມອີກເຊັ່ນ: ແພບ່ຽງ, ຕຸກກະຕາຊ້າງ, ຜ້າປູໂຕະ, ຜ້າພັນຄໍ, ແຜ່ນຮອງຈອກ, ຮອງຈານ, ຕິບເຂົ້າ ແລະອື່ນໆ ສ່ວນລາຄາແມ່ນຂຶ້ນກັບຊະນິດຜະ ລິດຕະພັນນັບແຕ່ເລີ່ມຕົ້ນ10 ພັນກີບ ຫາ 1,5 ລ້ານກີບ.

 ຕະຫຼາດຈຳໜ່າຍແມ່ນຂາຍສົ່ງໃຫ້ຮ້ານຂາຍສິ້ນຢູ່ນະຄອນຫຼວງວຽງຈັນ ແລະຮ້ານທົ່ວໄປພາຍໃນແຂວງ ແລະຕ່າງແຂວງຈໍານວນໜຶ່ງນອກຈາກນີ້ຍັງສົ່ງອອກຕ່າງປະ ເທດນຳອີກເຊັ່ນ: ໄທ, ເກົາຫຼີ, ຍີ່ປຸ່ນ;ພ້ອມມີການໄປວາງຂາຍຕາມງານເທສະການຕ່າງໆທັງໃນພາຍແຂວງແລະທົ່ວປະເທດມາຮອດປະຈຸບັນສິນຄ້າຂອງພວກເຮົາແມ່ນໄດ້ຖືກຮອງຮັບເປັນສິນຄ້າໂອດັອບ ແລະເປັນທີ່ຮູ້ຈັກໃນທົ່ວສັງຄົມ.

 ທ່ານ ບົວລອຍ ແພງແສງແກ້ວ ໄດ້ກ່າວຕື່ມອີກວ່າ: ນັບແຕ່ຄອບຄົວຕົນເອງຫັນມາຊຸກຍູ້ປະຊາຊົນພາຍໃນບ້ານເຮັດເປັນກຸ່ມຫັດຖະກຳຕໍ່າຫູກໄດ້ເຮັດໃຫ້ເອື້ອຍນ້ອງແມ່ຍິງພາຍໃນບ້ານໄດ້ມີວຽກເຮັດງານທໍາ, ມີລາຍຮັບໝັ້ນຄົງ ແລະຊີວິດການເປັນຢູ່ດີຂຶ້ນເວົ້າສະເພາະຄອບຄົວຂອງຂ້າພະເຈົ້າເອງໄດ້ມີການຫັນປ່ຽນຢ່າງຕັ້ງໜ້າ ແລະ ໄດ້ຮັບການພັດທະນາດີຂຶ້ນເປັນກ້າວໆ ໃນປີ 2018 ຜ່ານມາມີລາຍຮັບເຂົ້າໃນຄອບຄົວ 100 ລ້ານກວ່າກີບ ແລະປະຈຸບັນຄອບຄົວຕົນເອງມີເຮືອນຖາວອນ 2 ຫຼັງ, ລົດກະບະ1 ຄັນ, ມີນາປູກເຂົ້າ, ດິນ 3 ເຮັກຕາ ແລະທຶນໝູນວຽນອີກຈຳນວນໜຶ່ງ.

  ສຳລັບທິດທາງໃນຕໍ່ໜ້າຈະສືບຕໍ່ພັດທະນາ, ປັບປຸງຮູບແບບ, ລວດລາຍໃຫ້ມີຄວາມປານີດ, ຜະລິດສິນຄ້າໃຫ້ມີຄວາມຫຼາກຫຼາຍ, ມີຄຸນນະພາບສູງຂຶ້ນເພື່ອຕອບສະ ໜອງຂອງຕະຫຼາດໃນໂອກາດດັ່ງກ່າວທ່ານນາງ ບົວລອຍ ແພງແສງແກ້ວ ກໍໄດ້ສະແດງຄວາມຂອບໃຈມາຍັງພັກ-ລັດກໍຄືລູກຄ້າ ທີ່ໄດ້ໃຫ້ໂອກາດ ແລະ ໃຫ້ການຊ່ວຍ ເຫຼືອເຮັດໃຫ້ຄອບຄົວປະສົບຜົນສຳເລັດໃນການສ້າງເສດຖະກິດຄອບຄົວແກ້ໄຂຄວາມທຸກຍາກຕາມແນວທາງນະໂຍບາຍຂອງພັກ ແລະຈະສືບຕໍ່ປຸກລະດົມໃຫ້ເອື້ອຍນ້ອງແມ່ຍິງພາຍໃນບ້ານຫັນມາຕໍ່າຫູກເພື່ອຮັກສາເອກະລັກ, ວັດທະນະທໍາ ແລະສ້າງລາຍຮັບເຂົ້າຄອບຄົວເຮັດໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.

--------------------

ຂຽນໂດຍ: ທອນ ພົມທິກອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์