ຂັ້ນຕອນການປູກ ແລະຮັກສາສາລີ

  ສາລີ ເປັນພືດອາຍຸສັ້ນໃຊ້ເວລາປູກປະມານ 45-50 ວັນ ກໍສາມາດເກັບກ່ຽວຜົນຜະລິດໄດ້ ແລະມີເຕັກນິກການປູກທີ່ບໍ່ຫຍຸ້ງຍາກ, ບໍ່ຈໍາເປັນໃຊ້ສານເຄມີໃນການກໍາຈັດສັດຕູພືດເຮັດໃຫ້ມີຄວາມປອດໄພຕໍ່ສຸຂະພາບສາມາດປູກໄດ້ທົ່ວທຸກພາກຂອງປະເທດ ແລະ ປູກໄດ້ຕໍ່ເນື່ອງຕະຫຼອດປີຖ້າມີການສະໜອງນໍ້າຢ່າງພຽງພໍຕະຫຼອດລະ ດູການປູກ.

ອີງຕາມຂໍ້ມູນຈາກຄູ່ມືການປູກຝັງໃຫ້ຮູ້ວ່າ: ການປູກສາລີມີ 2 ວິທີຄື: ປູກແບບແຖວດຽວ ແລະ ປູກແບບແຖວຄູ່; ສໍາລັບການປູກແບບແຖວດຽວແມ່ນໃຊ້ໄລຍະ 75x 30 ຊັງຕີແມັດຈໍານວນ 2-3 ຕົ້ນຕໍ່ຂຸມ,ສ່ວນການປູກແບບແຖວຄູ່ແມ່ນໃຊ້ໄລຍະຫ່າງລະຫວ່າງແຖວ 120 ຊັງຕີແມັດໂດຍຍົກຮ່ອງແລ້ວປູກຂ້າງຮ່ອງທັງສອງຂ້າງໂດຍປູກລະຫວ່າງ 30 ຊັງຕີແມັດ ຈໍານວນ 2-3 ຕົ້ນຕໍ່ຂຸມ, ກ່ອນຈະປູກຄວນມີການໄຖດິນກ່ອນໂດຍໄຖ ແລະຕາກດິນໄວ້ 7 ມື້ ແລ້ວໄຖຄົນປະໄວ້ອີກ 3-5 ມື້ ປັບໜ້າດິນໃຫ້ສະເໝີເກັບເສດວັດສະພືດອອກຈາກພື້ນທີ່ປູກໃຫ້ໝົດ (ຖ້າເປັນດິນນາທີ່ເປັນດິນໜຽວຄວນໃສ່ຝຸ່ນໝັກ ຫຼື ຝຸ່ນຄອກເພື່ອເພີ່ມທາດອາຫານໃນດິນໃນອັດຕາ 2-3 ໂຕນຕໍ່ໄລ່ໂດຍຫວ່ານແລ້ວພວນດິນ),ການປູກສາລີແມ່ນຢອດເມັດ 2-3 ເມັດຕໍ່ຂຸມດ້ວຍອັດຕາການປູກສະເລ່ຍເມັດ 5 ກິໂລຕໍ່ໄລ່,ພາຍຫຼັງປູກແລ້ວຕ້ອງມີການບົວລະ ບັດຮັກສາເຊັ່ນ: ການຫົດນໍ້າສະໝໍ່າສະເໝີ ແລະຫຼັງຈາກໃສ່ຝຸ່ນແຕ່ລະໄລຍະ, ກໍລະນີໃຫ້ນໍ້າຕາມຮ່ອງໃນດິນໜຽວຄວນໃຫ້ນໍ້າທຸກອາທິດແຕ່ສິ່ງທີ່ຄວນຫຼີກເວັ້ນບໍ່ໄດ້ຄື: ຢ່າປ່ອຍໃຫ້ນໍ້າຖ້ວມຂັງໃນສວນສາລີເກີນ 24 ຊົ່ວໂມງອາດຈະເຮັດໃຫ້ຜົນຜະລິດຫຼຸດລົງ ຫຼື ອາດຕາຍໄດ້ ແລະ ຄວນພັກໄລຍະການໃຫ້ນໍ້າຕາມສົມຄວນເມື່ອສາລີສົມບູນແລ້ວແຕ່ຢ່າປ່ອຍໃຫ້ລຳຕົ້ນສາລີຫ່ຽວແຫ້ງ (ຖ້າສັງເກດເຫັນຕົ້ນສາລີຫ່ຽວຄວນໃຫ້ນໍ້າທັນທີ).

  ສໍາລັບການໃສ່ຝຸ່ນ: ຄວນໃສ່ຄັ້ງທີ 1 ຮອງພື້ນກ່ອນຢອດເມັດດ້ວຍຝຸ່ນເຄມີສູດ 15-15-15 ອັດຕາ 50 ກິໂລຕໍ່ໄລ່ຫຼືຝຸ່ນສູດ 20-10-10 ອັດຕາ 75 ກິໂລຕໍ່ໄລ່, ຄັ້ງທີ 2 ເມື່ອສາລີອາຍຸ 15-25 ວັນ ໃສ່ຝຸ່ນສູດເຄມີ 46-0-0 ອັດຕາ 25 ກິໂລຕໍ່ໄລ່ໂດຍໂຮຍຂ້າງຕົ້ນ ແລະພວນດິນຖົມ,ສ່ວນຄັ້ງທີ 3 ເມື່ອສາລີອາຍຸ 35-40 ວັນກ່ອນຖອດຍອດໃສ່ຝຸ່ນສູດດຽວກັບຄັ້ງທີ 2 ໃນອັດຕາ 25 ກິໂລຕໍ່ໄລ່, ກ່ຽວກັບການຖອດຍອດເມື່ອສາລີເລີ່ມອອກຊໍ່ດອກໂຕຜູ້ຫຼືດອກຫົວໃຫ້ຖອດດອກໂຕຜູ້ຖິ້ມ (ພາຍຫຼັງປູກແລ້ວ 45 ວັນ).

ການປູກສາລີສ່ວນຫຼາຍຈະພົບບັນຫາພະຍາດລານໍ້າຄ້າງໂດຍພົບເຫັນການລະບາດໃນໄລຍະລະດູຝົນປະມານເດືອນພຶດສະພາຈົນເຖິງໝົດລະດູການຊຶ່ງສາມາດປ້ອງກັນໄດ້ໂດຍໃຊ້ເມັດພັນທີ່ມີການປະສົມເຄມີແລ້ວ ຫຼື ກໍລະນີຖ້າພົບຕົ້ນທີ່ເປັນພະຍາດໃຫ້ຖອນ ແລະທຳລາຍຖິ້ມ; ສ່ວນໄລຍະການເກັບກ່ຽວທີ່ເໝາະສົມແມ່ນສາມີອາຍຸປະ ມານ 45-50 ວັນ ຫຼືເມື່ອຝັກສາລີມີໄໝພົ້ນຍາວອອກປະມານ 1-2 ຊັງຕີແມັດໂດຍຕັດ ຫຼືຫັກ ແລະສາມາດເກັບໄດ້ທຸກວັນພາຍໃນ 7-10 ວັນ.

--------------------

ຂຽນໂດຍ: ແປ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์