ຈັບມືພັດທະນາສີມືແຮງງານຊ່າງໄມ້ລາວ

  ວັນທີ 4 ຕຸລາຜ່ານທີ່ສະຖາບັນພັດທະນາກຳມະບານລາວໄດ້ມີພິທີເຊັນສັນຍາບົດບັນທຶກຄວາມເຂົ້າໃຈລະຫວ່າງສະມາຄົມເຟີນິເຈີລາວກັບສະຖາບັນພັດທະນາກຳມະ ບານລາວລົງນາມໃນສັນຍາໂດຍທ່ານ ຄຳໄພ ສົມຊະນະປະທານສະມາຄົມເຟີນິເຈີລາວ ແລະທ່ານ ສົມລຶກ ສຸວັນນະສານ ຫົວໜ້າສະຖາບັນພັດທະນາກຳມະບານລາວໃຫ້ກຽດເຂົ້າຮ່ວມຂອງທ່ານປ້ານນ້ອຍມະນີປະທານສູນກາງສະຫະພັນກຳມະບານລາວພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

 ທ່ານ ຄຳໄພ ສົມຊະນະ ກ່າວວ່າ: ການເຊັນສັນຍາໂຄງການຮ່ວມມືໃນຄັ້ງນີ້ແມ່ນມີຄວາມໝາຍ ແລະຄວາມສຳຄັນສຳລັບຜູ້ອອກແຮງງານໃນອາຊີບຊ່າງໄມ້, ບັນດາຫົວ ໜ່ວຍທຸລະກິດເຟີນິເຈີໄມ້ພ້ອມທັງສະມາຄົມເຟີນິເຈີລາວ, ການພັດທະນາສີມືແຮງງານໃຫ້ແກ່ພາກທຸລະກິດໄມ້ເປັນພາລະບົດບາດ ແລະໜ້າທີ່ອັນສຳຄັນຂອງສະມາຄົມທີ່ຈະຕ້ອງໄດ້ມີການຈັດຕັ້ງປະຕິບັດຮ່ວມກັບພາກລັດທີ່ກ່ຽວຂ້ອງໃຫ້ມີຜົນສຳເລັດ ແລະ ເກີດດອກອອກຜົນຊຶ່ງບວກກັບຍຸກປະຈຸບັນນີ້ຖືວ່າມີຄວາມຕ້ອງການສູງສຳລັບ ການພັດທະນາສີມືແຮງງານຂອງພາກທຸລະກິດໃນ ສປປ ລາວ ເພາະເປັນຍຸກທີ່ມີການແຂ່ງຂັນກັນສູງທຸກຢ່າງຕ້ອງມີການປັບຕົວໄວໃຫ້ທັນກັບສະພາບການບໍ່ສະນັ້ນອາດມີຄວາມເປັນໄປໄດ້ສູງໃນການເສຍໂອກາດ.

  ດັ່ງນັ້ນຈຶ່ງເກີດມີໂຄງການຮ່ວມມືນີ້ຂຶ້ນມາຍ້ອນສະມາຄົມເຫັນຄວາມສຳຄັນ ແລະຈຳເປັນໃນການພັດທະນາສີມືແຮງງານໂດຍສະມາຄົມໄດ້ພະຍາຍາມສຶກສາຊອກຄົ້ນທຸກວິທີທາງໃຫ້ກັບໂຄງການຮ່ວມມືນີ້ເພື່ອເປັນການຊ່ວຍເຫຼືອທຸລະກິດໄມ້ໃນສະມາຊິກ ແລະ ນອກສະມາຊິກໃນຂອບເຂດທົ່ວປະເທດເຮັດໃຫ້ຜູ້ອອກແຮງໃນຫົວໜ່ວຍທຸລະກິດມີສີມືແຮງງານທີ່ດີເຂັ້ມແຂງຂຶ້ນກວ່າເກົ່າສາມາດແຂ່ງຂັນກັບພາກພື້ນໄດ້ ແລະສາມາດຜະລິດສິນຄ້າຮອງຮັບກັບຕະຫຼາດໃນຍຸກປະຈຸບັນ.

------------------

ໜັງສືພິມເສດຖະກິດ-ສັງຄົມ

• 07/10/2019