ມອບ-ຮັບໜາ້ທີ່ຫົວໜາ້ຫອ້ງວ່າການແຂວງໄຊສົມບູນ

   ພິທີມອບຮັບໜ້າທີ່ຫົວໜ້າຫ້ອງວ່າການແຂວງໄຊສົມບູນຜູ້ເກົ່າ ແລະຜູ້ໃໝ່ລະຫວ່າງ ທ່ານ ແດງ ປະທຸມທອງ ຫົວໜ້າຫ້ອງວ່າການຜູ້ເກົ່າ ແລະທ່ານ ສົມບູນສອນລິດທິເດດ ຫົວໜ້າຫ້ອງວ່າການຜູ້ໃໝ່ໄດ້ຈັດຂຶ້ນໃນວັນທີ 3 ຕຸລາ 2019, ທີ່ສະໂມສອນເມືອງອານຸວົງ,ໂດຍເປັນປະທານຂອງ ທ່ານ ພົຕ ຄໍາລຽງ ອຸທະໄກສອນ ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ພ້ອມດ້ວຍພະແນກການ, ອົງການ-ກົມກອງອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງເຂົ້າ ຮ່ວມ.

ທ່ານ ແດງ ປະທຸມທອງ ໄດ້ຜ່ານບົດກ່າວລາໜ້າທີ່ທັງລາຍງານວຽກງານຮອບດ້ານທີ່ຕົນໄດ້ຈັດຕັ້ງປະຕິບັດໃນໄລຍະທີ່ຜ່ານມາຊຶ່ງມີຜົນສຳເລັດ ແລະ ຂໍ້ຄົງຄ້າງຫຼາຍດ້ານທີ່ຈະມອບຕໍ່ໃຫ້ຫົວໜ້າຫ້ອງວ່າການຜູ້ໃໝ່ສືບຕໍ່ຈັດຕັ້ງປະຕິບັດໃນຕໍ່ໜ້າ; ຈາກນັ້ນໄດ້ມີພິທີເຊັນບົດບັນທຶກມອບ-ຮັບໜ້າທີ່ລະຫວ່າງ ທ່ານ ແດງ ປະທຸມທອງ ຫົວໜ້າຫ້ອງວ່າການຜູ້ເກົ່າ ແລະທ່ານ ສົມບູນ ສອນລິດ ທິເດດຫົວໜ້າຫ້ອງວ່າການຜູ້ໃໝ່ຢ່າງເປັນທາງການ.

 ໂອກາດດັ່ງກ່າວທ່ານເຈົ້າແຂວງໄຊສົມບູນໄດ້ສະແດງຄວາມຍ້ອງຍໍຊົມເຊີຍຕໍ່ທ່ານຫົວໜ້າຫ້ອງວ່າການແຂວງຜູ້ເກົ່າທີ່ໄດ້ຜ່ານຜ່າທຸກຄວາມຫຍຸ້ງຍາກນາໆປະການຈັດ ຕັ້ງປະຕິບັດໜ້າທີ່ວຽກງານຂອງຕົນດ້ວຍຄວາມເອົາໃຈໃສ່ ຈົນມີບາດກ້າວພົ້ນເດັ່ນຫຼາຍດ້ານໃນໄລຍະຜ່ານມາ ແລະຍົກໃຫ້ເຫັນເຫດຜົນຂອງການແຕ່ງຕັ້ງຍົກຍ້າຍຊັບຊ້ອນຂອງພະນັກງານຂັ້ນນຳພາຄຸ້ມຄອງຊຶ່ງເປັນວຽກປົກກະຕິໂດຍອີງໃສ່ຄວາມຮຽກຮ້ອງຕ້ອງການຕົວຈິງຂອງໜ້າທີ່ການເມືອງໃນໄລຍະໃໝ່ພາຍໃຕ້ການຊີ້ນຳຂອງສູນ ກາງພັກ, ພ້ອມດຽວກັນນັ້ນທ່ານຍັງໄດ້ເນັ້ນໜັກໃຫ້ຫົວໜ້າຫ້ອງວ່າການແຂວງໄຊສົມບູນຜູ້ໃໝ່ຈົ່ງສືບຕໍ່ຈັດຕັ້ງປະຕິບັດໜ້າທີ່ການເມືອງທີ່ຂັ້ນເທິງມອບໝາຍດ້ວຍຄວາມຮັບຜິດຊອບສູງໂດຍການເພີ່ມທະວີບົດບາດການນຳພາຂອງຕົນຢ່າງຕັ້ງໜ້າ ແລະແຂງແຮງ, ສືບຕໍ່ພັດທະນາແຂວງໄຊສົມບູນໃຫ້ມີຄວາມຈະເລີນກ້າວໜ້າ ແລະຂະຫຍາຍຕົວຂຶ້ນເລື້ອຍໆ.

------------------

ໜັງສືພິມເສດຖະກິດ-ສັງຄົມ

• 07/10/2019