ປະຊາຊົນ 12 ບ້ານເມືອງທ່າແຕງ ໄດ້ຮັບທຶນຈາກໂຄງການພັດທະນາກະສິກຳຊຸມຊົນ

  ປະຈຸບັນປະຊາຊົນ 12 ບ້ານ ເປົ້າໝາຍ 1.077 ຄອບຄົວ ຢູ່ເມືອງທ່າແຕງ ແຂວງເຊກອງ ໄດ້ມີຊີວິດການເປັນຢູ່ດີຂຶ້ນ, ພາຍຫັຼງໂຄງການພັດທະນາກະສິກໍາຊຸມຊົນໄລຍະ II ຂອງອົງການຊ່ວຍເຫຼືອເຊິ່ງກັນ ແລະກັນໄດ້ໃຫ້ເງິນ 39.625 ໂດລາ ຫຼື ເທົ່າກັບ 348 ລ້ານກວ່າກີບ ເຂົ້າໃນການເຄື່ອນໄຫວກິດຈະກຳຂອງໂຄງການໃນໄລຍະ 3 ເດືອນທ້າຍປີ 2019 ນີ້.

 

 ທ່ານ ບຸນຄອງ ທອງປະເສີດ ຜູ້ປະສານງານໂຄງການກະສິກຳຊຸມຊົນໄລຍະ II ປະຈຳເມືອງທ່າແຕງກ່າວໃນໂອກາດເຂົ້າຮ່ວມກອງປະຊຸມສະຫຼຸບການຈັດຕັ້ງປະຕິບັດ ກິດຈະກຳໄລຍະ 3 ເດືອນທ້າຍປີນີ້ໃນວັນທີ 3 ຕຸລາຜ່ານມາຢູ່ທີ່ຫ້ອງການກະສິກຳເມືອງທ່າແຕງວ່າ: ຈຸດປະສົງກໍເພື່ອຄໍ້າປະກັນສະບຽງອາຫານໃຫ້ປະຊາຊົນມີອາຫາ ນທີ່ຫຼາກຫຼາຍໃຫ້ພຽງພໍ ກັບການບໍລິໂພກ ແລະຂາຍເປັນ ສິນຄ້າຈໍານວນໜຶ່ງ, ທັງເປັນການ ພັດທະນາຊຸມຊົນໃນທຸກດ້ານໃຫ້ມີ ຄວາມເຂັ້ມແຂງເປັນຕົ້ນ: ດ້ານການ

ສຶກສາ, ສາທາລະນະສຸກ, ການປູກ-ການລ້ຽງ ແລະອື່ນໆ, ຜ່ານການຈັດຕັ້ງປະຕິບັດໄລຍະ 3 ເດືອນຜ່ານມາໂຄງການໄດ້ສໍາເລັດຫຼາຍກິດຈະກໍາໂດຍເລັ່ງໃສ່ 12 ບ້ານເປົ້າໝາຍຂອງໂຄງການຄື: ບ້ານກົກພຸງໃຕ້,ບ້ານຕຸ້ມຍໍ, ບ້ານແສນ, ບ້ານກໍາກອກ, ບ້ານຈະຫຼາມເກົ່າ, ບ້ານປະໄລ່, ບ້ານໂທນນ້ອຍ, ບ້ານສະທົວເໜືອ, ບ້ານປາຫຼາຍ, ບ້ານໂທນໃຫ່ຍ, ບ້ານຈຸງຮຸງເໜືອ ແລະບ້ານຈຸງຮຸງໃຕ້ເມືອງທ່າແຕງຊຶ່ງໄດ້ປະຕິບັດກິດຈະກຳລົງມອບປຶ້ມຄູ່ມືໃນການພັດທະນາ, ລົງຕິດຕາມການນຳໃຊ້ປຶ້ມ, ມອບແນວພັນໝາກໄມ້, ຕິດຕາມການ ລ້ຽງສັດ, ສະໜອງອຸປະກອນ ແລະ ນຳພາກໍ່ສ້າງວິດຖ່າຍ, ກໍ່ສ້າງນ້ຳ ປະປາຊຸມຊົນບ້ານຕຸ່ມຍໍ ແລະ ບ້ານໂທນໃຫຍ່, ປັບປຸງລະບົບນ້ຳໃນໂຮງຮຽນ (ບ້ານຈຸງຮຸງໃຕ້), ສ້ອມແປງນໍ້າບາດານ, ມອບເຄື່ອງກັນຕອງນໍ້າ, ລົງເຮັດສຸຂະສຶກສາອານະໄມ 3 ສະອາດ ແລະອື່ນໆຢ່າງທົ່ວເຖິງ.

 ໂຄງການພັດທະນາກະສິກຳຊຸມຊົນໄລຍະ II ໄດ້ເລີ່ມຈັດຕັ້ງປະຕິບັດກິດຈະກໍາຕ່າງໆຂອງໂຄງການມາແຕ່ຕົ້ນປີ 2017 ແລະຄາດວ່າທ້າຍປີ 2019 ນີ້ຈະສຳເລັດໂດຍແມ່ນອົງການຝຣັ່ງເພື່ອການພັດທະນາ ແລະອົງການເທຍອົດສະຕາລີເປັນຜູ້ສະໜອງທຶນຈຳ ນວນ 451.172 ໂດລາ ຫຼືເທົ່າກັບ 3,9 ຕື້ກີບ.

-------------------

ໜັງສືພິມເສດຖະກິດ-ສັງຄົມ

แชร์