ສືບທອດມູນເຊື້ອດ້ານຫັດຖະກຳ ເຮັດໃຫ້ຊີວິດການເປັນຢູ່ດີຂຶ້ນ

  ບ້ານໂພນເຍຍໃຫຍ່ເປັນບ້ານໜຶ່ງຂອງເມືອງທ່າແຂກ ແຂວງຄຳມ່ວນ ປະກອບມີ 178 ຄອບ ຄົວ, ພົນລະເມືອງ 931 ຄົນ, ປະຊາຊົນສ່ວນໃຫຍ່ຢຶດຖືອາຊີບເຮັດນາເປັນຕົ້ນຕໍ, ປູກຝັງ-ລ້ຽງສັດ ແລະ ຢຶດຖືອາຊີບຫັດຖະກຳຈັກສານ ແລະຕີເຫຼັກເປັນອາຊີບເສີມ, ເພື່ອເຮັດໃຫ້ຊີວິດການເປັນຢູ່ໃນການສ້າງສາທຳມາຫາກິນ ແລະ ສ້າງລາຍຮັບໃຫ້ແກ່ຄອບຄົວບວກກັບມູນເຊື້ອທີ່ເຄີຍສືບທອດກັນມາຈາກຮຸ້ນຕໍ່ຮຸ້ນ.

 

ພາຍຫຼັງທີ່ໄດ້ສຳເລັດການຜະ ລິດເຂົ້ານາປີແລ້ວ ປະຊາຊົນສ່ວນ ໃຫຍ່ກໍໄດ້ຫັນເຂົ້າສູ່ກິດຈະກຳທີ່ເປັນອາຊີບເສີມ ຊຶ່ງປະກອບມີ: ສານຫວດ, ສານມວຍໜຶ້ງເຂົ້າ, ທັກ ຟອຍ ແລະຕີເຫຼັກເຊັ່ນ: ຕີພ້າ, ຕີສຽມ ແລະອຸປະກອນອື່ນທີ່ລູກຄ້າສັ່ງດັ່ງຄອບຄົວຂອງ ທ້າວ ແກ້ວ ວິເສດ ໄດ້ຢຶດຖືອາຊີບສານມວຍເປັນອາ ຊີບເສີມ ພາຍໃນຄອບຄົວມີແຮງງານຕົ້ນຕໍ 5 ຄົນ, ຍິງ 2 ຄົນ, ໄດ້ຖືເອົາອາຊີບສານມວຍມາໄດ້ຫຼາຍປີແລ້ວໃນມື້ໜຶ່ງສາມາດສານໄດ້ 7-8 ໜ່ວຍ, ຂາຍໃນລາຄາ 8.000 ກີບຕໍ່ໜ່ວຍ, ນອກ

ນີ້ພາຍໃນບ້ານ ຍັງມີອີກຫຼາຍຄອບຄົວທີ່ປະກອບ ອາຊີບສານມວຍໜຶ້ງເຂົ້າ ຊຶ່ງ ກວມເອົາປະມານ 80-90% ຂອງ ຈຳນວນຄອບຄົວພາຍໃນບ້ານ  ໂດຍ ສະເລ່ຍໃນໜຶ່ງເດືອນສ້າງລາຍຮັບ ໄດ້1,6 ລ້ານກີບຕໍ່ຄອບຄົວ ແລະໃນໜຶ່ງປີສາມາດສ້າງລາຍຮັບໄດ້ເກືອບ 20 ລ້ານກີບ, ດ້ານການຈຳໜ່າຍຂາຍອອກສູ່ຕະຫຼາດແມ່ນພາຍຫຼັງທີ່ສານແລ້ວແຕ່ລະຄອບ ຄົວຈະເອົາມາໂຮມກັນແລ້ວມີແມ່ ຄ້າຄົນກາງມາຮັບຊື້ເອົາ ຫຼືມີບາງ ຄອບຄົວກໍຈະໄປສົ່ງເອງຕາມ ເງື່ອນໄຂຂອງໃຜລາວ.

ນອກຈາກການສານມວຍແລ້ວ ຍັງມີອີກຫຼາຍຄອບຄົວທີ່ປະກອບ ອາຊີບທັກຟອຍ ຊຶ່ງມີ: ຟອຍແຂມ, ຟອຍກ້ານຕານ ແລະຟອຍກວດຂີ້ ເຫຍື້ອທົ່ວໄປໂດຍວັດຖຸດິບແມ່ນຈະ ໄປຊື້ຈາກທ້ອງຖິ່ນອື່ນເພື່ອມາປະ ກອບທັກເປັນຟອຍເຊັ່ນ: ຕົ້ນແຂມ, ກ້ານຕານແລະລຳໄຜ່ ທີ່ມີຂະ ໜາດພໍດີ, ສ່ວນການທັກຟອຍຈະ ໄດ້ຫຼາຍ ຫຼືໜ້ອຍ ແມ່ນອີງຕາມຈຳ ນວນຂອງຄົນພາຍໃນຄອບຄົວ ຖ້າ ມີແຮງງານຫຼາຍກໍຈະທັກໄດ້ຫຼາຍ ຊຶ່ງພາຍໃນບ້ານຈະມີຄອບຄົວທັກ ຟອຍປະມານ 50 ຄອບຄົວ ແລະ ສ້າງລາຍຮັບໄດ້ບໍ່ຕໍ່າກວ່າ1,5 ລ້ານຕໍ່ຄອບຄົວຕໍ່ເດືອນ, ສຳລັບອາ ຊີບຕີພ້າຂອງຊາວບ້ານໂພນເຍຍໃຫຍ່ແມ່ນໄດ້ເລີ່ມຜະລິດມາແຕ່ປີ 1977 ແລະ ປະຈຸບັນມີ 39 ຄອບຄົວ ສາມາດສ້າງລາຍຮັບໄດ້ເຖິງ 4-5 ລ້ານກີບຕໍ່ຄອບຄົວຕໍ່ເດືອນ.

ບ້ານໂພນເຍຍໃຫຍ່ແມ່ນບ້ານທີ່ ປະຊາຊົນມີຄວາມດຸໝັ່ນຂະຫຍັນ ພຽນໃນການສ້າງສາທຳມາຫາກິນ ຕິດພັນກັບມູນເຊື້ອໃນການຈັກສານ ແລະຕີເຫຼັກທີ່ມີມາແຕ່ດົນນານ ຊຶ່ງມູນເຊື້ອດັ່ງກ່າວໄດ້ເຮັດໃຫ້ ບ້ານໂພນເຍຍໃຫຍ່ກາຍເປັນບ້ານ ປອດຄະດີ, ບ້ານແບບຢ່າງທາງ ດ້ານສາທາລະນະສຸກ, ບ້ານແມ່ຍິງ 3 ດີ, ບ້ານວັດທະນະທຳ ແລະກາຍ ເປັນບ້ານພັດທະນາ.

----------------

ຂຽນໂດຍ: ກອງຄຳ ລໍອິນສານ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์