ຜູ້ທຸກຍາກຈະ​ໄດ້ກວດ ແລະຜ່າຕັດແກ່ນ​ຕາ​ຂຸ່ນ​ບໍ່​ເສຍຄ່າ

  ສະພາອຸດສະຫະກຳ ແລະການຄ້າ ນະຄອນຫຼວງວຽງຈັນ ຮ່ວມ​ກັບມູນ​ນິທີ​ເອີ​ນິວວິ​ເຊີນ ແລະສະມາຄົມທຸລະກິດສິງກະໂປຢູ່ ສປປ ລາວ ໄດ້ເປີດໂອກາດໃຫ້ປະຊາຊົນຜູ້ທຸກຍາກໃນນະຄອນຫຼວງວຽງຈັນ ແລະບັນດາແຂວງທີ່ໃກ້ຄຽງເຂົ້າຮ່ວມເພື່ອກວດເຊັກສຸຂະພາບຕາ ແລະຜ່າຕັດຕາໂດຍບໍ່ໄດ້ເສຍຄ່າຫຍັງແຕ່ຢ່າງໃດໃນລະຫວ່າງວັນທີ 11-13 ຕຸລາ 2019 ທີ່ ສູນປິ່ນປົວ ແລະຮັກສາສຸຂະພາບຕາທົ່ງປົ່ງ ນະຄອນຫຼວງວຽງຈັນ.

 ໂຄງການ​ຜ່າຕັດ​ແກ່ນ​ຕາ​ຂຸ່ນ​ໂດຍບໍ່ເສຍຄ່າ​ໃຫ້​ແກ່​ຜູ້​ທຸກ​ຍາກ ​ແລະ​ຜູ້​ບໍ່ມີ​ເງື່ອນ​ໄຂ​ໃນ​ການ​ປິ່ນປົວຢູ່ປະ​ເທດລາວ ຈັດ​ຂຶ້ນ​​ໂດຍການ​ຮ່ວມ​ມື​ລະຫວ່າງສະພາອຸດສະຫະກຳ ແລະ ການຄ້ານະຄອນຫຼວງວຽງຈັນ, ​ມູນ​ນິທີ ເອີ​ນິວວິ​ເຊີນ ແລະສະມາຄົມທຸລະກິດສິງກະໂປຢູ່ ສປປ ລາວ ຊຶ່ງ​ໄດ້​ຮັບ​ການ​ສະໜັບສະໜູນ​ຈາກ​ປະ​ເທດ​ສິງກະ​ໂປ ​ແລະ

 ໄດ້​ຮັບ​ການ​ຮັບຮອງ​ຈາກກະຊວງ​ສາທາລະນະ​ສຸກ,ຊຶ່ງ​ຈະ​ຈັດ​ຂຶ້ນ​ໃນ​ລະຫວ່າງທີ 11-13 ຕຸລາ 2019 ທີ່ສູນປິ່ນປົວ ແລະຮັກສາສຸຂະພາບຕາທົ່ງປົ່ງນະຄອນຫຼວງວຽງ ຈັນ, ການຜ່າຕັ​ດ​ແມ່ນ​ຈະ​ໃຊ້​ເວລາ​ພຽງ 5 ນາທີ ​ໂດຍ​ທີ​ມງານ​ແພດໝໍຈາກ​ປະ​ເທດ​ເນ​ປານ ​ແລະສິງກະ​ໂປ, ຊຶ່ງທຸກຄົນສາມາດໄປລົງທະບຽນໄດ້ເລີ່ມແຕ່ວັນທີ 4 ຫາ 9 ຕຸລາ 2019 ໃນໂຄງການຜ່າຕັດແກ່ນຕາຂຸ່ນໂດຍບໍ່ເສຍຄ່າປິ່ນປົວສໍາລັບຊຸມຊົນຜູ້ທຸກຍາກ​ໄດ້ທີ່ໂຮງໝໍ 9 ຕົວ​ເມືອງ ​ແລະໂຮງໝໍປົວ​ຕາ​ທົ່ງ​ປົ່ງ ຫຼືຕິດຕໍ່​ໄດ້​ທີ່​ເບີ​ໂທ 030 5729168, 020 55984248.

ຫຼັງຈາກ​ການຜ່າຕັດ​ແກ່ນ​ຕາ​ສໍາ​ເລັດທາງມູນ​ນິທີ ​ເອີ​ນິວວິ​ເຊີນ ຈະ​ສະໜອງຢາ, ​ເລນ​ສ, ຢາຢອດ​ຕາ ​ໃຫ້​ແກ່​ຜູ້​ມາ​ປິ່ນປົວ​ນໍາ​ອີກ; ​ໃນ​ໄລຍະ​ຜ່ານ​ມາມູນ​ນິທີເອີ​ນິວວິ​ເຊີນ​ໄດ້​ຟື້ນ​ຟູ​ສາຍຕາຫຼາຍກວ່າ 30 ພັນ​ສາຍຕາ ສໍາລັບ​ຜູ້​ທີ່​ທຸກຍາກ​ຢູ່​ປະ​ເທດ​ເນ​ປານ, ມຽນມາ, ກໍາປູ​ເຈຍ ​ແລະອິນ​ໂດ​ເນ​ເຊຍ.

-----------------

ໜັງສືພິມເສດຖະກິດ-ສັງຄົມ

 

แชร์