ເຜົ່າໂອຍ ສະຫຼອງບຸນໄຂປະຕູເລົ້າປະຈຳປີ

   ບຸນໄຂປະຕູເລົ້າຂອງຊົນເຜົ່າໂອຍຢູ່ບ້ານອິນທີເມືອງສະໜາມໄຊແຂວງອັດຕະປືເປັນງານບຸນສ້າງສົມເປັນຮີດຄອງປະເພນີ, ເປັນວິຖີຊີວິດກຳເນີດເກີດຂຶ້ນຈາກແນວຄິດຈິດໃຈ ແລະ ທາດແທ້ຂອງຊາວເຜົ່າໂອຍທີ່ປະຕິບັດສືບສານ ແລະ ປົກປັກຮັກສາກັນມາຫຼາຍເຊັ່ນຄົນ.

  ບຸນໄຂປະຕູເລົ້າຂອງຊົນເຜົ່າໂອຍຖືເປັນບຸນປາງໃຫຍ່ປະຈຳປີຂອງບ້ານເຊິ່ງສ່ວນໃຫຍ່ຊົນເຜົ່າໂອຍໄດ້ຮຽກວ່າເປັນພິທີກຳເອີ້ນຂວັນເຂົ້າໃນນາ, ຂວັນປາໃນຫຼຸມເປັນຂະບວນການຊຸກຍູ້ການຜະລິດຕ່າງໆຂອງພໍ່ແມ່ປະຊາຊົນທີ່ໄດ້ສຳເລັດ ແລະຮັບໝາກຜົນຕາມແຮງຂອງໃຜລາວຊຶ່ງປີນີ້ໄດ້ເປີດຂຶ້ນຢ່າງຄຶກຄື້ນມ່ວນ ຊື່ນໃນວັນທີ 20 ມັງກອນ 2019 ໂດຍມີອຳນາດການປົກຄອງຂອງແຂວງ, ເມືອງ, ບ້ານ ແລະພໍ່ແມ່ປະຊາຊົນເຂົ້າຮ່ວມຢ່າງຫຼວງຫຼາຍ, ປີນີ້ການເຮັດພິທີ ກຳບຸນໄຂປະຕູເລົ້າຂອງຊາວເຜົ່າໂອຍແມ່ນກົງກັບວັນສ້າງຕັ້ງກອງທັບປະຊາຊົນປະຕິວັດລາວຄົບຮອບ 70 ປີ ຊຶ່ງມີຄວາມໝາຍຄວາມສຳຄັນຫຼາຍໃນການສະເຫຼີມສະຫຼອງວັນດັ່ງກ່າວໄປພ້ອມໆກັນ, ປະຊາຊົນໄດ້ພ້ອມກັນກຽມພ້ອມອາຫານ, ເຄື່ອງດື່ມທີ່ເຮັດດ້ວຍສີມືແບບທຳມະຊາດ ແລະ ຕ້ອນຮັບເເຂກບ້ານ, ແຂກເມືອງຕາມວັດທະນະທຳດ້ວຍຈິດໃຈອັນດູດດື່ມເພາະວ່າບຸນໄຂປະຕູເລົ້າຂອງເຜົ່າໂອຍສະເເດງໃຫ້ເຫັນເຖິງການເຕົ້າລວມຄວາມສະມັກຄີລະຫວ່າງພໍ່ແມ່ປະຊາຊົນພາຍໃນບ້ານ ແລະ ຍາດພີ່ນ້ອງທີ່ໃກ້ຄຽງໄດ້ມາທ່ອງທ່ຽວຢື້ຢາມຕາມວັດທະນະທຳ, ໃນປະເພນີ້ການຕ້ອນຮັບແຂກບ້ານເເຂກເມືອງນັ້ນປະກອບໄປດ້ວຍເຂົ້າປຸ້ນ, ເຫຼົ້າໄຫທີ່ຜະລິດແບບທຳມະຊາດ, ກິນປາຫຼຸມທຳມະຊາດ, ນອກນີ້ຍັງມີເຂົ້າຕົ້ມ, ເຂົ້າເໝົ້າ ແລະ ອາຫານປະເພດຊານິດອື່ນໆ ແລະ ຕອນກາງຄືນກໍມີການຄົບງັນດ້ວຍວົງດົນຕຣີຕາມປະເພນີຂອງບ້ານຢ່າງເບີກບານມ່ວນຊື່ນ.

  ທ່ານ ນາງ ບຸນນານ ບຸນນະແສງ ຫົວໜ້າພະແນກ ຖວທ ແຂວງ ອັດຕະປື ໄດ້ໃຫ້ຮູ້ວ່າ: ບຸນໄຂປະຕູເລົ້າຂອງຊາວເຜົ່າໂອຍ ບ້ານອິນທີເປັນການສົ່ງເສີມວັດທະນະທຳຂອງຊາດໄປຕາມແນວທາງທີ່ຖືກຕ້ອງບົນພື້ນຖານແບບວິຖີທາງດຳເນີນຊີວິດທີ່ຊ່ວຍສະທ້ອນໃຫ້ເຫັນຄຸນຄ່າ ແລະພູມປັນຍາຂອງເຜົ່າໂອຍຢ່າງເປັນລະບົບຕາມຂະນົບທຳນຽມຂອງທ້ອງຖິ່ນຊຶ່ງເປັນການສືບຕໍ່ປົກປັກຮັກສາຮີດຄອງປະເພນີອັນດີງາມນີ້ໄວ້ໃຫ້ຍືນຍົງ ແລະ ສືບທອດຮອດເຊັ່ນລູກເຊັ່ນ ຫຼານໃນອະນາຄົດ.

แชร์