ອຸດົມໄຊ ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ

 ປີນີ້ ອຸດົມໄຊ ກໍເປັນແຂວງໜຶ່ງທີ່ໄດ້ຮັບຜົນກະທົບໜັກສົມຄວນແຕ່ກໍຍັງໄດ້ແບ່ງປັນນໍ້າໃຈການຊ່ວຍເຫຼືອໃຫ້ໄປຮອດໄປເຖິງຜູ້ປະສົບໄພນໍ້າຖ້ວມໃນເຂດພາກກາງ ແລະພາກໃຕ້ ລວມເປັນເງິນ 100 ລ້ານກີບ, ພ້ອມນັ້ນ ຍັງໄດ້ ລະດົມຈາກບໍລິສັດ ແຟເຊັດພັດທະນາແຫຼ່ງທ່ອງທ່ຽວທຳມະຊາດຈຳກັດ (ນໍ້າກັດຢໍລະປາ) ທີ່ລົງທຶນພາຍໃນແຂວງ ໄດ້ຕື່ມ 22 ລ້ານກີບ, ຊຶ່ງຕາງໜ້າແຂວງມອບໂດຍທ່ານ ຄຳພຽງ ຍາຈົງວາ ຮອງເຈົ້າແຂວງອຸດົມໄຊ ແລະທ່ານນາງ ວັນໂນລາ ອິນລະວົງ ຕາງໜ້າບໍລິສັດມອບແລະຮັບໂດຍທ່ານນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ຮອງປະທານຄະນະກຳມະການປ້ອງກັນ ແລະ ຄວບ ຄຸມໄພພິບັດແຫ່ງຊາດ.

  ທ່ານ ຄຳພຽງ ຍາຈົງວາ ກ່າວວ່າ: ຕາງໜ້າແຂວງອຸດົມເຄື່ອງຊ່ວຍເຫຼືອເປັນເງິນສົດຈຳນວນ 100 ລ້ານກີບ ທີ່ນຳມາມອບໃຫ້ກັບກະຊວງ ຮສສ ຊຸດນີ້ແມ່ນໄດ້ຈາກການລະດົມຂອງທຸກໜ່ວຍ ງານຂອງແຂວງ, ພ້ອມດຽວກັນນັ້ນກໍຍັງໄດ້ມີການລະດົມຈາກບໍລິສັດໃຫຍ່ທີ່ເຂົ້າມາລົງທຶນພາຍໃນແຂວງກໍຄືບໍລິສັດແຟເຊັດພັດທະນາແຫຼ່ງທ່ອງທ່ຽວທຳມະຊາດຈຳກັດ (ນໍ້າກັດຢໍລະປາ), ຊຶ່ງໄດ້ເປັນເຄື່ອງອຸປະໂພກ ແລະບໍລິໂພກຈຳນວນ 200 ຖົງ ລວມເປັນເງິນ 22 ລ້ານກີບ ເພື່ອນຳມາຊ່ວຍເຫຼືອພໍ່ແມ່ປະຊາຊົນຜູ້ປະສົບໄພນໍ້າຖ້ວມໃນແຂວງພາກກາງ ແລະພາກໃຕ້, ທັງນີ້ກໍເພື່ອແນໃສ່ປັບປຸງຊີວິດການເປັນຢູ່ຂອງເຂົາເຈົ້າໃຫ້ກັບຄືນສູ່ສະພາບປົກກະຕິໂດຍໄວ.

 ສະເພາະປີນີ້ ອຸດົມໄຊ ເປັນແຂວງໜຶ່ງທີ່ໄດ້ຮັບຜົນກະທົບໜັກໜ່ວງທັງໄພນໍ້າຖ້ວມໂດຍສະເພາະໄລຍະຜ່ານມາຢູ່ເມືອງແບງຖືກນໍ້າຖ້ວມຢ່າງໜັກ, ເນື້ອທີ່ທຳການຜະ ລິດ ແລະເຮືອນຊານປະ ຊາຊົນກໍຖືກເສຍຫາຍເຊັ່ນກັນ, ແຕ່ທີ່ຮ້າຍແຮງກວ່ານັ້ນປະຈຸບັນອຸດົມໄຊ ພັດພວມປະເຊີນໜ້າກັບສະພາບໄພແຫ້ງແລ້ງ, ເນື້ອທີ່ກະສິກຳຕົ້ນຕໍແມ່ນເຂົ້ານາ, ພືດຜັກຕ່າງໆຂາດແຄນນໍ້າ, ນອກຈາກນັ້ນບັນຫາສັດຕູພືດຄື: ບົ້ງຝູງສາລີໄດ້ລະບາດໜັກໃນຫຼາຍເມືອງຂອງແຂວງ, ຊຶ່ງຍັງບໍ່ລວມກັບພະຍາດອະຫິວາໝູອາຟຣິກາ ທີ່ກຳລັງລະບາດ ແລະໄດ້ທຳລາຍ ໝູໄປແລ້ວຈຳນວນຫຼາຍສົມຄວນ, ຈາກ ສະພາບໄພນໍ້າຖ້ວມ ແລະໄພແຫ້ງແລ້ງ ທີ່ເກີດຂຶ້ນພາຍໃນແຂວງສົ່ງຜົນໃຫ້ປະ ຈຸບັນອຸດົມໄຊຂາດແຄນເຂົ້າ ແລະພວມຕ້ອງການ 602 ໂຕນ ເພື່ອມາບັນເທົາທຸກແກ່ພໍ່ແມ່ປະຊາຊົນພາຍໃນແຂວງ, ທ່ານຮອງເຈົ້າແຂວງໃຫ້ຮູ້ຕື່ມ.

  ທ່ານ ນາງ ໃບຄຳ ຂັດທິຍະ ກ່າວວ່າ: ສຳລັບເຄື່ອງອຸປະໂພກ ແລະ ບໍລິໂພກທີ່ໄດ້ຈາກການລະດົມຂອງທຸກພາກສ່ວນ, ທາງກະຊວງແມ່ນໄດ້ມີການຈັດສົ່ງທຸກໆທ້າຍອາທິດ ເພື່ອສົ່ງໄປໃຫ້ບັນ ດາແຂວງທີ່ໄດ້ຮັບຜົນກະທົບໃນເຂດພາກກາງ ແລະພາກໃຕ້, ແຕ່ເຖິງຢ່າງໃດກໍຕາມຄວາມຕ້ອງການອັນຮີບດ່ວນຂອງພວກເຂົາເຫຼົ່ານັ້ນຍັງແມ່ນເຂົ້າກິນ, ສ່ວນໃນການແກ້ໄຂ ຫຼືຄວາມຕ້ອງການໃນຕໍ່ໜ້າແມ່ນການປັບປຸງພື້ນຖານໂຄງລ່າງທາງດ້ານໄຟຟ້າ, ນໍ້າປະປາ, ຖະໜົນຫົນທາງ, ໂຮງຮຽນ, ໂຮງໝໍ, ຕະຫຼອດຮອດແນວພັນເຂົ້າ, ແນວພັນພືດ ແລະຢາປາບສັດຕູພືດ, ຢາປົວພະຍາດແມ່ນຍັງຕ້ອງການຫຼາຍເພື່ອໃຊ້ເຂົ້າໃນການຟື້ນຟູຊີວິດການເປັນຢູ່ຂອງເຂົາເຈົ້າໃຫ້ກັບຄືນສູ່ສະພາບປົກກະຕິໃນຕໍ່ໜ້າ.​

----------------

ໜັງສືພິມເສດຖະກິດ-ສັງຄົມ

แชร์