ໄຊຍະຍັງພົບພະຍາດອະຫິວາໝູ ລະບາດຢູ່ບ້ານໂຮງໄຊ ເມືອງເງິນ

  ຕາມການລາຍງານຈາກຫ້ອງການກະສິກໍາ ແລະ ປ່າໄມ້ເມືອງເງິນ ແຂວງໄຊຍະບູລີ ໄດ້ໃຫ້ຮູ້ວ່າ: ໃນວັນທີ 21 ກັນຍາຜ່ານມານີ້, ໄດ້ຮັບແຈ້ງຈາກອໍານາດການປົກ ຄອງບ້ານໂຮມໄຊ ວ່າ ມີໝູຕາຍຈໍານວນ 17 ໂຕໃນວັນດຽວ ແລະວັນຕໍ່ມາມີໝູທະຍອຍຕາຍອີກ 23 ໂຕ, ລວມໝູຕາຍເອງ 40 ໂຕ, ຈາກນັ້ນທີມງານລ້ຽງສັດຈາກພະແນກກະສິກໍາ ແລະປ່າໄມ້ແຂວງ ແລະຫ້ອງການກະສິກໍາ-ປ່າໄມ້ເມືອງໄດ້ລົງກວດກາ, ເກັບກໍາຂໍ້ມູນ ແລະໄດ້ນໍາເອົາເລືອດຂອງໝູທີ່ຕາຍ ສົ່ງໄປວິໄຈຢູ່ສູນວິໄຈພະ ຍາດສັດແຫ່ງຊາດ, ຜົນວິໄຈເຫັນ ວ່າມີເຊື້ອພະຍາດອະຫິວາໝູອາຟຣິກາ, ດັ່ງນັ້ນວິຊາການທີມງານລ້ຽງສັດຈາກແຂວງ ແລະອໍານາດການປົກຄອງເມືອງເງິນຈຶ່ງໄດ້ລົງເຜີຍ ແຜ່ຜົນຮ້າຍຂອງພະ ຍາດດັ່ງກ່າວ, ພ້ອມທັງສືກສາອົບຮົມການເມືອງແນວຄິດໃຫ້ປະຊາຊົນໃຫ້ເຂົ້າໃຈຕໍ່ເຫດການດັ່ງກ່າວ, ເມື່ອປະຊາຊົນເຂົ້າໃຈແຈ້ງແລ້ວກໍໄດ້ໃຫ້ການຮ່ວມມື ແລະພ້ອມກັນທໍາລາຍໝູໃນຂອບເຂດບ້ານດັ່ງກ່າວ, ດ້ວຍການຂ້າໝູ ແລະ ຂຸດຂຸມຝັງໝູທັງໝົດ.

  ບ້ານໂຮມໄຊ ມີປະຊາຊົນລ້ຽງໝູທັງໝົດ 57 ຄອບຄົວ, ມີໝູທັງໝົດ 197 ໂຕ, ໃນນີ້ມີໝູຕາຍເອງແຕ່ວັນທີ 21 ກັນຍາ ຫາ 2 ຕຸລາ ຈໍານວນ 40 ໂຕ, ປະຊາ ຊົນຂ້າຄົວກິນ 3 ໂຕ, ລະຫວ່າງວັນທີ 1-3 ຕຸລາ, ວິຊາການຂ້າທໍາລາຍຖິ້ມ 154 ໂຕ.

  ດ້ວຍຄວາມເປັນຫ່ວງເປັນໄຍຂອງອໍານາດການປົກຄອງແຂວງ, ໃນວັນທີ 3 ຕຸລາ ທ່ານ ພົງສະຫວັນ ສິດທະວົງ ພ້ອມດ້ວຍທີມງານໄດ້ລົງກວດກາເບິ່ງສະຖານທີ່ເກີດພະຍາດ, ພ້ອມທັງໃຫ້ກໍາລັງໃຈປະຊາຊົນທີ່ໄດ້ຮັບຜົນກະທົບ ແລະ ພະນັກງານວິຊາການທີ່ລົງປະຕິບັດໜ້າທີ່ຕົວຈິງຢູ່ພື້ນທີ່ເກີດພະຍາດ.

  ໂອກາດດັ່ງກ່າວທ່ານເຈົ້າແຂວງຍັງໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງໃຫ້ຄວາມຮ່ວມມືໃນການທໍາລາຍໝູຖິ້ມ, ບໍ່ໃຫ້ເອົາໝູໄປຊຸກເຊື່ອງ, ບໍ່ໃຫ້ມີແນດຄິດປໍລະປັກ ຫຼື ຄຽດໃຫ້ກັບພະນັກງານທີ່ ປະຕິບັດໜ້າທີ່ດັ່ງກ່າວ, ທັງນີ້ ກໍເພື່ອກໍາ ຈັດພະຍາດນີ້ໃຫ້ໝົດໄປ, ບໍ່ໃຫ້ມີການ ແຜ່ລາມໄປສູ່ເຂດອື່ນ ແລະຫ້າມປະຊາຊົນລ້ຽງໝູໃນໄລຍະທີ່ມີພະຍາດລະບາດເທື່ອ,ຮຽກຮ້ອງມາຍັງພະນັກງານທີ່ກ່ຽວຂ້ອງຂອງແຂວງ ແລະເມືອງຈົ່ງສືບຕໍ່ປູກຈິດສໍານຶກໃຫ້ປະຊາຊົນມີຄວາມໂລ່ງໃຈຕໍ່ເຫດການທີ່ເກີດຂຶ້ນ, ສືບຕໍ່ນໍາພາປະຊາຊົນພາຍໃນບ້ານເຮັດອານາໄມ ແລະຂ້າເຊື້ອຕາມຄອກສັດ, ດ້ວຍການພົ່ນຢາຂ້າເຊື້ອ, ໂຮຍປູນຂາວໃຫ້ຖົ່ວເຖິງບໍລິເວນບ້ານ, ບ່ອນທີ່ໝູອາໄສຢູ່, ສືບຕໍ່ເຝົ້າລະວັງ ແລະອອກແຈ້ງການບ້ານດັ່ງກ່າວເປັນເຂດສີແດງ, ເຝົ້າ ລະວັງເຂດເຫຼືອງມົນທົນ 3 ກິໂລແມັດ ແລະບ້ານທົ່ວໄປຢ່າງໃກ້ສິດ.

--------------------

ຂຽນໂດຍ: ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์