ລັດ ແລະເອກະຊົນຫາລືສົ່ງເສີມທຸລະກິດທ່ອງທ່ຽວ

   ສະພາການຄ້າ ແລະອຸດສາຫະກໍາແຫ່ງຊາດລາວ (ສຄອຊ) ຮ່ວມກັບກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ (ຖວທ) ໄດ້ຈັດກອງປະຊຸມປຶກສາຫາລືສົ່ງ ເສີມທຸລະກິດທ່ອງທ່ຽວຂຶ້ນໃນວັນທີ 4 ຕຸລາ 2019 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖວທ, ທ່ານ ດາວວອນ ພະຈັນທະວົງ ຮອງປະທານ ສຄອຊ, ມີກົມໂຄສະນາທ່ອງທ່ຽວ, ກົມຄຸ້ມຄອງການທ່ອງທ່ຽວ, ຜູ້ປະກອບການທຸລະກິດທ່ອງທ່ຽວ ແລະ ພາກ ສ່ວນກ່ຽວຂ້ອງເຂົ້າຮ່ວມ.  

 ທ່ານ ສະຫວັນຄອນ ຣາຊມຸນຕີ ກ່າວວ່າ: ກອງປະຊຸມຄັ້ງນີ້ ຈັດຂຶ້ນເພື່ອ ເປັນການປຶກສາຫາລືຮ່ວມໃນການຊອກຫາວິທີທາງແກ້ໄຂບັນຫາທີ່ມີຢູ່ໃນປະຈຸບັນ ແລະເພື່ອສົ່ງເສີມວຽກງານ ການທ່ອງທ່ຽວຂອງ ສປປ ລາວ ໃຫ້ມີ ການຂະຫຍາຍຕົວຢ່າງມີປະສິດທິຜົນ ແລະສາມາດດຶງດູດນັກທ່ອງທ່ຽວຈາກ ຕ່າງປະເທດເຂົ້າມາທ່ຽວຊົມໃນປະເທດລາວໃຫ້ນັບມື້ຫຼາຍຂຶ້ນ,ຊຶ່ງການທ່ອງທ່ຽວແມ່ນຂະແໜງການໜຶ່ງທີ່ມີບົດບາດສໍາຄັນທີ່ສຸດໃນການປະກອບສ່ວນຕໍ່ການພັດທະນາເສດຖະກິດຂອງປະເທດ, ສ້າງແຫຼ່ງລາຍຮັບເງິນຕາເຂົ້າສູ່ປະເທດ, ສ້າງອາຊີບໃຫ້ກັບປະຊາຊົນທ້ອງຖິ່ນ ແລະສາມາດຫຼຸດຜ່ອນຄວາມທຸກຍາກ ໄດ້, ພາຍຫຼັງທີ່ລັດຖະບານປະກາດໃຫ້ປີ 2018 ເປັນປີທ່ອງທ່ຽວລາວນັ້ນເຫັນວ່າມີຈໍານວນນັກທ່ອງທ່ຽວເພີ່ມຂຶ້ນ 8,2% ຈາກ 3,8 ລ້ານຄົນໃນປີ 2017 ມາເປັນ 4,2 ລ້ານຄົນ ໃນປີ 2018 ຊຶ່ງສາມາດສ້າງລາຍຮັບໄດ້ເຖິງ 800 ລ້ານໂດລາ ແລະ ເມື່ອທຽບກັບລາຍຮັບຈາກການສົ່ງອອກຂອງປະເທດການທ່ອງທ່ຽວແມ່ນສ້າງລາຍຮັບໄດ້ເປັນອັນດັບຕົ້ນໆຮອງລົງມາພຽງແຕ່ຂະແໜງ ບໍ່ແຮ່ ແລະໄຟຟ້າເທົ່ານັ້ນ, ຢ່າງໃດກໍຕາມຕົວເລກການທ່ອງທ່ຽວດັ່ງກ່າວຖືວ່າຍັງຕໍ່າກວ່າລັດຖະບານຕັ້ງເປົ້າໄວ້ ຄືໃນປີ 2018 ຈະດຶງດູດນັກທ່ອງທ່ຽວໃຫ້ໄດ້ 5 ລ້ານຄົນ ແລະລາຍຮັບໃຫ້ໄດ້ 900 ລ້ານໂດລາ ແລະຍັງເປັນຕົວເລກທີ່ຕໍ່າຫຼາຍຖ້າທຽບໃສ່ຈໍານວນນັກທ່ອງທ່ຽວເຂົ້າປະເທດໃກ້ຄຽງ.

  ທັງນີ້ກໍໍເນື່ອງມາຈາກຫຼາຍສາເຫດທີ່ກໍ່ໃຫ້ເປັນບັນຫາອຸປະສັກຕໍ່ການພັດທະນາການທ່ອງທ່ຽວໂດຍສະເພາະແມ່ນການສ້າງນະໂຍບາຍດຶງດູດນັກທ່ອງທ່ຽວຊຶ່ງບໍ່ຄວນເບິ່ງແຕ່ປະລິມານເທົ່ານັ້ນແຕ່ຍັງຕ້ອງເບິ່ງຫຼາຍໆດ້ານເປັນຕົ້ນແມ່ນຜະລິດຕະພັນທ່ອງທ່ຽວທີ່ມີເອກະລັກຈຸດພິເສດທ້ອງຖິ່ນ, ສະຖານທີ່ທ່ອງທ່ຽວ ແລະອື່ນໆ ຊຶ່ງເປັນສິ່ງທີ່ສ້າງເງື່ອນໄຂຈູງໃຈໃຫ້ນັກທ່ອງທ່ຽວ, ນອກຈາກນີ້ບັນດາຜູ້ປະກອບການຍັງໄດ້ຍົກໃຫ້ເຫັນເຖິງສະພາບແວດລ້ອມການດໍາເນີນທຸລະກິດທ່ອງທ່ຽວຊຶ່ງເປັນອຸປະສັກຫຼາຍຢ່າງເປັນຕົ້ນແມ່ນການຂາດເຂີນດ້ານງົບປະມານໃນການສົ່ງເສີມທ່ອງທ່ຽວຈາກພາກລັດ, ການແບ່ງຂັ້ນຄຸ້ມຄອງທີ່ຍັງບໍ່ຊັດເຈນ, ຂາດການປຶກສາຫາລື ແລະການວາງແຜນຍຸດທະສາດຮ່ວມກັນລະຫວ່າງພາກລັດ ແລະເອກະຊົນ,ຂາດການອໍານວຍຄວາມສະດວກໃຫ້ກັບບໍລິສັດນໍາທ່ຽວ,ການເກັບເງິນເຂົ້າກອງທຶນສົ່ງເສີມການທ່ອງ ທ່ຽວຍັງບໍ່ເປັເອກະພາບກັນທົ່ວປະເທດ ແລະ ບັນຫາອື່ນໆອີກຊຶ່ງເຫັນວ່າຜູ້ປະກອບການຄວນໄດ້ຮັບການພິຈາລະນາແກ້ໄຂຢ່າງຮີບດ່ວນເພື່ອສົ່ງເສີມການທ່ອງທ່ຽວ ແລະ ເພື່ອເຮັດໃຫ້ຜູ້ປະກອບການສາມາດດໍາເນີນທຸລະກິດໄດ້ຢ່າງສະດວກ ແລະ ສອດຄ່ອງກັບສະພາບການແຂ່ງຂັນໃນຂົງເຂດພາກພື້ນຕໍ່ກັບບັນຫາດັ່ງກ່າວລັດຖະ ບານກໍຄືກະຊວງ ຖວທ ຈະເປັນໃຈກາງປະສານງານກັບຂະແໜງການກ່ຽວຂ້ອງເພື່ອພິຈາລະນາແກ້ໄຂຂໍ້ຫຍຸ້ງຍາກດັ່ງກ່າວ ແລະເພື່ອເປັນການສົ່ງເສີມການທ່ອງທ່ຽວໃຫ້ເປັນຮູບປະທໍາ.

---------------------

ຂ່າວ: ກິ່ງລັດຕະນະ

 

แชร์