ມອບລາງວັນທຸລະກິດອາຊຽນດີເດັ່ນຂອງລາວປະຈຳປີ 2019

  ວັນທີ 4 ຕຸລາຜ່ານມາທີ່ນະຄອນຫຼວງວຽງຈັນ ສະພາການຄ້າ ແລະອຸດສາຫະກຳແຫ່ງຊາດລາວໄດ້ຈັດງານລ້ຽງມອບລາງວັນທຸລະກິດອາຊຽນດີເດັ່ນຂອງ ສປປ ລາວ ປະຈຳປີ 2019 ໂດຍໃຫ້ກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານນາງ ເຂັມມະນີ ພົນເສນາ ລັດຖະມົນ ຕີ ກະຊວງອຸດສາຫະກຳ ແລະການຄ້າ, ທ່ານ ທະນົງສິນ ກັນລະຍາ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວພ້ອມດ້ວຍບັນດານັກທຸລະກິດແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ທະນົງສິນ ກັນລະຍາ ກ່າວວ່າ: ການຈັດງານລ້ຽງມອບລາງວັນທຸລະກິດອາຊຽນດີເດັ່ນຂອງ ສປປ ລາວ ປະຈຳປີ2019 (ASEAN Business Award Laos-ABA Laos 2019) ເພື່ອເປັນການສ້າງແຮງບັນດານ ໃຈໃຫ້ແກ່ຫົວໜ່ວຍທຸລະກິດລາວທີ່ທຸ້ມ ເທເຫື່ອແຮງ, ສະຕິປັນຍາ ແລະອື່ນໆຕະຫຼອດປີແລະຫຼາຍປີຜ່ານມາ, ຊຶ່ງການແຂ່ງຂັນທຸລະກິດພາຍໃນໆມາດຕະຖານຂອງອາຊຽນຍັງເປັນແຮງພັກດັນໃຫ້ແກ່ຫົວໜ່ວຍທຸລະກິດລາວໄດ້ຍົກສູງປະສິດທິຜົນການຜະລິດ ແລະບໍລິ ການນະວັດຕະກຳການຄຸ້ມຄອງບຸກຄະລາກອນ, ການເຕີບໃຫຍ່ຂະຫຍາຍຕົວ ແລະການປະກອບສ່ວນຊ່ວຍເຫຼືອສັງຄົມອີກດ້ວຍ

  ພ້ອມນັ້ນຍັງເປັນການເປີດໂອກາດໃຫ້ແກ່ຫົວໜ່ວຍທຸລະກິດລາວທີ່ໄດ້ຮັບລາງວັນທຸລະກິດພາຍໃນປະເທດແລ້ວຍັງສາມາດສືບຕໍ່ຢື່ນສະໝັກເພື່ອເຂົ້າຮ່ວມການແຂ່ງຂັນຊີງລາງວັນໃນລະດັບພາກພື້ນກໍຄືລາງວັນທຸລະກິດດີເດັ່ນອາຊຽນພູມີພາກທີ່ຈະໄດ້ຈັດຂຶ້ນ ແລະເປັນເຈົ້າພາບໂດຍສະພາທີ່ປືກສາທຸລະກິດອາຊຽນແຫ່ງລາຊະອານາຈັກໄທ ໃນວາລະກອງປະຊຸມສຸດຍອດອາຊຽນໃນຕົ້ນເດືອນພະຈິກ 2019 ທີ່ຈະມາເຖິງນີ້.

 ທ່ານ ທະນົງສິນ ກັນລະຍາ ກ່າວຕື່ມວ່າ: ຈຸດປະສົງການແຂ່ງຂັນຕັ້ງນີ້ໄດ້ແນໃສ່ການສະໜັບສະໜູນ ແລະເສີມສ້າງໃຫ້ລາວໄດ້ມີສິນຄ້າ, ການບໍລິການຈາກພາຍໃນປະເທດເປັນຫຍີ່ຫໍ້ເປັນກາຂອງລາວຫຼາກຫຼາຍຂຶ້ນມີຄຸນນະພາບ, ມາດຖານທີ່ແນ່ນອນ ແລະດີຂຶ້ນເລື້ອຍໆ ມີເອກະລັກສົ່ງເສີມທ້ອງຖິ່ນໂຄສະນາປະເທດ, ໂຄສະນາຄົນລາວເມືອງລາວ, ຊ່ວຍສ້າງວຽກສ້າງງານຫຼຸດຜ່ອນຄວາມທຸກຍາກ, ຊ່ວຍປະກອບພາສີ, ປະກອບ ຈີດີພີແຫ່ງຊາດໃນອັດຕາສ່ວນທີ່ສູງ ກວ່າເກົ່າຈາກພາກທຸລະກິດທັງຈຸນລະພາກ, ນ້ອຍ, ກາງແລະໃຫຍ່.

  ຊຶ່ງບັນດາບໍລິສັດທີ່ໄດ້ຮັບລາງວັນທຸລະກິດອາຊຽນດີເດັ່ນຂອງ ສປປ ລາວ ປະຈຳປີ 2019 ມີທັງໝົດ 18 ບໍລິສັດໃນຂະແໜງການຕ່າງໆເປັນຕົ້ນຂະແໜງກະສິກຳ, ອາຫານ ແລະເຄື່ອງດື່ມ, ການທ່ອງທ່ຽວ, ເພື່ອສັງຄົມແບບຍືນຍົງ, ດ້ານນະວັດຕະກຳແລະອື່ນໆ.

  ແນວໃດກໍດີໂຮງງານຜະລິດນໍ້າດື່ມ ແລະນໍ້າກ້ອນໂລມາຄຳແມ່ນໜຶ່ງໃນ 18 ຫົວໜ່ວຍທຸລະກິດທີ່ໄດ້ຮັບລາງວັນຄັ້ງນີ້ຊຶ່ງເປັນລາງວັນປະກອບສ່ວນໃນການພັດທະນາຕໍ່ສັງຄົມດີເດັ່ນ ຊຶ່ງທ່ານ ເກຍ ອູ໊ສິດທິເດດ ເຈົ້າຂອງໂຮງງານ ກ່າວວ່າ: ລາງວັນນີ້ແມ່ນຄວາມພາກ ພູມໃຈຂອງພວກເຮົາທີ່ໃນຊຸມປີຜ່ານມານອກຈາກດຳເນີນທຸລະກິດເພີ່ມຜົນ ກຳໄລແລ້ວໂຮງງານຍັງໄດ້ເສຍສະຫຼະ ກຳລັງກາຍ ແລະວັດຖຸປັດໄຈເປັນເງິນ ຈຳນວນ 16 ຕື້ກວ່າກີບ ປະກອບສ່ວນເປັນຕົວຫຼັກຕົວຕີໃນການພັດທະນາຊີວິດຄົນຂໍທານຢູ່ບ້ານຄໍາປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະ ຫວັນນະເຂດ ໄດ້ກາຍເປັນຜູ້ຮູ້ສ້າງຢູ່ທຳກິນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ ແລະໃນຕໍ່ໜ້າພວກເຮົາຍັງຈະສືບຕໍ່ຊ່ວຍເຫຼືອສັງຄົມໃນດ້ານຕ່າງໆຕາມຄວາມຮຽກຮ້ອງຕ້ອງການ ແລະທ່າແຮງຂອງໂຮງງານ.

--------------------

ໜັງສືພິມເສດຖະກິດ-ສັງຄົມ

แชร์