ນາຍົກຮຽກຮ້ອງທຸກພາກສ່ວນ ຮ່ວມເອົາໃຈໃສ່ 8 ບັນຫາ ພັດທະນາການສຶກສາລາວ

  ທີ່ນະຄອນຫຼວງວຽງຈັນ ໃນວັນທີ 4 ຕຸລາ ກະຊວງສຶກສາທິການ ແລະກີລາໄດ້ຈັດພິທີສະເຫຼີມສະຫຼອງວັນຄູແຫ່ງຊາດຄົບຮອບ 25 ປີຂຶ້ນໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມນີ້ກໍມີທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກີລາ, ບັນດາທ່ານຮອງລັດຖະ ມົນຕີ, ຫົວໜ້າກົມ, ຄູ ອາຈານ ແລະນັກຮຽນນັກສຶກສາອ້ອມ ຂ້າງນະຄອນຫຼວງວຽງຈັນເຂົ້າຮ່ວມ.

   ທ່ານນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາກ່າວວ່າ: ນັບແຕ່ປີ 1994 ເປັນຕົ້ນມາຮອດວັນທີ 7 ຕຸລາຂອງແຕ່ລະປີທົ່ວປະ ເທດຈະມີການຈັດຕັ້ງພິທີສະເຫຼີມສະຫຼອງວັນຄູແຫ່ງຊາດຂຶ້ນເພື່ອເປັນການປຸກລະດົມຈິດໃຈໃຫ້ທົ່ວສັງຄົມໄດ້ສະແດງອອກເຖິງການສົ່ງເສີມ, ການເຊີດຊູບົດບາດ ແລະກຽດສັກສີຂອງຄູ-ອາຈານໃຫ້ສູງຂຶ້ນ, ທັງເປັນການໂຄສະນາເຜີຍແຜ່ຜົນງານຄຸນງາມຄວາມດີຂອງຄູ-ອາຈານ ໃຫ້ທຸກຄົນໃນສັງຄົມໄດ້ຮັບຮູ້ສະແດງອອກເຖິງຄວາມກະ ຕັນຍູ, ຮູ້ບຸນຄຸນຕໍ່ຄູ-ອາຈານທີ່ໄດ້ບາກບັ່ນສິດສອນໃຫ້ຄວາມຮູ້ແກ່ຕົນທັງໃນອະດີດກໍ່ຄືໃນປະຈຸບັນ.

ຫຼັງຈາກນີ້ໃນພິທີທ່ານ ທອງລຸນ ສີສຸລິດ, ກໍໄດ້ເປັນກຽດມີຄຳເຫັນໂອ້ລົມບາງຕອນວ່າ: “ຢາກພັດປະເທດຊາດໃຫ້ມີຄວາມກ້າວໜ້າຕ້ອງພັດທະນາຄົນເພາະວ່າຄົນເປັນກຳລັງແຮງໃນການຂັບເຄື່ອນການພັດທະນາປະເທດຊາດ ແລະ ຢາກໄດ້ຊັບພະຍາກອນມະນຸດທີ່ດີກໍ່ຕ້ອງມີລະບົບການສຶກສາທີ່ດີ, ມີການປະຕິຮູບ ແລະ ການປ່ຽນແປງໃຫ້ທັນຍຸກທັນສະໄໝ” ພາລະກິດການສຶກສາເປັນພາລະກິດຂອງທົ່ວປວງຊົນ, ມີແຕ່ຂະແໜງການສຶກສາທິການ ແລະກີລາຈະເຮັດຜູ້ດຽວບໍ່ໄດ້ຕ້ອງໄດ້ຮັບການສະໜັບ ສະໜູນ, ຊ່ວຍເຫຼືອຈາກທຸກພາກສ່ວນໃນສັງຄົມຈຶ່ງຈະເຮັດໃຫ້ການສຶກສາສາມາດເຕີບໃຫຍ່ຂະຫຍາຍຕົວ ແລະ ມີຄຸນນະພາບສູງຂຶ້ນໄດ້.

  ແນວໃດກໍດີໃນນາມພັກ-ລັດຖະບານທ່ານນາຍົກໄດ້ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງໃຫ້ເອົາໃຈໃສ່ດັ່ງນີ້:

   1. ໃຫ້ຜູ້ບໍລິຫານການສຶກສາທຸກຂັ້ນເພີ່ມທະວີຄວາມຮັບຜິດຊອບນໍາພາ-ຊີ້ນໍາວຽກງານສຶກສາ ແລະກີລາໃຫ້ແທດເຖິງກວ່າເກົ່າ, ສູ້ຊົນປະຕິບັດແຜນຍຸດທະສາດ       ການສຶກສາ ແລະກີລາຂອງກະຊວງ ແລະຂອງແຂວງ ແລະເປົ້າໝາຍການສຶກສາເພື່ອການພັດທະນາແບບຍືນຍົງໃຫ້ບັນລຸຜົນຕາມລະດັບຄາດໝາຍທີ່ວາງໄວ້.

   2. ພະນັກງານບໍານານຂະແໜງການສຶກສາ,ຜູ້ຊົງຄຸນວຸດທິເພີ່ມທະວີເອົາໃຈໃສ່ປະກອບສ່ວນໃຫ້ຄໍາຄິດຄໍາເຫັນໃນການພັດທະນາການສຶກສາຢູ່ໃນຂັ້ນຂອງຕົນ, ຊຸກ     ຍູ້ ແລະປຸກລະດົມຊຸມຊົນປະກອບສ່ວນເຂົ້າໃນວຽກງານການສຶກສາໃຫ້ນັບມື້ນັບຫຼາຍຂຶ້ນ.

   3. ພະນັກງານຄູ-ອາຈານສອນທັງໝົດໃນທົ່ວປະເທດຈົ່ງໄດ້ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ສູງຂຶ້ນ, ເຄົາລົບນັບຖື ແລະ ປະຕິບັດລະບຽບ ວິໄນ ແລະຄໍາສັ່ງຂອງຂັ້ນເທິງຢ່າງເຂັ້ມງວດ, ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ, ຕ້ານ ແລະສະກັດກັ້ນປາກົດການຫຍໍ້ທໍ້ທີ່ຈະເກີດຂຶ້ນພາຍໃນໂຮງຮຽນ ແລະຖັນແຖວນັກຮຽນ-ນັກສຶກສາ, ຜ່ານຜ່າຄວາມຫຍຸ້ງຍາກເພື່ອສໍາເລັດໜ້າທີ່ທີ່ໄດ້ຮັບມອບໝາຍ.

   4. ພາກສ່ວນທຸລະກິດ, ອົງການຈັດຕັ້ງສັງຄົມ, ຄູ່ຮ່ວມພັດທະນາຈົ່ງໄດ້ເພີ່ມທະວີການປະກອບສ່ວນ ແລະໃຫ້ການອຸດໜູນຊ່ວຍເຫຼືອວຽກງານການສຶກສາໃຫ້ນັບມື້ ຫຼາຍຂຶ້ນ.

   5. ອະດີດນັກສຶກສາຂອງທຸກໆສະຖາບັນການສຶກສາຈົ່ງລະນຶກເຖິງບຸນຄຸນຂອງຄູ ແລະ ສະຖາບັນການສຶກສາທີ່ເປັນບ່ອນໃຫ້ຄວາມຮູ້ ແລະ ສຶກສາອົບຮົມແກ່ຕົນ, ພ້ອມກັນຊອກທຸກວິທີທາງເພື່ອຊອກແຫຼ່ງທຶນມາຊ່ວຍພັດທະນາສະຖານສຶກສາບ່ອນທີ່ຕົນໄດ້ເຄີຍຮຽນຮູ້ໃຫ້ນັບມື້ນັບໄດ້ຮັບການພັດທະນາດີຂຶ້ນ ແລະມີພື້ນຖານວັດຖຸອຸປະກອນຮັບໃຊ້ການຮຽນ-ການສອນໃຫ້ຄົບຖ້ວນສົມບູນກວ່າເກົ່າ.

  6. ນັກຮຽນ-ນັກສຶກສາໃນທຸກລະດັບຈົ່ງເພີ່ມທະວີຄວາມຮັບຜິດຊອບ ແລະ ຕັ້ງໃຈຄົ້ນຄວ້າຮໍ່າຮຽນດ້ວຍຕົນເອງໃຫ້ຫຼາຍຂຶ້ນ, ໃຫ້ມີຄວາມຮູ້ຄວາມສາມາດ ແລະຮຽນໃຫ້ມີອາຊີບທີ່ໝັ້ນຄົງ, ກຽມພ້ອມປະກອບສ່ວນປົກປັກຮັກສາ ແລະສ້າງສາພັດທະນາປະເທດຊາດອັນແສນຮັກຂອງພວກເຮົາ.

  7. ພໍ່ແມ່ຜູ້ປົກຄອງນັກຮຽນ-ນັກສຶກສາຈົ່ງພ້ອມກັນຊ່ວຍເຫຼືອຕັກເຕືອນ, ບອກສອນ, ສຶກສາອົບຮົມ ແລະສົ່ງເສີມລູກຫຼານຂອງຕົນໃຫ້ໄດ້ເຂົ້າໂຮງຮຽນ, ຮຽນຕໍ່ໃຫ້ສູງຂຶ້ນຕາມຄວາມສາມາດຂອງເຂົາເຈົ້າ, ຮຽນຈົບແລ້ວໃຫ້ມີວິຊາຊີບ, ມີວຽກເຮັດງານທໍາ, ມີລາຍຮັບລ້ຽງກຸ້ມຕົນເອງ ແລະຄອບຄົວ, ພ້ອມທັງເອົາໃຈໃສ່ເບິ່ງແຍງດູແລເຂົາເຈົ້າບໍ່ໃຫ້ໄປຫຍຸ້ງກັບສິ່ງເສບຕິດ, ຂີ້ລັກ, ເປັນນັກເລງອັນຕະພານ ແລະອື່ນໆ.

  8. ສະພາບການເງິນ ແລະງົບປະມານແມ່ນເປັນຕົວຊີ້ວັດທີ່ສໍາຄັນ, ຊຶ່ງສະແດງໃຫ້ເຫັນເຖິງຄວາມຮັບຜິດຊອບຂອງລັດຖະບານໃນການພັດທະນາການສຶກສາ ແລະກີ ລາກໍ່ຄືໃນການພັດທະນາຊັບພະຍາກອນມະນຸດສະນັ້ນ, ຂໍເນັ້ນຕື່ມກ່ຽວກັບການຈັດສັນງົບປະມານລົງທຶນໃສ່ການພັດທະນາຊັບພະຍາກອນມະນຸດໃຫ້ເພີ່ມຂຶ້ນອີກຕື່ມ, ໂດຍສະເພາະແມ່ນສຸມໃສ່ການພັດທະນາຄູໃຫ້ນັບມື້ນັບມີຄຸນນະພາບສູງຂຶ້ນ.

------------------

ໜັງສືພິມເສດຖະກິດ-ສັງຄົມ

แชร์