ວິທະຍາໄລຄູສາລະວັນ ສະຫຼອງວັນຄູແຫ່ງຊາດ

   ເພື່ອລະນຶກເຖິງຄຸນງາມຄວາມດີຂອງນາຍຄູຄໍາກໍຄືຄູລາວ ໃນທົ່ວປະເທດ ໃນວັນທີ 2 ຕຸລາຜ່ານມາທີ່ສະໂມສອນວິທະຍາໄລຄູສາລະວັນໄດ້ຈັດພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 25 ປີ ໃຫ້ກຽດເປັນປະທານຂອງທ່ານ ຄຳຈັນ ແຈ່ມສະໝອນປະທານກວດກາພັກ,ຫົວໜ້າພະແນກກວດກາລັດ, ທ່ານ ສຸລິດ ສຸ ລິວົງ ຜູ້ອຳນວຍການວິທະຍາໄລຄູສາລະວັນ ພ້ອມດ້ວຍພະນັກງານລັດຖະກອນວິທະຍາໄລຄູ,ນັກ ຮຽນ-ນັກສຶກສາເຂົ້າຮ່ວມ.

ທ່ານ ສຸລິດ ສຸລິວົງ ໄດ້ເລົ່າຄືນປະຫວັດຄວາມເປັນມາຂອງນາຍຄູຄໍາ, ທົ່ວປະເທດມີໂຮງຮຽນພຽງ 2 ແຫ່ງຄື: ຢູ່ຫຼວງພະບາງ ແລະວຽງຈັນ ມີຄົນລາວຈໍານວນໜ້ອຍທີ່ສຸດທີ່ຈະໄດ້ເຂົ້າຮຽນ ແລະໜຶ່ງໃນນັ້ນມີຄົນລາວຊື່ວ່າ:ທ້າວຄໍາໄດ້ ຮຽນຈົບຫ້ອງທີ 1 (ປ6) ແລະໄດ້ເຂົ້າຮ່ວມອົບຮົມເປັນຄູ,ຊຶ່ງຖືເປັນຄົນທໍາອິດໃນປະຫວັດສາດ, ຫຼັງ ຈາກສໍາເລັດການອົບຮົມທ້າວຄໍາໄດ້ເຂົ້າເປັນຄູສອນທີ່ໂຮງຮຽນ ສ້າງຄູສົງວັດຈັນ ໃນວັນທີ 7 ຕຸລາ 1907 ຍ້ອນມີຈິດໃຈຮັກຊາດໃນ ເວລາສິດສອນນາຍຄູຄໍາໄດ້ເອົາໃຈໃສ່ສຶກສາອົບຮົມໃຫ້ພະສົງເປັນຄູຜູ້ຮັກຊາດ, ບໍ່ໃຫ້ຊາດລາວເຊື່ອມສະຫຼາຍກາຍເປັນສັນຊາດຝລັ່ງ,ສະນັ້ນຈຶ່ງໄດ້ກໍານົດເອົາວັນທີ 7ຕຸລາ ຊຶ່ງເປັນວັນເຂົ້າເປັນຄູສອນ ຂອງນາຍຄູຄໍາເປັນວັນຄູແຫ່ງຊາດ ລາວນັບແຕ່ປີ 1994 ເປັນຕົ້ນມາ.

ໃນງານດັ່ງກ່າວໄດ້ມອບໃບຍ້ອງຍໍ້ໃຫ້ຄູ-ອາຈານທີ່ມີຜົນງານ ດີເດັ່ນໃນການຈັດຕັ້ງປະຕິບັດວຽກ ງານການສິດສອນໃນໄລຍະຜ່ານມາ,ໃນນັ້ນໄດ້ຮັບການຍ້ອງຍໍຈາກລັດຖະມົນຕີກະຊວງສຶກສາທິການ ແລະກີລາຈຳນວນ 86 ຄົນ, ຍິງ 42 ຄົນ,ຈາກກົມສ້າງຄູກະຊວງ ສຶກສາທິການ ແລະກີລາຈຳນວນ 25 ຄົນ, ຍິງ 14 ຄົນ,ນັກສຶກສາໄດ້ຮັບການຍ້ອງຍໍຈາກກົມສ້າງຄູກະຊວງສຶກສາທິການ ແລະກີລາຈຳນວນ 3 ຄົນ, ຍິງ 2 ຄົນ ແລະຈາກວິທະຍາໄລຄູສາລະວັນ ຈຳ ນວນ 2 ຄົນ,ນັກສຶກສາຈຳນວນ 5 ຄົນ, ຍິງ 3 ຄົນ.

-------------------------------------------

ພາບ ແລະຂາ່ວຈາກໜັງສືພິມເສດຖະກິດ-ສັງຄົມ

แชร์