ເມືອງບົວລະພາປ່ອຍສັດນໍ້າ-ສັດປ່າຄືນສູ່ທຳມະຊາດ

  ທ້າຍເດືອນກັນຍາທີ່ຜ່ານ ມານີ້ຢູ່ທີ່ຕາດສຽງລື ບ້ານນາ ຕອຍ ບ້ານຫຍ້າແວດ ເມືອງບົວລະພາ ໄດ້ຈັດພິທີປ່ອຍສັດນໍ້າ-ສັດປ່າຄືນສູ່ທຳມະຊາດ ໂດຍພາຍ ໃຕ້ການນຳພາຂອງທ່ານ ແກ້ວ ອຸດອນ ບຸດສິງຂອນ ເຈົ້າເມືອງໆ ບົວລະພາ ແຂວງຄຳມ່ວນ, ພິທີ ຄັ້ງນີ້ ມີຄະນະປະຈຳພັກເມືອງຄະນະພັກເມືອງຫົວໜ້າ, ຮອງຫົວໜ້າ ຫ້ອງການພະນັກງານວິຊາການທີ່ກ່ຽວຂ້ອງພ້ອມດ້ວຍປະທານບໍລິສັດສາຍພູຫຼວງ ແລະທີມງານຕະຫຼອດຮອດບັນດາອົງການຈັດຕັ້ງບ້ານ, ນາຍບ້ານ ແລະພໍ່ແມ່ປະຊາ ຊົນທັງ 2 ບ້ານ ເຂົ້າຮ່ວມເປັນສັກຂີພິຍານນໍາຢ່າງພ້ອມພຽງ.

ສັດນໍ້າ-ສັດປ່າທີ່ມາປ່ອຍໃນຄັ້ງນີ້ມີກະປູ 300 ໂຕ, ກະທ້າງ 10 ໂຕ, ແລນ 3 ໂຕ ແລະບ່າງ 1 ໂຕ ຊຶ່ງສັດນໍ້າ-ສັດປ່າດັ່ງກ່າວ ແມ່ນທາງບໍລິສັດສາຍພູຫຼວງນໍາ ມາເພື່ອປ່ອຍຄືນສູ່ທໍາມະຊາດ, ທັງນີ້ກໍ່ເພື່ອເຮັດໃຫ້ສະຖານທີ່ທ່ອງ ທ່ຽວນໍ້າຕົກຕາດສຽງລືກໍ່ຄືເມືອງບົວລະພາໄດ້ມີຄວາມອຸດົມສົມບູນທາງດ້ານຊີວະນາໆພັນເພື່ອ ດຶງດູດນັກທ່ອງທ່ຽວທັງພາຍໃນ ແລະຕ່າງປະເທດທີ່ເຂົ້າມາທ່ຽວ ຊົມນໍ້າຕົກຕາດສຽງລືໃຫ້ຫຼາຍຂຶ້ນໃນເມື່ອເປີດບໍລິການຢ່າງເປັນທາງການ.

ໃນພິທີທ່ານເຈົ້າເມືອງໆບົວລະພາກໍ່ໄດ້ໂອ້ລົມໃຫ້ທິດຊີ້ນໍາພ້ອມທັງເນັ້ນໜັກໃຫ້ພາກສ່ວນທີ່ກ່ຽວຕະຫຼອດຮອດອົງການຈັດຕັ້ງບ້ານນາຍບ້ານ ແລະພໍ່ແມ່ ປະຊາຊົນພາຍໃນບ້ານຕ້ອງໄດ້ພ້ອມພາກັນປົກປັກຮັກສາສັດ ນໍ້າ-ສັດປ່າເພື່ອເປັນການອະນຸລັກ ແລະເປັນການປູກຈິດສຳນຶກໃຫ້ປະຊາຊົນ ແລະລູກຫຼານຕໍ່ການປົກປັກຮັກສາສິ່ງແວດລ້ອມ ແລະ ສັດນໍ້າ-ສັດປ່າໃຫ້ຄົງຢູ່ກັບປະຊາຊົນຕະຫຼອດໄປ.

------------------

ໜັງສືພິມເສດຖະກິດ-ສັງຄົມ

• 04/10/2019