ເຊີນສໍາຜັດບັນຍາກາດທໍາມະຊາດ ນ້ຳຕົກຕາດມັດທິງ

ແຂວງຜົ້ງສາລີ ເປັນແຂວງທີ່ຕັ້ງຢູ່ເໜືອສຸດໃນປະເທດລາວ, ເປັນເຂດພູດອຍ ແລະເປັນເຂດປ່າໄມ້ປົກຄຸມ, ມີຊາຍແດນຕິດກັບປະເທດຈີນ ແລະ ຫວຽດ ນາມນອກນັ້ນ, ແຂວງຜົ້ງສາລີ ຍັງມີຊັບພະຍາກອນ ທຳມະຊາດ ແລະຊີວະນາໆພັນທີ່ອຸດົມສົມບູນ, ມີແຫຼ່ງທ່ອງທ່ຽວທຳມະຊາດ ແລະ ວັດທະນະທຳຄ່ອຍຕ້ອນຮັບບັນດານັກທ່ອງທ່ຽວທັງພາຍໃນ ແລະ ຕ່າງປະເທດ.

  ນ້ຳຕົກຕາດມັດທິງສະຖານທີ່ທ່ອງທ່ຽວທາງທໍາມະຊາດທີ່ສວຍສົດງົດງາມເພາະເປັນຕາດທີ່ອ້ອມຮອບໄປດ້ວຍຕົ້ນໄມ້ນ້ອຍໃຫຍ່ສີຂຽວ, ຄຽງຂ້າງກັນກໍ່ມີສາຍພູລຽງລະຫຼາດປຽບເໜືອນກໍາແພງ, ຕົວຕາດເອງກໍມີສະເໜແບບບໍ່ຄືໃຜນໍ້າກໍ່ໄຫຼລົງສາດໆສໍາຜັດໄດ້ເຖິງຄວາມເຢັນ ແລະເຫັນໄດ້ເຖິງຄວາມໃສສະ ອາດຕາໂດຍລວມຍັງຄົງຮັກສາໄວ້ທໍາມະຊາດບໍ່ມີຫຍັງປ່ຽນແປງ, ຈິ່ງກາຍເປັນທີ່ນິຍົມຊົມຊອບຂອງບັນດານັກທ່ອງທ່ຽວທັງພາຍໃນ ແລະ ຕ່າງປະເທດ.

   ສໍາລັບຕາດທີ່ວ່ານີ້ແມ່ນຕັ້ງຢູ່ທາງທິດໃຕ້ຂອງເມືອງບຸນເໜືອຫ່າງຈາກເທດສະບານແຂວງ 10 ກິໂລແມັດ ຊຶ່ງມີສາຍນໍ້າໄຫຼລົງມາຈາກເທິງພູກັນຕອງຄວາມໃສສະອາດໂດຍທໍາມະຊາດຢ່າງແທ້ຈິງ, ສ່ວນລັກສະນະຕາດເປັນດັ່ງຫົວບັນໄດເຮືອນເພາະມີຫີນຂະໜາດນ້ອຍໃຫຍ່ຢັງຢາຍກັນເປັນພັກເປັນພັກເມື່ອສາຍນໍ້າໄຫຼລົງມາສາດໃສ່ຫີນເບິ່ງແລ້ວສວຍງາມກິນໃຈ, ອ້ອມຮອບຕາດກໍມີຮົ່ມໄມ້ນ້ອຍໃຫຍ່ບົດບັງແສງແດດເຮັດໃຫ້ເຢັນສະບາຍ. ນອກນັ້ນ, ໃນບໍລິເວນຕາດມັດທິງ ເປັນເຂດທີ່ອຸດົມສົມບູນໄປດ້ວຍທຳມະຊາດ, ສັດນ້ຳ, ສັດບົກ ແລະພືດພັນນາໆຊະນິດ, ອີກທັງຍັງເປັນທໍາມະຊາດທີ່ສວຍງາມຂອງພູຜາປ່າໄມ້ ແລະໜ່ວຍພູສະຫຼັບສັບຊ້ອນເປັນໜ້າສະອອນເມື່ອໄດ້ສຳຜັດ.

• 23/01/2019