ຊາວບ້ານນາໂພເລີນອະນາໄມຄອງເໝືອງກຽມຜະລິດລະດູແລ້ງ

  ວັນທີ 2 ຕຸລາ 2019 ຊາວບ້ານນາໂພເລີນເມືອງ ແລະ ແຂວງສາລະວັນ ສ້າງຂະບວນການອະນາໄມຄອງຊົນລະປະທານກຽມການຜະລິດລະດູແລ້ງໃຫ້ ທ່ວງທັນກັບລະດູການ, ໂດຍການນຳພາຂອງທ່ານ ຄຳແຝງ ທຳມະວົງ ຫົວໜ້າໜ່ວຍງານຊົນລະປະທານຫ້ອງການກະສິກຳ-ປ່າໄມ້ ເມືອງສາລະວັນ ແລະພາກສ່ວນ ທີ່ກ່ຽວຂ້ອງຕະຫຼອດຮອດນາຍບ້ານ ແລະປະຊາຊົນເຂົ້າຮ່ວມ.

ທ່ານ ຄຳແຝງ ທຳມະວົງ ໃຫ້ ສຳພາດວ່າ: ຂະບວນການອອກ ແຮງງານອະນາໄມຄອງຊົນລະປະທານຄັ້ງນີ້ເພື່ອກຽມການຜະລິດເຂົ້ານາແຊງຂອງປະຊາຊົນທ່ວງທັນກັບລະດູການ, ຊຶ່ງເປັນ ບ້ານທີ່ຢູ່ທ້າຍຄອງເໝືອງໃຫ້ໄດ້ ເລີ່ມລົງມືກ່ອນ, ທັງເປັນການສະໜອງນໍ້າໃຫ້ບ້ານທີ່ຢູ່ລຸ່ມສຸດໃຫ້ພຽງພໍ,ທົ່ວເຖິງ ແລະເປັນການຟື້ນຟູຫຼັງນໍ້າຖ້ວມທີ່ມີບາງຄອບຄົວໄດ້ ຮັບຜົນກະທົບຈຳນວນໜຶ່ງ, ສຳລັບການແບ່ງຄວາມຮັບຜິດຊອບອະນາໄມຄອງຊົນລະປະທານຂອງປະຊາຊົນເຂດບ້ານນາໂພເລີນ ແມ່ນອະນາໄມຄອງແມ່ (ຄອງ ໃຫຍ່) 2 ກິໂລແມັດ ແລະຄອງ ຊອຍເຂົ້າບ້ານ 4 ກິໂລແມັດເປັນຕົ້ນ:ແມ່ນຖາງຫຍ້າ,ອະນາໄມເສດ ໄມ້ຕ່າງໆທີ່ຄ້າງຕາມຄອງເພື່ອເຮັດໃຫ້ນໍ້າໄຫຼສະດວກ, ຊຶ່ງປະຊາຊົນໄດ້ມີຄວາມຕື່ນຕົວ ແລະເຂົ້າຮ່ວມເປັນຂະບວນຟົດຟື້ນມີທັງໝົດ 150 ຄົນ, ຍິງ 50 ຄົນ ແລະໄດ້ແບ່ງອອກເປັນ 8 ຈຸ ຊຶ່ງ ໄດ້ປະຕິບັດເປັນປະຈຳໃນແຕ່ລະປີ ແລະຄາດຄະເນຈະໃຫ້ໄດ້ຕົກກ້າໃນກາງເດືອນຕຸລານີ້

ບ້ານນາໂພເລີນເມືອງສາລະວັນມີພົນລະເມືອງທັງໝົດ 847 ຄົນ, ຍິງ 436 ຄົນ, ມີ 117 ຫຼັງ ຄາເຮືອນ ແລະມີ 136 ຄອບຄົວ, ປະຊາຊົນສ່ວນໃຫຍ່ແມ່ນມີອາຊີບປູກຝັງ, ສຳລັບບ້ານດັ່ງກ່າວມີເນື້ອ ທີ່ທຳການຜະລິດທັງໝົດ 200 ກວ່າເຮັກຕາ, ໃນນັ້ນນາແລ້ງ 78,84 ເຮັກຕາ.

-------------------

ພາບ ແລະຂາ່ວຈາກໜັງສືພິມເສດຖະກິດ-ສັງຄົມ

แชร์