ເກືອບ 40 ຄອບຄົວນໍ້າຖ້ວມ ຮັບແນວພັນເຂົ້າ

 ປະຊາຊົນບ້ານນາໂພເລີນເມືອງ ແລະເມືອງສາລະວັນ ເປັນອີກບ້ານໜຶ່ງທີ່ໄດ້ຮັບຜົນກະທົບຈາກໄພນໍ້າຖ້ວມຜ່ານມາທີ່ໄດ້ເຮັດໃຫ້ເຂົ້າໃນນາຕາຍເປັນຈຳນວນຫຼວງຫຼາຍ ແລະກະທົບຕໍ່ກັບການຜະລິດຂອງປະຊາຊົນໃນລະດູແລ້ງເນື່ອງຈາກບໍ່ມີແນວພັນເຂົ້າ, ແນວໃດກໍດີໃນວັນທີ 2 ຕຸລາຜ່ານມາທີ່ບ້ານດັ່ງກ່າວ, ຄະນະນຳຂອງເມືອງໄດ້ລົງມອບແນວພັນເຂົ້າປູກ 2,5 ໂຕນໃຫ້ປະຊາຊົນ, ມອບໂດຍ ທ່ານ ທຶງ ຈອມມະນີ ເຈົ້າເມືອງໆ ສາລະວັນ, ຮັບໂດຍຕາງໜ້າອຳນາດການປົກຄອງບ້ານ, ໂດຍຊ້ອງໜ້າ ທ່ານ ບົວທອງ ຄຸນຍອດປັນຍາ ຮອງເຈົ້າແຂວງໆສາລະວັນ ແລະພໍ່ແມ່ປະຊາຊົນເຂົ້າຮ່ວມ.

  ແນວພັນເຂົ້າປູກຈຳນວນ 2,5 ໂຕນທີ່ນຳມາມອບໃນຄັ້ງນີ້ແມ່ນໄດ້ຮັບການຊ່ວຍເຫຼືອ, ສະໜັບສະໜູນຈາກພະແນກກະສິກຳ ແລະປ່າໄມ້ແຂວງເພື່ອລົງແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃຫ້ໄດ້ສືບຕໍ່ທຳການຜະລິດໂດຍສະເພາະໃນລະດູແລ້ງນີ້ໃຫ້ທ່ວງທັນ ແລະເປັນບ້ານທຳອິດຂອງເມືອງອີກດ້ວຍ.

  ບ້ານນາໂພເລີນເມືອງມີເນື້ອທີ່ທຳການຜະລິດທັງໝົດ 200 ກວ່າເຮັກຕາ, ໃນນັ້ນເນື້ອທີ່ຖືກກະທົບ 180 ກວ່າເຮັກຕາ, ເສຍຫາຍຕົວຈິງ150 ກວ່າເຮັກຕາ ແລະມີ 38 ຄອບຄົວທີ່ໄດ້ຮັບຜົນກະທົບໜັກສຳລັບການແຈກຢາຍແນວພັນເຂົ້າໃຫ້ປະຊາຊົນໃນຄອບຄົວໜຶ່ງ 20 ກິໂລ ແລະ 38 ຄອບຄົວທີ່ມີຜົນເສຍຫາຍຫຼາຍແມ່ນຄອ ບຄົວໜຶ່ງ 30 ກິໂລ.

  ບ້ານດັ່ງກ່າວແມ່ນມີເງື່ອນໄຂໃນການຜະລິດລະດູແລ້ງໂດຍສະເພາະນອນໃນໂຄງການລະບົບຊົນລະປະທານໜອງແດງ ແລະຄາດວ່າຈະໄດ້ລົງມືທຳການຜະລິດໃນກາງເດືອນຕຸລານີ້ໃຫ້ທ່ວງທັນ, ທັງເປັນການຟື້ນຟູພາຍຫຼັງນໍ້າຖ້ວມເປັນຕົ້ນ: ແມ່ນການຜະລິດຂອງປະຊາຊົນໃຫ້ເປັນປົກກະຕິໂດຍໄວ.

-----------------

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์