ເຕັກນິກປູກຜັກກາດຊອມ

  ຜັກກາດຊອມ ຫຼື ຜັກກາດກວາງຕຸ້ງເປັນພືດອາຍຸປີດຽວສາມາດຈະເລີນເຕີບໂຕໄດ້ໃນດິນທຸກຊະນິດທີ່ມີຄວາມອຸດົມສົມບູນດີ, ສະພາບດິນມີຄວາມຊຸ່ມສູງພໍສົມຄວນ, ມີແສງແດດສະໝໍ່າສະເໝີຕະຫຼອດມື້.

  ຕາມຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ຜັກກາດຂຽວກວາງຕຸ້ງເປັນຜັກທີ່ມີຮາກຕື້ນມີການເຕີບໂຕໄວ, ປູກໄດ້ປະມານ 35 ຫາ 40 ມື້ ກໍສາມາດບໍລິໂພກໄດ້, ນອກ ຈາກຜັກກາດຂຽວ ກວາງຕຸ້ງແລ້ວ ຍັງມີຜັກກາດກວາງຕຸ້ງ 3 ຊະນິດ ຄື: ຜັກກາດຂາວກວາງຕຸ້ງ, ຜັກກາດຮອງເຕ້ ແລະຜັກກາດດອກ; ສ່ວນເຕັກນິກການປູກແມ່ນມີການ ກຽມດິນຄວນໄຖ ຫຼື ຂຸດເລິກປະ ມານ 15 ຫາ 20 ຊັງຕີແມັດ, ຕາກດິນໄວ້ປະມານ 5 ຫາ 7 ວັນ, ໂຮຍຝຸ່ນຄອກ ຫຼື ຝຸ່ນບົ່ມທີ່ລະລາຍ ຕົວດີ ແລະຍ່ອຍດິນໃຫ້ລະອຽດ ຍົກເປັນໜານໆ, ສໍາລັບການປູກ ແມ່ນມີຫຼາຍຮູບແບບເຊັ່ນ: ການ ປູກແບບຫວ່ານເມັດແມ່ນໃຫ້ປະສົມເມັດພັນ 1 ສ່ວນກັບຊາຍສະ ອາດ 3 ສ່ວນຫວ່ານ ໃຫ້ທົ່ວໜານ ແລ້ວປົກດ້ວຍຝຸ່ນຄອກ ຫຼື ຝຸ່ນບົ່ມ ໜາ 0,5 ຫາ 1 ຊັງຕີແມັດ, ປົກ ດ້ວຍເຟືອງແຫ້ງບາງໆ ເພື່ອເກັບຮັກສາຄວາມຊຸ່ມຊື່ນແລ້ວຫົດນໍ້າໃຫ້ຊຸ່ມ, ເມື່ອເມັດງອກໄດ້ປະມານ 20 ວັນ, ຄວນຖອນແຍກຈັດໃຫ້ໄດ້ໄລຍະຫ່າງຕົ້ນ 20-25 ຊັງຕີແມັດ; ສໍາລັບການປູກແບບໂຮຍເມັດເປັນແຖວ ແມ່ນປະຕິບັດຄືການປູກແບບຫວ່ານເມັດແຕ່ໃຫ້ໄລຍະຫວ່າງແຖວ 20-25 ຊັງຕີແມັດ.  

  ການໃສ່ຝຸ່ນພືດດັ່ງກ່າວນີ້ຕ້ອງການຝຸ່ນຫຼາຍພໍສົມຄວນ, ດັ່ງນັ້ນການກຳນົດຝຸ່ນເພື່ອນຳໃຊ້ແມ່ນມີຄວາມຈຳເປັນແນໃສ່ການຫຼຸດຜ່ອນຕົ້ນທຶນການຜະລິດ ແລະ ໃຫ້ປະສິດຕິຜົນສູງດ້ານຜົນຜະລິດ ໂດຍສະເພາະດ້ານການຈະເລີນ ເຕີບໂຕທາງໃບ ແລະລຳຕົ້ນ, ດັ່ງ ນັ້ນຈຶ່ງແນະນຳໃຫ້ໃຊ້ຝຸ່ນ N:P:K ສູດ 20-11-11 ຫຼື 16-8-8 ຫຼື ສູດທີ່ໃກ້ຄຽງໃນຈຳນວນ 300 ກິໂລຕໍ່ເຮັກຕາ ໂດຍແບ່ງໃສ່ 2 ເທື່ອ: ເທື່ອທີ 1 ໃສ່ເຄິ່ງໜຶ່ງເປັນ ຝຸ່ນຮອງພື້ນຕອນປູກແລ້ວພວນ ດິນປົກ, ເທື່ອທີ 2 ໃຫ້ໃສ່ຝຸ່ນເມື່ອພືດມີອາຍຸປະມານ 10-20 ວັນ (ຈໍານວນທີ່ເຫຼືອຄັ້ງທຳອິດ). ພ້ອມນີ້ອາດຈະເພີ່ມຝຸ່ນຢູເຣຍອີກ 60 ກິໂລຕໍ່ເຮັກຕາເພື່ອເລ່ງການຈະເລີນເຕີບໂຕຂອງລຳຕົ້ນ ແລະໃບ; ສ່ວນການໃຫ້ນໍ້າຄວນໃຫ້ຢ່າງພຽງພໍແຕ່ຢ່າໃຫ້ປຽກເກີນໄປໂດຍເບິ່ງຄວາມຊຸ່ມຊື່ນໃນໜານປູກໃຫ້ມີຄວາມຊຸ່ມຢ່າງສະໝໍ່າສະເໝີ.

  ການພວນດິນກຳຈັດວັດສະພືດຄວນເຮັດໃນໄລຍະທຳອິດ, ເພື່ອເຮັດໃຫ້ດິນລຸລ່ວງຜຸຜົງລະບາຍອາກາດ ແລະນໍ້າໄດ້ດີພ້ອມກັບການກຳຈັດຫຍ້າໄປພ້ອມໆ ກັນ, ເມື່ອຕົ້ນພືດມີໃບປົກຄຸມດິນ ແລ້ວບໍ່ຈຳເປັນເຮັດເລີຍ; ດ້ານການ ເກັບກ່ຽວອາຍຸການເກັບກ່ຽວຂອງຜັກກາດຂຽວກວາງຕຸ້ງຂ້ອນຂ້າງ ໃຫຍ່ໄວປະມານ 35-40 ວັນ, ໃຫ້ເລືອກຕົ້ນທີ່ໃຫຍ່ມີຂະໜາດຕາມຄວາມຕ້ອງການແລ້ວຕັດດ້ວຍມີດຄົມໆທີ່ໂຄນຕົ້ນຕັດແຕ່ງໃບນອກທີ່ແກ່ ແລະຖືກແມງໄມ້ ທຳລາຍອອກກ່ອນບັນຈຸສົ່ງຕະຫຼາດ ຫຼື ບໍລິໂພກ.

------------------

ໜັງສືພິມເສດຖະກິດ-ສັງຄົມ

แชร์