ລັກຊັບພົນລະເມືອງຫວັງເອົາເງີນໄປຫຼິ້ນເກມ

 ໃນສັງຄົມປະຈຸບັນບັນຫາປຸ້ນລັກຊັບ, ຍັງແຜ່ລະບາດຢູ່ໃນສັງຄົມກາຍເປັນບັນຫາກົດໜ່ວງຖ່ວງດຶງການສ້າງສາພັດທະນາປະເທດຊາດ ແລະ ຍັງສ້າງຄວາມເສຍຫາຍໃຫ້ແກ່ຊັບສິນຂອງລັດ ແລະຂອງລວມໝູ່ກໍຄືຂອງບຸກຄົນ, ເຖິງແມ່ນວ່າຕະຫຼອດໄລຍະຜ່ານມາທາງເຈົ້າໜ້າທີ່ໄດ້ເອົາໃຈໃສ່ສະກັດກັ້ນ ແລະແກ້ໄຂຫຼາຍປານໃດກໍ່ຕາມແຕ່ບັນຫາດັ່ງກ່າວກໍ່ບໍ່ມີທ່າທີວ່ຈະຫຼຸດໜ້ອຍຖອຍລົງດັ່ງທີ່ພວກເຮົາໄດ້ຮູ້ໄດ້ເຫັນທາງໂທລະພາບ, ເຟສບຸກ ແລະ ສື່ຕ່າງໆສະເພາະຢູ່ເມືອງໂພນໂຮງ ແຂວງວຽງຈັນ

ກໍ່ເກີດມີການລັກຊັບພົນລະເມືອງຢູ່ຂອບເຂດບ້ານໂພນໂຮງງາມເໜືອ, ຈາກນັ້ນເຈົ້າໜ້າທີ່ຈຶ່ງໄດ້ລົງກວດກາຊັນນະສູດສະຖານທີ່ເກີດເຫດເຫັນວ່າມີມູນຄວາມຈິງຈຶ່ງໄດ້ຂຶ້ນບັນຊີເປົ້າໝາຍ ແລະຕິດຕາມໃຊ້ເວລາ 2 ວັນ ຈຶ່ງສາມາດຈັບຕົວເປົ້າໝາຍໄດ້ຄື: ທ້າວ ຫຼຸບຄໍາ ອາຍຸ 22 ປີ, ປະຊາຊົນ, ບ້ານໂພນງາມ ເໜືອໃນຄັ້ງວັນທີ 15 ສິງ ຫາ 2019 ໃນຂໍ້ຫາລັກຊັບພົນລະເມືອງມາດຳເນີນການສືບສວນ-ສອບສວນ.

   ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດໃນເບື້ອງຕົ້ນ ທ້າວ ຫຼຸບຄໍາ ໄດ້ໃຫ້ການຮັບສາລະພາບວ່າ: ໃນເບື້ອງຕົ້ນເວລາທ່ຽງຄືນຂອງວັນທີ 12 ສິງຫາ 2019 ຜູ້ກ່ຽວໄດ້ຍ່າງໄປຫຼິ້ນເກມຢູ່ຮ້ານເກມແຫ່ງໜຶ່ງຢູ່ຂອບເຂດບ້ານໂພນງາມເໜືອຈົນຮອດເວລາ 24 ໂມງ ຜູ້ກ່ຽວກໍ່ໄດ້ຍ່າງກັບເມືອເຮືອນພໍມາຮອດເຮືອນນາງ ພວງມະລີ ຜູ້ກ່ຽວຄິດຢາກໄດ້ເງິນໄປຫຼິ້ນເກມອິກຈິ່ງຫາວິທີຍ່າງໄປທາງເຮືອນຄົວແລ້ວດຶງເບິ່ງປະຕູເຮືອນຄົວອັດຢູ່ແຕ່ເຫັນເຊືອກມັດຈ່ອງໄວ້ຜູ້ກ່ຽວຈຶ່ງໄດ້ສູບຢາແລ້ວເອົາກິດຢາ ໄປຈູດເຊືອກທີ່ມັດຈ້ອງປະຕູນັ້ນຂາດແລ້ວເຂົ້າໄປຄົ້ນຕູ້ໂຊຈໍານວນ 2 ໜ່ວຍ ຢູ່ພາຍໃນເຮືອນແລ້ວພົບເຫັນສາຍແອວສີເຫຼືອງ 1 ເສັ້ນ, ສາຍຄໍສີເຫຼືອງຄ້າຍຄືຄໍາ 1 ເສັ້ນ, ໂທລະສັບ 1 ເຄື່ອງ, ປຶ້ມທະນາຄານ 3 ຫົວແລະລົດຈັກຄິກໄອ 1 ຄັນເມື່ອໄດ້ລົດຈັກຄັນດັ່ງກ່າວແລ້ວຜູ້ກ່ຽວໄດ້ຂີ່ລົດຫຼົບໜີໄປ.

 ຕາມການສັງເກດຕີລາຄາຂອງເຈົ້າໜ້າທີ່ເຫັນວ່າການກະທໍາຂອງທ້າວຫຼຸບຄໍາ, ນັ້ນແມ່ນມີເຈດຕະນາລັກຊັບພົນລະເມືອງຢ່າງແທ້ຈິງຊຶ່ງໄດ້ສ້າງຄວາມບໍ່ສະຫງົບ ແລະຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ, ສ້າງຜົນເສຍຫາຍໃຫ້ແກ່ບຸກຄົນການກະທໍາດັ່ງກ່າວແມ່ນຜິດຕໍ່ກົດໝາຍອາຍາມາດຕາ 231 ໃນສະຖານລັກຊັບພົນລະ ເມືອງ.

ປະຈຸບັນເຈົ້າໜ້າທີ່ໄດ້ເກັບກູ້ຊັບທີ່ຄົນຮ້າຍລັກໄປມອບຄືນໃຫ້ເຈົ້າຂອງເດີມຊຶ່ງມີສາຍແອວສີເຫຼືອງ 1 ເສັ້ນ, ສາຍຄໍສີເຫຼືອງ ຄ້າຍຄືຄໍາ 1 ເສັ້ນ, ໂທລະສັບ 1 ເຄື່ອງ, ປຶ້ມທະນາຄານ 3 ຫົວ ແລະ ລົດຈັກຄິກໄອ 1 ຄັນ ໃຫ້ເຈົ້າຂອງເດີມກ່າວມອບໂດຍທ່ານ ຮທ ສົມໃຈ ລ້ວນພູວົງ ຫົວໜ້າໜ່ວຍງານຄະດີອາຍາຕາງໜ້າຮັບໂດຍນາງ ພວງມະລີ ອາຊີບຄ້າຂາຍບ້ານໂພນງາມເໜືອ, ມີພະນັກງານເຂົ້າເປັນສັກຂີພິຍານ.

----------------

ຂຽນໂດຍ: ທອງສີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์