ກວຕ ມອບເງິນ ແລະເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມ

ເຊົ້າວັນທີ 2 ຕຸລາ ຜ່ານມາ,ກະຊວງວິທະຍາສາດ ແລະເຕັກໂນໂລຊີໄດ້ນຳເອົາດອກໄຟ ແລະເງິນສົດຈຳນວນໜຶ່ງໄປມອບໃຫ້ກັບກະຊວງແຮງງານ ແລະສະຫວັດດີການສັງຄົມ (ຮສສ) ເພື່ອນຳໄປຊ່ວຍເຫຼືອພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ, ຊຶ່ງຕາງໜ້າມອບໂດຍທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ ແລະຕາງໜ້າຮັບແມ່ນທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ພ້ອມນັ້ນຍັງມີບັນດາຮອງລັດຖະມົນຕີ, ຫົວໜ້າກົມ, ຮອງກົມ ແລະໜ່ວຍງານທີ່ກ່ຽວຂ້ອງເຂົ້າຮ່ວມ.

ທ່ານ ບໍ່ວຽງຄຳ ວົງດາລາ ກ່າວວ່າ: ສຳລັບເຄື່ອງຊ່ວຍເຫຼືອທີ່ກະຊວງວິທະຍາສາດ ແລະເຕັກໂນໂລຊີນຳມາມອບໃຫ້ກັບກະຊວງ ຮສສ ເທື່ອນີ້ເພື່ອໃຫ້ກະຊວງນຳໄປແຈກຢາຍໃຫ້ກັບພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ 6 ແຂວງພາກກາງ ແລະພາກໃຕ້, ຊຶ່ງເຄື່ອງຊ່ວຍເຫຼືອດັ່ງກ່າວລວມມູນຄ່າທັງໝົດ 30 ລ້ານກີບ, ໃນນັ້ນເປັນເງິນສົດຈຳນວນ 16 ລ້ານກີບ ແລະເປັນດອກໄຟໂຊລາເຊວທີ່ໃຊ້ພະລັງງານແສງອາທິດຈຳນວນ 200 ດອກຄິດເປັນເງິນ 14 ລ້ານກີບ, ໂດຍດອກໄຟດັ່ງກ່າວສາມາດນຳໄປໃຊ້ໃຫ້ເປັນປະໂຫຍດຫຼາຍຢ່າງເປັນຕົ້ນໃຊ້ເປັນດອກໄຟໃນຍາມກາງຄືນ ຫຼື ເປັນໄຟສາຍ ແລະ ທີ່ສຳຄັນຍັງສາມາດໃຊ້ສາກໂທລະສັບມືຖືໄດ້ດ້ວຍ, ກະຊວງ ເຊື່ອວ່າດອກໄຟໂຊລາເຊວຈະເປັນປະໂຫຍດສູງສຸດສຳລັບເຂດທີ່ຍັງບໍ່ສາມາດສ້ອມແປງໄຟຟ້າ ຫຼືການຊ່ວຍເຫຼືອເຂົ້າໄປໄດ້ຍາກ.

  ໂອກາດດັ່ງກ່າວ, ທ່ານ ຄຳແພງ ໄຊສົມແພງ ກໍໄດ້ສະແດງຄວາມຂອບໃຈຕໍ່ກະຊວງວິທະຍາສາດ ແລະເຕັກໂນໂລຊີພ້ອມດ້ວຍພະນັກງານທຸກຂັ້ນຂອງກະຊວງທີ່ໄດ້ມີນໍ້າໃຈເອື້ອເຟື້ອເພື່ອແຜ່ໄປຮອດໄປເຖິງບັນດາພໍ່ແມ່ປະຊາຊົນລາວຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນເທື່ອນີ້, ສຳລັບໄພພິບັດທີ່ເກີດຂຶ້ນໃນປີນີ້ບໍ່ສະເພາະແຕ່ແຂວງພາກກາງແລະພາກໃຕ້ເທົ່ານັ້ນທີ່ໄດ້ຮັບຜົນກະທົບໜັກ, ແຕ່ວ່າທາງເຂດພາກເໜືອຂອງລາວກໍໄດ້ຮັບຜົນກະທົບເປັນໄພແຫ້ງແລ້ງຄືກັນ, ແຕ່ເຖິງຢ່າງໃດກໍຕາມການຊ່ວຍເຫຼືອຂອງກະຊວງວິທະຍາສາດ ແລະເຕັກໂນໂລຊີຊຸດນີ້ກະຊວງກໍຈະໄດ້ນຳໄປແຈກຢາຍໃຫ້ຮອດໃຫ້ເຖິງມືຂອງພໍ່ແມ່ປະຊາຊົນທີ່ໄດ້ຮັບຜົນກະທົບເຊັ່ນດຽວກັນກັບ ເຄື່ອງຊ່ວຍເຫຼືອອື່ນໆຂອງບັນດາພາກສ່ວນຕ່າງໆທັງພາຍໃນ ແລະຕ່າງປະເທດທີ່ນຳມາມອບກ່ອນໜ້ານັ້ນ.

---------------

ຂຽນໂດຍ: ພິມພອນ      

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์