ສາລະວັນ ຕ້ອງການງົບສຸກເສີນແປງຂົວ-ທາງຕື່ມອີກ 315 ຕື້ກີບ

 ສາລະວັນແມ່ນແຂວງໜຶ່ງທີ່ໄດ້ຮັບຜົນກະທົບໜັກໜ່ວງຈາກໄພນໍ້າຖ້ວມທີ່ເກີດຂຶ້ນໃນປີນີ້, ສະເພາະຂະແໜງໂຍທາທິການ ແລະຂົນສົ່ງທີ່ລວມເອົາເສັ້ນທາງ ແລະຂົວຫຼາຍແຫ່ງສັງລວມຄວາມເສຍຫາຍທັງໝົດ 470 ຕື້ກີບ, ແຕ່ໄດ້ມີການໃຊ້ງົບການແກ້ໄຂສຸກເສີນເບື້ອງຕົ້ນເພື່ອລະບາຍການສັນຈອນໄປແລ້ວ 155 ຕື້ກີບ ຢ່າງໃດກໍ ຕາມເພື່ອແນໃສ່ເລັ່ງແກ້ຫຼັງຝົນນີ້ແຂວງຍັງຕ້ອງການອີກ 315 ຕື້ກີບ.

 ອີງຕາມຂໍ້ມູນຂອງກະຊວງໂຍທາທິການ ແລະຂົນສົ່ງ (ຍທຂ) ໃຫ້ຮູ້ວ່າ: ສະເພາະຄວາມເສຍຫາຍທີ່ເກີດຂຶ້ນຢູ່ພາຍໃນແຂວງສາລະວັນໃນປີນີ້ເມື່ອທຽບກັບບັນດາແຂວງອື່ນໆ ໃນຂອບເຂດທົ່ວປະເທດເຫັນວ່າສາລະວັນເປັນແຂວງທີ່ໄດ້ຮັບຜົນກະທົບຢ່າງໜັກໜ່ວງຕົ້ນຕໍໃນຂະແໜງໂຍທາທິການ ແລະ ຂົນສົ່ງຄື: ຂົວ ແລະ ເສັ້ນທາງແມ່ນກວມເອົາວົງກວ້າງມີທັງໝົດ 155 ເສັ້ນ, ຄວາມຍາວ 2,9 ພັນກິໂລແມັດ, ເສຍຫາຍທັງໝົດ 2,22 ພັນກິໂລແມັດ, ໂດຍຄວາມເສຍຫາຍຄິດເປັນມູນຄ່າທັງໝົດ 470 ຕື້ກີບ, ໃນນັ້ນໄດ້ແກ້ໄຂສຸກເສີນແລ້ວ 155 ຕື້ກີບ ແລະຍັງຕ້ອງການຕື່ມອີກ 315 ຕື້ກີບ ເພື່ອໃຊ້ເຂົ້າໃນການແກ້ໄຂຫຼັງລະດູຝົນທີ່ຈະສິ້ນສຸດ, ສະເພາະທາງມີ 94 ເສັ້ນ ແລະຂົວອີກ 61 ແຫ່ງ, ໃນນີ້ກວມເອົາທາງຫຼວງແຫ່ງຊາດ1 ເສັ້ນ, ຍາວ 73 ກິໂລແມັດ ແຕ່ຊ່ວງທາງສາມແຍກນາປົ່ງ-ຊາຍແດນດ່ານລະໄລ, ທາງຫຼວງແຂວງ 3 ເສັ້ນ, ຍາວ 84,8 ກິໂລແມັດ ແຕ່ແຍກທາງ 15-ບ້ານອາສົກ, ແຍກທາງ 15 ບ້ານສະເໝັຍ-ຊາຍແດນເມືອງຄົງ, ແຍກທາງ 13 ໃຕ້ບ້ານຫີນສິ່ວ-ບ້ານຄັນທຸງໄຊ, ສ່ວນທາງຫຼວງເມືອງ ມີ 6 ເສັ້ນ, ຍາວ 169,5 ກິໂລແມັດ, ເສຍຫາຍ 51 ກິໂລ, ທາງຊົນນະບົດ77 ເສັ້ນ, ຍາວ 824,95 ກິໂລ ແມັດ, ເສຍຫາຍ 430 ກິໂລ, ທາງຕົວເມືອງ ມີ 7 ເສັ້ນ, ຍາວ 78,28 ກິໂລແມັດ ແລະເສຍຫາຍທັງໝົດ 35 ກິໂລແມັດ.

 ສຳລັບຂົວມີຈຳນວນ 61 ແຫ່ງ, ຍາວທັງໝົດ 1,70 ພັນກິໂລແມັດ, ຊຶ່ງເສຍຫາຍທັງໝົດ, ໃນນີ້ເປັນຂົວຕາມທາງຫຼວງແຂວງ 7 ແຫ່ງ, ຍາວ 302 ກິໂລແມັດ, ເປັນຂົວເບຕົງຢູ່ເມືອງວາປີທັງໝົດ, ຂົວຕາມທາງຫຼວງເມືອງ 9 ແຫ່ງເປັນຂົວໄມ້, ກວມເອົາ 3 ເມືອງຄື: ລະຄອນເພັງ, ສາລະວັນ ແລະເມືອງວາປີ, ຍາວ 173 ກິ ໂລແມັດ, ຂົວຕາມທາງຊົນນະບົດຍາວ 1,22 ພັນກິໂລແມັດ, ທີ່ລວມເອົາ ຂົວເບເລ 7 ແຫ່ງ ມີ 240 ກິໂລ, ຂົວຂາງອິ 2 ແຫ່ງ ມີ 142 ກິໂລ, ຂົວໄມ້ 33 ແຫ່ງ ມີ 678 ກິໂລ ແລະຂົວອູ່ 3 ແຫ່ງມີ 169 ກິໂລແມັດ ທີ່ເສຍຫາຍ.

-----------------

ຂຽນໂດຍ: ພິມພອນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ     

 

แชร์