ຫຼວງນໍ້າທາ ຈັດພິທີກໍາຕາມຮີດຄອງເລີ່ມຕົ້ນ ໂຄງການພັດທະນາສວນວັດທະນະທໍາ

    ວັນທີ 29 ກັນຍາ 2019 ແຂວງຫຼວງນໍ້າທາໄດ້ຈັດພິທີກໍາຕາມຮີດຄອງປະເພນີເພື່ອເລີ່ມຕົ້ນໂຄງການພັດທະນາສວນວັດທະນະທໍາຂອງແຂວງຂຶ້ນທີ່ຜາມໄຊ ເຮືອຊ່ວງ, ໂດຍການເປັນປະທານ ຂອງທ່ານ ບຸນຍີ່ ແກ້ວຄຸນເມືອງ ຮອງເຈົ້າແຂວງຫຼວງນໍ້າທາຫົວໜ້າຄະນະຊີ້ນໍາໂຄງການພັດທະນາສວນວັດທະນະທໍາຂອງແຂວງ, ທ່ານ ສີວິໄລ ປັນແກ້ວ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ມີຄະນະການນໍາແຂວງ ແລະ ການນໍາເມືອງຫຼວງນໍ້າທາ, ມີປະທານບໍລິສັດ, ບັນດາທ່ານຄະນະຊີ້ນໍາ, ຄະນະໄກເກຍເນື້ອທີ່ດິນ, ຫົວໜ້າເຜົ່າໄຕ໋ດໍາ, ຄະນະບ້ານ, ເຖົ້າແກ່ແນວໂຮມບັນດາບ້ານໃກ້ຄຽງເຂົ້າຮ່ວມ.

 ໂຄງການພັດທະນາສວນວັດທະນະທໍາຂອງແຂວງແມ່ນຢູ່ລຽບແມ່ນໍ້າທາເຂດບ້ານແປ່ເກົ່າກົງກັນຂ້າມກັບບ້ານທົ່ງອົ້ມ, ມີເນື້ອທີ່ທັງ ໝົດ 31 ເຮັກຕາ, ໂດຍແມ່ນການລົງທຶນຂອງພາກທຸລະກິດເອກະຊົນ 100% ຂອງບໍລິສັດດວງປະເສີດການຄ້າ-ການທ່ອງທ່ຽວຈໍາກັດໃນມູນຄ່າການລົງທຶນ 15,5 ລ້ານໂດລາສະຫະລັດ, ທຶນຈົດ ທະບຽນ 5 ລ້ານໂດລາສະຫະລັດ, ການກໍ່ສ້າງ ໄດ້ແບ່ງອອກເປັນ 3 ໄລຍະຄື: ໄລຍະທີ 1 ປີ 2017-2020 ດໍາເນີນບຸກເບີກດິນ,ປັບໜ້າດິນ, ກໍ່ສ້າງພື້ນຖານໂຄງລ່າງ, ໄລຍະທີ 2 ປີ 2020-2025 ແລະໄລຍະທີ 3 ປີ 2025-2030 ດໍາເນີນການກໍ່ສ້າງອາຄານ ແລະກິດຈະກໍາຕ່າງໆ ໃຫ້ສໍາເລັດໂດຍການສໍາປະທານ 50 ປີ.

ທ່ານ ບຸນເລີດ ດວງປະເສີດ ປະທານບໍລິສັດດວງປະເສີດການຄ້າ-ການທ່ອງທ່ຽວຈໍາກັດຜູ້ພັດທະນາໂຄງການພັດທະນາສວນວັດທະນະທໍາຂອງແຂວງໄດ້ກ່າວວ່າ: ຈຸດ ປະສົງເພື່ອເປັນການຄອບກ່າວສິ່ງສັກສິດເພື່ອໃຫ້ການພັດທະນາໂຄງການນີ້ມີຄວາມປອດໄພຕະຫຼອດໄລຍະກໍ່ສ້າງ ແລະມີຜົນສໍາເລັດຕາມຈຸດປະສົງຄາດໝາຍທຸກປະ ການ ແລະໄດ້ສະເໜີວິໄສທັດການພັດທະນາໂຄງການສວນວັດທະນະທໍາແຫ່ງນີ້ຈະຖືກພັດທະນາໃຫ້ເປັນຈຸດລວມສູນຂອງບັນດາ ຊົນເຜົ່າທີ່ຢູ່ແຂວງຫຼວງນໍ້າທາ,ສ້າງໃຫ້ເປັນສະຖານທີ່ທ່ອງທ່ຽວ ເປັນຈຸດໝາຍປາຍທາງຂອງນັກ ທ່ອງທ່ຽວທັງພາຍໃນ ແລະຕ່າງປະເທດ, ທີ່ມາທ່ຽວຊົມແຂວງຫຼວງນໍ້າທາ ມີທ່າແຮງທາງດ້ານທີ່ຕັ້ງເປັນຈຸດຜ່ານຂອງຫຼາຍປະເທດ, ມີທໍາມະຊາດທີ່ສວຍງາມ ແລະສິ່ງສໍາຄັນມີເອກະລັກການດໍາລົງຊີວິດຢູ່ຮ່ວມກັນຂອງຫຼາກຫຼາຍຊົນເຜົ່າ, ສະນັ້ນການພັດທະນາດັ່ງກ່າວຈະຕິດພັນກັບການປົກປັກຮັກສາທໍາມະຊາດວີຖີຊີວິດດັ່ງກ່າວເພື່ອໃຫ້ຄົນຮຸ່ນຕໍ່ໆໄປໄດ້ສືບທອດຕະຫຼອດໄປ,ຖ້າໂຄງການໄດ້ສໍາເລັດຈະເປັນການປະກອບສ່ວນເຂົ້າໃນການພັດ ທະນາເສດຖະກິດ-ສັງຄົມຂອງແຂວງຫຼວງນໍ້າທາຈະປະກອບມີຫຼາຍຕໍາແໜ່ງງານ, ເປັນສະຖານທີ່ຮຽນຮູ້ທັກສະຕ່າງໆເຊັ່ນ: ດ້ານກະສິກໍາສະອາດປອດໄພ, ດ້ານການບໍລິການການທ່ອງທ່ຽວ, ດ້ານການຜະລິດຫັດຖະກໍາ ແລະອື່ນໆທີ່ເປັນເອກະລັກຊົນເຜົ່າ.

  ທ່ານ ບຸນຍີ່ ແກ້ວຄຸນເມືອງ ໃຫ້ຮູ້ເຖິງຄວາມສໍາຄັນຂອງສວນວັດທະນະທໍາຂອງແຂວງແມ່ນໜຶ່ງໃນແຜນນະໂຍບາຍບູລິມະສິດການພັດທະນເສດຖະກິດ-ສັງຄົມຂອງ ແຂວງແນໃສ່ສົ່ງເສີມການທ່ອງທ່ຽວແຂວງຫຼວງນໍ້າທາໃຫ້ມີທ່າະຫຍາຍຕົວ, ກວ້າງຂວາງ, ຖ້າໂຄງການກໍ່ສ້າງສວນວັດທະນະທໍາຂອງແຂວງສໍາເລັດຕາມລະດັບຄາດ ໝາຍແຂວງຫຼວງນໍ້າທາຈະມີແຫຼ່ງທ່ອງທ່ຽວວັດທະນະທໍາທີ່ມີຄຸນນະພາບ, ໄດ້ມາດຕະຖານແລະການບໍລິການຄົບວົງຈອນເຊັ່ນ: ແຫຼ່ງທ່ອງທ່ຽວວັດທະນະທໍາ, ໂຮງ ແຮມ, ຮ້ານອາຫານ, ຫໍປະຊຸມ, ຫໍວາງສະແດງສິນຄ້າ, ສະຖານທີ່ກິນດື່ມ, ການບັນເທິງ, ສະຖານທີ່ພັກຜ່ອນ, ບ່ອນອອກກໍາລັງກາຍ, ສະຖານທີ່ຈັດງານ ແລະອື່ນໆ ເຊື່ອແນ່ວ່າຈະດຶງດູດການລົງທຶນ, ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາໃຊ້ບໍລິການເປັນຈໍານວນຫຼາຍປະກອບສ່ວນໃຫ້ປະຊາຊົນບັນດາເຜົ່າມີວຽກເຮັດງານທໍາ,ມີການຈໍລະອນສິນຄ້າ ແລະການບໍລິການເພີ່ມຂຶຶ້ນຊຶ່ງເປັນການສ້າງລາຍຮັບເຂົ້າແຂວງເວົ້າລວມເວົ້າສະເພາະແມ່ນປະຊາຊົນບັນດາເຜົ່າປະກອບສ່ວນເຂົ້າໃນການແກ້ໄຂ ແລະຫຼຸດຜ່ອນຄວາມທຸກຍາກຂອງປະຊາຊົນ ແລະພັດທະນາເສດຖະກິດ-ສັງຄົມຂອງແຂວງໃຫ້ດີຂຶ້ນເທື່ອລະກ້າວ.

  ນອກຈາກນັ້ນຮອງເຈົ້າແຂວງຫຼວງນໍ້າທາ ຍັງໄດ້ຮຽກຮ້ອງມາຍັງພາກສ່ວນທີ່ກ່ຽວຂ້ອງໃຫ້ການສະໜັບສະໜູນ ແລະໃຫ້ການຮ່ວມມືໃນການຈັດຕັ້ງປະຕິບັດໂຄງການ ກໍ່ສ້າງສວນວັດທະນະທໍາຂອງ ແຂວງໃຫ້ສໍາເລັດຕາມລະດັບຄາດໝາຍ,ມອບໃຫ້ຄະນະຊີ້ນໍາໂຄງການເອົາໃຈໃສ່ແກ້ໄຂບັນຫາທີ່ຍັງຄົງຄ້າງ,ກວດກາຕິດຕາມ ແລະໃກ້ຊິດຕິດແທດເພື່ອໃຫ້ໂຄງການສາມາດດໍາເນີນໄປຢ່າງເປັນປົກກະຕິ, ໃຫ້ຄະນະໄກ່ເກ່ຍທີ່ດິນສືບຕໍ່ສຶກສາອົບຮົມການເມືອງ-ແນວຄິດ ແລະໄກ່ເກ່ຍທີ່ດິນທີ່ຍັງຄົງຄ້າງໃຫ້ສໍາເລັດຕາມແຜນການ, ມອບໃຫ້ຄະນະບ້ານ, ແນວໂຮມບ້ານ ແລະປະຊາຊົນບ້ານທີ່ໃກ້ຄຽງໃຫ້ການຊ່ວຍເຫຼືອ ແລະສະໜັບສະໜູນ.

  ນອກຈາກການເຮັດຮີດຄອງຕາມປະເພນີແລ້ວ, ບັນດາຄະນະຜູ້ແທນຍັງໄດ້ທ່ຽວຊົມເຂດທີ່ພວມບຸກເບີກເນື້ອທີ່ສວນວັດທະນະທໍາຕື່ມອີກ.

-------------------

ຂຽນໂດຍ: ກິ່ນນາລົມ

ພາບ ແລະຂ່າວຈາກໜັງສືພິມເສດຖະກິດ-ສັງຄົມ

แชร์