ເອັມຊີເອັສ ເນັ້ນສິນຄ້າຄຸນນະພາບເປັນຈຸດຂາຍ

ທ່ານ ຄຳເພັດ ໄຊຍະແສງ ຜູ້ປະສານງານບໍລິສັດ ເອັມຊີເອັສ ມາຍນິ້ງ ອິນດັສທຮີລາວ ຈຳກັດ ໃຫ້ສຳພາດວ່າ: ບໍລິສັດເອັມຊີເອັສ ມາຍນິ້ງ ອິນດັສທຮີ ລາວຈຳກັດ ເປັນໂຄງການຂຸດຄົ້ນຜະລິດປູນຂາວຄົບວົງຈອນຕັ້ງຢູ່ເຂດບ້ານພີນເມືອງທ່າແຂກແຂວງຄຳມ່ວນ ເປັນບໍລິສັດແຫ່ງທຳອິດທີ່ໄດ້ຮັບອະນຸຍາດຂຸດຄົ້ນຫີນປູນເພື່ອປັບແຕ່ງເປັນແຄວຊ້ຽມຄາໂບເນັດ, ແຄວຊ້ຽມອ໋ອກຊາຍ ແລະຫີນອຸດສາຫະກຳກໍ່ສ້າງບໍລິສັດໄດ້ສ້າງຕັ້ງຂຶ້ນໃນປີ 2013 ໃຊ້ທຶນໃນການ ກໍ່ສ້າງທັງໝົດ 40 ລ້ານໂດລາ, ປະຈຸບັນມີພະນັກງານ-ກຳມະກອນ ທັງໝົດ 150 ຄົນ, ໃນນັ້ນມີແຮງ ງານລາວກວມເອົາ 80%, ມີຜະ ລິດຕະພັນ 3 ຊະນິດຄື: ແຄວຊ້ຽມ ຄາໂບເນັດ, ແຄວຊ້ຽມອ໋ອກຊາຍ ແລະຫີນຜາບົດກໍ່ສ້າງ, ດ້ານກຳລັງການຜະລິດສຳລັບແຄວຊ້ຽມ ຄາໂບເນັດ ແມ່ນຜະລິດໄດ້ 300 ໂຕນຕໍ່ວັນ, ແຄວຊ້ຽມອ໋ອກຊາຍ 600 ໂຕນຕໍ່ວັນ ແລະ ຫີນຜາບົດ ກໍ່ສ້າງ 3.500 ໂຕນຕໍ່ວັນ.  

  ຜະລິດຕະພັນຂອງໂຮງງານແມ່ນຜ່ານຂັ້ນຕອນການຜະລິດທີ່ມີຄວາມລະອຽດແລະມີຄຸນນະພາບສູງສາມາດຕອບສະໜອງໃຫ້ແກ່ພາກອຸດສາຫະກຳຕ່າງໆຢູ່ພາຍໃນ ແລະຕ່າງປະເທດຈຳນວນໜຶ່ງເປັນຕົ້ນແມ່ນໂຮງງານສີ, ໂຮງງານທໍ່ພາສຕິກ, ໂຮງງານອຸດສາຫະກຳເໝືອງທອງຄຳ, ໂຮງງານເຈ້ຍ ແລະ ອຶ່ນໆ, ສ່ວນຫີນຜາບົດກໍ່ ສ້າງແມ່ນນຳໃຊ້ເຂົ້າໃນການສ້າງເສັ້ນທາງ ແລະ ອຸດສາຫະກຳຕ່າງໆ ໄດ້ຢ່າງພຽງພໍກັບຄວາມຕ້ອງການສໍາລັບຜົນກະທົບທາງດ້ານສິ່ງແວດລ້ອມແມ່ນມີຜົນກະທົບໜ້ອຍເນື່ອງຈາກຜະລິດຕະພັນຫີນປູນທີ່ບໍ່ແມ່ນສານເຄມີ ແລະສາມາດລະລາຍໃນນໍ້າເຮັດໃຫ້ນໍ້າໃສສະອາດ.

 ທາງດ້ານການປັບປຸງຄຸນນະພາບ, ການຜະລິດ ແລະສິ່ງແວດລ້ອມທ່ານ ອະພິວັດ ຂຸນຕັງວັດທະນາ ຜູ້ບໍລິຫານບໍລິສັດ ເອັມຊີເອັສ ກ່າວວ່າ: ບໍລິສັດຍັງໄດ້ມຸ້ງໝັ້ນສ້າງສິນຄ້າທີ່ມີຄຸນນະພາບສູງເພື່ອກ້າວເຂົ້າສູ່ໂຮງງານທີ່ເປັນຕົ້ນແບບ ແລະ ຜະລິດຕະພັນໃຫ້ໄດ້ມາດຕະຖານ ISO 9001 ເມື່ອເຖິງຈຸດນັ້ນແລ້ວກໍ່ຈະສືບຕໍ່ພັດທະນາ ແລະ ດຳເນີນການເອົາມາດຕະຖານທີ່ສູງຂຶ້ນໄປກໍ່ຄື ISO 14001 ແລະສ້າງໂຮງງານສີຂຽວເພື່ອກ້າວເຂົ້າສູ່ການພັດທະນາຄຸນນະພາບ,ການຜະລິດ ແລະສິ່ງແວດ ລ້ອມຕາມມາດຕະຖານສາກົນ ແລະເພື່ອປັບປຸງຄຸນນະພາບສາມາດສົ່ງອອກໃນຫຼາຍໆປະເທດ ແລະແຂ່ງຂັນກັບສາກົນໄດ້.

------------------

ຂຽນໂດຍ: ກອງຄຳ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์