ສະຫວັນນະເຂດ-ໂຮ່ຈິມິນ ຈັດງານວາງສະແດງສິນຄ້າ

  ພິທີໄຂງານຕະຫຼາດນັດວາງສະແດງສິນຄ້າສະຫວັນນະເຂດ (ສປປ ລາວ) ນະຄອນໂຮ່ຈິມິນ (ສສ ຫວຽດນາມ) ຄັ້ງທີ III ປີ 2019 ເພື່ອສົ່ງເສີມການຄ້າ-ການບໍລິການ ແລະການທ່ອງທ່ຽວ, ໄດ້ຈັດຂຶ້ນໃນຕອນແລງວັນທີ 25 ກັນຍາ 2019 ທີ່ສູນການຄ້າສະຫວັນ-ໄອເຕັກ ແຂວງສະຫວັນນະເຂດ, ໂດຍແມ່ນສູນສົ່ງເສີມການຄ້າ ແລະການລົງທຶນນະຄອນໂຮ່ຈິມິນ ສສຫວຽດນາມ ຮ່ວມກັບພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ສປປ ລາວ ໂດຍໄດ້ຮັບການສະໜັບສະ ໜູນຈາກສະຖານກົງສູນໃຫຍ່ແຫ່ງ ສປປ ລາວ ປະຈຳນະຄອນໂຮ່ຈິມິນ ແລະ ສະຖານກົງສູນໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ ຮ່ວມກັນຈັດຂຶ້ນ, ເຂົ້າຮ່ວມໃນພິທີມີ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ,ທ່ານນາງ ພົມມາ ແກ້ວມີ ໄຊກົງສູນໃຫຍ່ ສປປ ລາວ ປະຈຳນະຄອນໂຮ່ຈິມິນ ສສ ຫວຽດນາມ, ທ່ານ ຫວູແອັງຢຸງ ກົງສູນ ໃຫຍ່ ສສ ຫວຽດນາມ ປະຈຳແຂວງສະຫວັນນະເຂດ, ມີທ່ານຮອງຫົວໜ້າກົມສົ່ງເສີມການຄ້າ, ທ່ານ ທູດການຄ້າສະ ຖານທູດແຫ່ງ ສສ ຫວຽດນາມ ປະຈຳຢູ່ ສປປ ລາວ, ມີພະແນກອຸດສາຫະກຳ-ການຄ້າແຂວງສະຫວັນນະເຂດ ແລະນະຄອນໂຮ່ຈິມິນ ແລະ ພະແນກການຕ່າງໆອ້ອມຂ້າງແຂວງ, ພາກສ່ວນຜູ້ປະກອບການແລະນັກທຸລະກິດເຂົ້າຮ່ວມ.

  ທ່ານ ຝ້າມ ທຽດ ຮວາ ຫົວໜ້າສູນສົ່ງເສີມການຄ້າ ແລະການລົງທຶນນະຄອນໂຮ່ຈິມິນກ່າວວ່າ: ງານດັ່ງກ່າວນີ້ແມ່ນເປັນການປະກອບສ່ວນຊຸກຍູ້ສາຍພົວພັນມິດຕະ ພາບການຮ່ວມມືລະຫວ່າງນະຄອນໂຮ່ຈິມິນກັບແຂວງສະຫວັນນະເຂດ, ທັງເປີດໂອກາດໃຫ້ພາກສ່ວນນັກທຸລະກິດ, ວິສາຫະກິດ 2 ປະເທດໄດ້ມີການພົບປະແລກປ່ຽນ ແລະຊອກຫາຄູ່ຮ່ວມມືພົວພັນດ້ານ ການຄ້າໃຫ້ກວ້າງອອກບໍ່ສະເພາະແຕ່ແຂວງສະຫວັນນະເຂດເທົ່ານັ້ນຫາກຍັງກວມເອົາບັນດາແຂວງພາກໃຕ້ຂອງລາວອີກດ້ວຍ, ໃນ ປີ 2017 ແລະ 2018 ສູນສົ່ງເສີມການຄ້າ-ການລົງທຶນນະຄອນໂຮ່ຈິມິນ ກໍ່ໄດ້ຈັດງານວາງສະແດງສິນຄ້າຢູ່ແຂວງສະຫວັນນະເຂດມາແລ້ວ ແລະກໍ່ໄດ້ຮັບການຕອບ ຮັບເປັນຢ່າງດີຈາກພາກທຸລະກິດ ແລະປະຊາຊົນຊາວສະຫວັນນະເຂດເພາະສິນຄ້າຈາກ ສສ ຫວຽດນາມ ກໍ່ເປັນສິນຄ້າທີ່ດີ, ມີຄຸນນະພາບ ໄດ້ມາດຕະຖານ, ຊຶ່ງການຈັດ ງານຄັ້ງທີ III ນີ້ ກໍ່ໄດ້ມີບັນດາຫົວ ໜ່ວຍທຸລະກິດຫ້າງຮ້ານຕ່າງໆ ເຂົ້າຮ່ວມເພີ່ມຂຶ້ນຈາກ 200 ຮ້ານ ໃນປີກ່ອນມາເປັນ 250 ຮ້ານ, 320 ວິສາຫະກິດໃນນີ້ມາຈາກ ຫວຽດນາມ 200 ຮ້ານ ແລະມາ ຈາກບັນດາບໍລິສັດ, ຫົວໜ່ວຍທຸ ລະກິດ ແລະບັນດາເມືອງຕ່າງໆ ຂອງແຂວງສະຫວັນນະເຂດ 50 ຮ້ານ, ໂດຍປະກອບມີກຸ່ມທຸລະກິດຄື: ອຸດສາຫະກຳຕັດຫຍິບ, ເກີບ, ເຄື່ອງຢາງ, ຢາງພາລາ, ເຄື່ອງຈັກ, ຜະລິດຕະພັນກະສິກຳ, ອາຫານ, ເຄື່ອງເອເລັກໂຕຣນິກ, ເຄື່ອງໃຊ້ໄຟຟ້າ, ເຄື່ອງເຟີນີເຈີ, ເຄື່ອງຕົບແຕ່ງພາຍໃນເຮືອນ, ເຄື່ອງຫັດຖະກຳທີ່ລະນຶກ, ວັດສະດຸກໍ່ສ້າງ, ການບໍລິການ-ການທ່ອງທ່ຽວ, ການເງິນ, ການຂົນສົ່ງ ແລະອື່ນໆ.

  ໂອກາດດັ່ງກ່າວ ທ່ານ ສີທົນ ນັນທະລາດ ຫົວໜ້າພະແນກອຸດສາຫະກຳ-ການຄ້າແຂວງສະຫວັນນະເຂດ ໃນນາມຕາງໜ້າໃຫ້ແກ່ເຈົ້າພາບກໍໄດ້ໃຫ້ກຽດກ່າວຕ້ອນ ຮັບແຂກທີ່ເຂົ້າຮ່ວມ ແລະໄດ້ຍົກໃຫ້ເຫັນສາຍພົວພັນຮ່ວມມືດ້ານການຄ້າ, ການລົງທຶນລະຫວ່າງ ແຂວງສະຫວັນນະເຂດ ກັບນະຄອນໂຮ່ຈິມິນຕື່ມອີກ.

----------------

ໜັງສືພິມເສດຖະກິດ-ສັງຄົມ

แชร์