ແຂວງ ທີ່ຖືກນໍ້າຖ້ວມສ່ຽງສູງຕໍ່ໄຂ້ຍຸງ ດຽວນີິ້ຕົວເລກຕິດເຊື້ອທົ່ວປະເທດ 33 ພັນຄົນ

ປະຈຸບັນເຖິງແມ່ນວ່າໃກ້ຈະສິ້ນສຸດລະດູຝົນແລ້ວກໍຕາມ, ແຕ່ຈຳນວນຜູ້ເປັນໄຂ້ຍຸງລາຍໃນຂອບເຂດທົ່ວປະເທດກໍຍັງມີຢູ່, ຊຶ່ງເຫັນໄດ້ໃນການເກັບກຳສະເພາະວັນທີ 29 ກັນຍາ 2019 ທົ່ວປະເທດມີຜູ້ຕິດເຊື້ອໃໝ່ 15 ຄົນ ແລະເຮັດໃຫ້ຕົວເລກທີ່ເກັບກຳມາແຕ່ຕົ້ນປີເພີ່ມເປັນ33,19 ພັນຄົນ ແລະເສຍຊີວິດແລ້ວ 66 ຄົນ, ໃນນັ້ນເສຍຊີວິດຫຼາຍກວ່າໝູ່ແມ່ນຢູ່ນະຄອນຫຼວງວຽງຈັນ, ຂະນະທີ່ແຂວງທີ່ໜ້າເປັນຫ່ວງຍັງແມ່ນເຂດນໍ້າຖ້ວມຂອງພາກໃຕ້.

ໄຂ້ຍຸງລາຍແມ່ນພະຍາດຊະນິດໜຶ່ງທີ່ມີການລະບາດໜັກສຸດໃນໄລຍະລະດູຝົນ, ໂດຍເຫັນໄດ້ຈາກການເກັບກຳຂອງໜ່ວຍງານທີ່ກ່ຽວຂ້ອງເລີ່ມແຕ່ທ້າຍປີ 2018 ເປັນຕົ້ນມາຈົນເຖິງຊ່ວງເດືອນມິຖຸນາຈະເຫັນວ່າໂຕເລກຜູ້ເປັນໄຂ້ຍຸງມີພຽງ 11 ພັນກວ່າຄົນ, ມີຜູ້ເສຍຊີວິດ 25 ຄົນ ແລະຜ່ານມາພຽງ 3 ເດືອນກໍຄືມາຮອດທ້າຍເດືອນກັນຍາ ທົ່ວປະເທດ ທີ່ຜູ້ເປັນໄຂ້ຍຸງທັງໝົດ 33,19 ພັນຄົນ, ເສຍຊີວິດ 66 ຄົນ, ໃນນັ້ນ ແຂວງທີ່ເປັນ ຫຼາຍ ແລະມີການເສຍຊີວິດຫຼາຍກວ່າໝູ່ແມ່ນນະຄອນຫຼວງວຽງຈັນ ມີເຖິງ 8,39 ພັນຄົນ ແລະ ເສຍຊີວິດ 21 ຄົນ, ຮອງລົງມາແມ່ນແຂວງສະຫວັນນະເຂດ ມີ 5,82 ພັນຄົນທີ່ເປັນໄຂ້ຍຸງ, ເສຍຊີວິດ 20 ຄົນ, ແຂວງຈຳປາສັກຕິດເຊື້ອໄຂ້ຍຸງ 3,12 ພັນຄົນເສຍຊີວິດ 6 ຄົນ, ນອກນັ້ນກໍຍັງມີແຂວງສາລະວັນ ແລະຄຳມ່ວນທີ່ມີຕົວເລກຜູ້ເປັນໄຂ້ຍຸງໃນລະດັບ 3 ພັນກວ່າຄົນຂຶ້ນໄປ, ແຕ່ລະ ດັບການເສຍຊີວິດແມ່ນ 4 ຄົນ, ສ່ວນ ແຂວງພາກເໜືອທີ່ມີການລະບາດຫຼາຍ ແມ່ນຫຼວງນ້ຳທາ ແລະແຂວງຫຼວງພະ ບາງ ໃນລະດັບ 1 ພັນກວ່າຄົນ ແຕ່ບໍ່ມີຜູ້ເສຍຊີວິດ, ສຳລັບແຂວງອື່ນໆກໍມີການລະບາດເຊັ່ນກັນແຕ່ເມື່ອສົມທຽບແລ້ວເຫັນວ່າຍັງບໍ່ຮ້າຍແຮງ.

  ຢ່າງໃດກໍຕາມ, ເຖິງວ່າປະຈຸບັນພວມຢູ່ໃນໄລຍະໃກ້ຈະສິ້ນສຸດລະດູຝົນແລ້ວ, ຊຶ່ງບາງແຂວງກໍສາມາດຄວບຄຸມບໍ່ໃຫ້ມີການລະບາດຂອງພະຍາດໄຂ້ຍຸງລາຍໄດ້,ແຕ່ບາງແຂວງກໍຍັງປະກົດໃຫ້ເຫັນ ຢູ່ ໂດຍສະເພາະແມ່ນບັນດາແຂວງທີ່ໄດ້ ຮັບຜົນກະທົບຈາກໄພນ້ຳຖ້ວມໃນໄລ ຍະຜ່ານມາ ຕົ້ນຕໍຄື ແຂວງສາລະວັນ ແລະ ຈຳປາສັກ, ຊຶ່ງເປັນແຂວງທີ່ໄດ້ຮັບ ຜົນກະທົບໜັກ ແລະພວມຢູ່ໃນໄລຍະ ຂອງການຟື້ນຟູສ້ອມແປງ, ສະນັ້ນ ຫາກ ບໍ່ມີການເອົາໃຈໃສ່ໃນການປົກປັກຮັກສາສະພາບແວດລ້ອມ ຫຼື ທຳລາຍແຫ່ຼງ ເພາະພັນຂອງໜອນນ້ຳຍຸງລາຍແລ້ວ ກໍອາດຈະເຮັດໃຫ້ພະຍາດດັ່ງກ່າວມີການລະບາດເພີ່ມຂຶ້ນຕື່ມ ແລະນອກຈາກສອງແຂວງທີ່ກ່າວມານັ້ນບັນດາແຂວງອື່ນໆກໍບໍ່ໃຫ້ຖືເບົາຕ້ອງໝັ່ນກວດກາ ແລະສືບຕໍ່ທຳລາຍແຫຼ່ງເພາະພັນຂອງຍຸງລາຍຄືກັນທັງນີ້ກໍເພື່ອບໍ່ໃຫ້ພະຍາດຊະນິດນີ້ກັບມາລະບາດອີກຄັ້ງ.

---------------

ໜັງສືພິມເສດຖະກິດ-ສັງຄົມ

แชร์