ລາວ ຍື່ນສານເຂົ້າຮ່ວມເປັນພາຄີ ແລະສານໃຫ້ສັດຕະຍາບັນຕໍ່ສົນທິສັນຍາ ສປຊ

  ໃນໂອກາດເຂົ້າຮ່ວມກອງປະຊຸມສະມັດຊາໃຫຍ່ຂອງອົງການສະຫະປະຊາຊາດສະໄໝທີ74 ທີ່ ນິວຢອກ,ສະຫະລັດອາເມລິກາ,ທ່ານສະເຫຼີມໄຊກົມມະສິດລັດ ຖະມົນຕີກະຊວງການຕ່າງປະເທດ,ໄດ້ຕາງໜ້າໃຫ້ລັດຖະບານແຫ່ງ ສປປ ລາວຍື່ນສານເຂົ້າຮ່ວມເປັນພາຄີສົນທິສັນຍາສະຫະປະຊາຊາດວ່າດ້ວຍສັນຍາຊື້-ຂາຍສິນຄ້າລະຫວ່າງປະເທດ (The United Nations Convention onContracts forInternationalSales of Goods)ແລະຍື່ນສານໃຫ້ສັດຕະຍາບັນຕໍ່ສົນທິສັນຍາວ່າດ້ວຍການເກືອດຫ້າມອາວຸດນິວເຄຣຍ (Treaty on the Prohibition of Nuclear Weapons) ໃຫ້ແກ່ທ່ານMig uelde Serpa Soares ຮອງເລຂາທິການໃຫຍ່ ສປຊ ຜູ້ຮັບຜິດຊອບວຽກງານກົດໝາຍທັງເປັນທີ່ປຶກສາທາງດ້ານກົດໝາຍຂອງອົງການ ສປຊ ໃນວັນ ທີ 24 ແລະ 26 ກັນຍາ 2019 ຕາມລຳດັບ.

  ສົນທິສັນຍາສະຫະປະຊາຊາດ ວ່າດ້ວຍສັນຍາຊື້-ຂາຍສິນຄ້າລະ ຫວ່າງປະເທດໄດ້ຖືກຮັບຮອງເອົາ ໃນປີ 1980 ທີ່ນະຄອນຫຼວງວຽນ,ປະເທດໂອຕຣິດ ແລະມີຜົນສັກສິດ ໃນປີ 1988 ໂດຍມີຈຸດປະສົງເພື່ອ ກໍານົດລະບຽບການຊື້-ຂາຍສິນຄ້າ ລະຫວ່າງປະເທດລວມທັງພັນທະຂອງຜູ້ຊື້-ຜູ້ຂາຍ,ປະຈຸບັນ,ມີປະເທດເຂົ້າເປັນພາຄີທັງໝົດ 89 ປະເທດ, ການເຂົ້າຮ່ວມສົນທິສັນຍາດັ່ງກ່າວແມ່ນມີຄວາມສໍາຄັນເນື່ອງຈາກເປັນໂອກາດດີໃຫ້ບັນດາປະເທດພາຄີສາມາດນຳໃຊ້ບົດບັນຍັດພາຍໃຕ້ສົນທິ ສັນຍາດັ່ງກ່າວເປັນພື້ນຖານ ແລະເປັນບ່ອນອີງໃນການເຮັດສັນຍາຊື້-ຂາຍລະຫວ່າງປະເທດຊຶ່ງຈະຫຼຸດຜ່ອນຄວາມຫຍຸ້ງຍາກ ແລະຄວາມສ່ຽງໃນການເລືອກໃຊ້ກົດ ໝາຍ ຫຼື ສັນ ຍາທີ່ບໍ່ເປັນມາດຕະຖານດຽວກັນ ລະຫວ່າງຜູ້ຊື້-ຜູ້ຂາຍ; ນອກຈາກ ນັ້ນ,ກໍຈະເຮັດໃຫ້ ສປປ ລາວ ປັບ ປຸງລະບົບກົດໝາຍຂອງຕົນໃຫ້ ເປັນສາກົນຫຼາຍຂຶ້ນດ້ວຍການນຳໃຊ້ມາດຕະຖານດຽວກັນຂອງຄູ່ ສັນຍາ, ໂດຍສະເພາະໃນປະຈຸບັນທີ່ ສປປ ລາວ ຍັງບໍ່ທັນມີກົດໝາຍສະເພາະກ່ຽວກັບການຊື້-ຂາຍລະຫວ່າງປະເທດ, ເປັນຕົ້ນແມ່ນດ້ານ ສິດ ແລະພັນທະຂອງຄູ່ຄ້າທີ່ຢູ່ຄົນລະປະເທດລວມທັງກົນໄກໃນການແກ້ໄຂຂໍ້ຂັດແຍ່ງກ່ຽວກັບການຊື້-ຂາຍລະຫວ່າງປະເທດ.

  ສົນທິສັນຍາວ່າດ້ວຍການເກືອຫ້າມອາວຸດນິວເຄຣຍ ໄດ້ຖືກຮັບຮອງເອົາໃນກອງປະຊຸມສະມັດຊາໃຫຍ່ ສປຊ ສະໄໝທີ 72 ໃນປີ 2017 ພາຍຫຼັງສໍາເລັດຂະບວນ ການເຈລະຈານັບແຕ່ປີ 2010 ເປັນຕົ້ນມາ,ສົນທິສັນຍາດັ່ງກ່າວ ໄດ້ເປີດໃຫ້ປະເທດສະມາຊິກ ສປຊ ລົງນາມເປັນພາຄີໃນວັນທີ 20 ກັນຍາ2017 ທີ່ສໍານັກງານໃຫຍ່ຂອງອົງການ ສປຊ, ປະຈຸ ບັນມີ  79 ປະເທດໄດ້ລົງນາມ ແລະ ໃນນັ້ນມີ  ຶ32 ປະເທດໃຫ້ສັດຕະຍາບັນ,ພາຍຫຼັງ 50 ປະເທດໄດ້ໃຫ້ສັດຕະຍາບັນ,ສົນທິສັນຍາດັ່ງກ່າວຈະມີຜົນບັງຄັບໃຊ້ພາຍໃນ 90 ວັນ,ຈຸດປະສົງຫຼັກຂອງສົນທິສັນຍານີ້ແມ່ນເພື່ອເກືອດຫ້າມອາວຸດນິວເຄຣຍຄືຫ້າມບໍ່ໃຫ້ມີການພັດທະນາ, ທົດລອງ, ຜະລິດ, ຄອ ບຄອງ, ສະສົມ, ສົ່ງຕໍ່, ຮັບເອົາ ຫຼື ນຳໃຊ້ຢູ່ໃນດິນ ແດນຂອງຕົນ; ການໃຫ້ສັດຕະຍາບັສົນທິສັນຍາດັ່ງກ່າວຂອງ ສປປ ລາວ ແມ່ນສະແດງໃຫ້ເຫັນເຖິງຄວາມໝາຍໝັ້ນທາງດ້ານການ ເມືອງອັນສະເໝີຕົ້ນສະເໝີປາຍທີ່ຢາກສ້າງໃຫ້ໂລກນີ້ປອດອາວຸດນິວເຄຣຍ,ກໍຄືເປັນການປະກອບສ່ວນສະໜັບສະໜູນຄວາມພະຍາຍາມຂອງວົງຄະນາຍາດສາກົນກ່ຽວກັບການເກືອດຫ້າມ ແລະ ການລຶບລ້າງອາວຸດນິວເຄຣຍທີ່ເປັນໄພຂົ່ມຂູ່ອັນຮ້າຍແຮງຕໍ່ມວນມະນຸດໃນໂລກ.

--------------

 ໜັງສືພິມເສດຖະກິດ-ສັງຄົມ

แชร์