ສະຫຼອງວັນຕ້ານພະຍາດວໍ້ໂລກ

  ວັນທີ 27 ກັນຍາ ທີ່ສວນເຈົ້າຟ້າງຸ່ມ ນະຄອນຫຼວງວຽງຈັນ ກະຊວງສາທາລະນະສຸກຮ່ວມກັບກະຊວງກະສິກໍາ ແລະປ່າໄມ້ໄດ້ຈັດພິທີໂຮມຊຸມນຸມສະເຫຼີມສະຫຼອງວັນຕ້ານພະຍາດວໍ້ໂລກ 2019 ພາຍໃຕ້ຫົວຂໍ້ “ສັກຢາກັນພະຍາດ ເພື່ອກໍາຈັດພະຍາດວໍ້” ໂດຍການເຂົ້າຮ່ວມຂອງ ທ່ານ ພູທອນ ເມືອງປາກ ຮອງລັດຖະມົນຕີກະຊວງ ສາທາລະນະສຸກ, ທ່ານ ບຸນຂວາງຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະປ່າໄມ້, ທ່ານ ດຣ ມາກ ຈາຄ໋ອບ ຜູ້ຕາງໜ້າອົງການອະນາໄມໂລກປະຈໍາລາວ, ທ່ານ Nasar HAYAT ຜູ້ຕາງໜ້າອົງການອາຫານ ແລະການກະເສດໂລກ,ມີບັນດາຫົວໜ້າກົມ, ຮອງກົມ,ຫົວໜ້າພະແນກ,ຮອງພະແນກ, ອໍານາດການປົກຄອງບ້ານ, ນັກຮຽນນັກສຶກສາພ້ອມດ້ວຍມວນຊົນເຂົ້າຮ່ວມ.

  ດັ່ງທີ່ທ່ານຮູ້ນໍາກັນແລ້ວວ່າ: ພະຍາດວໍ້ແມ່ນພະຍາດທີ່ຮ້າຍແຮງບໍ່ວ່າຄົນ ຫຼືສັດຖ້າເປັນພະຍາດວໍ້ຈະບໍ່ສາມາດປິ່ນປົວໃຫ້ຫາຍຂາດໄດ້ແຕ່ສາມາດປ້ອງກັນໄດ້ພະຍາດວໍ້ໄດ້ເກີດຂຶ້ນ ແລະ ແຜ່ກະຈາຍໄປທົ່ວໂລກທັງເປັນໄພຂົ່ມຂູ່ຕໍ່ສຸຂະພາບຂອງຄົນແລະສັດມາເປັນພັນປີມາແລ້ວສາເຫດທີ່ພາໃຫ້ເກີດເປັນວໍ້ຍ້ອນຖືກໝາ ຫຼື ແມວທີ່ຕິດເຊື້ອວໍ້ກັດ ຫຼື ຂູດສະນັ້ນສາກົນຈຶ່ງໄດ້ກໍ່ຕັ້ງວັນຕ້ານພະຍາດວໍ້ໂລກຂຶ້ນເພື່ອໃຫ້ທຸກຄົນເຫັນຄວາມສໍາຄັນຂອງພະຍາດວໍ້ ແລະລະລຶກເຖິງຄຸນງາມຄວາມດີຂອງ ທ່ານ ຫລຸຍ ປາສຕິຈຶ່ງກໍານົດເອົາວັນທີ 28 ກັນຍາ ຊຶ່ງເປັນວັນເກີດຂອງທ່ານ ຫຼຸຍ ປາສຕິ ເປັນວັນຕ້ານພະຍາດວໍ້ໂລກ ແລະເພື່ອເປັນການເຜີຍແຜ່ຂໍ້ມູນຂ່າວສານ ແລະປູກຈິດສໍານຶກປະຊາຊົນທຸກພາກສ່ວນໃຫ້ມີຄວາມເຂົ້າໃຈກ່ຽວກັບພະຍາດວໍ້ ແລະໃຫ້ການຮ່ວມມືຕ້ານພະຍາດວໍ້ໃຫ້ນັບມື້ນັບຫຼາຍຂຶ້ນ.

  ໃນ ສປປ ລາວ ແມ່ນມີການລະບາດທຸກໆປີເນື່ອງຈາກວ່າສະພາບການລ້ຽງໝາ, ແມວ ຍັງເປັນແບບການລ້ຽງປະປ່ອຍຕາມໝູ່ບ້ານການສັກຢາປ້ອງກັນແມ່ນຍັງມີເປີ ເຊັນຕໍ່າໃນໄລຍະ 4 ປີຜ່ານມາການສັກຢາປ້ອງກັນສະເລ່ຍໄດ້ພຽງ 95.000 ໂຕຕໍ່ປີຈາກສະຖິຕິໝາ, ແມວ 814.347 ໂຕ ຊຶ່ງປີນີ້ຄາດວ່າຈະສັກໃຫ້ໄດ້ຈໍານວນ 2 ພັນເຂັມ, ສໍາລັບການກວດພົບເຊື້ອຢູ່ຫຼາຍແຂວງເປັນຕົ້ນ: ແຂວງຊຽງຂວາງ, ຫຼວງພະບາງ, ໄຊຍະບູລີ, ໄຊສົມບູນ, ນະຄອນຫຼວງ, ບໍລິຄໍາໄຊ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະອັດຕະປື.

------------

ຂ່າວ: ວົງມະນີ

แชร์