ຫຼາຍພາກສ່ວນຍັງສືບຕໍ່ໃຫ້ການຊ່ວຍເຫຼືອຜູ້ປະຊົບໄພນໍ້າຖ້ວມ

ວັນທີ 27 ກັນຍາ 2019, ທີ່ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ມີ 2 ພາກສ່ວນ ຈາກບໍລິສັດເມືອງໂຂງຄຣີນ ເອເນີຈີ ຈໍາກັດ ແລະຄະນະສະ ຫະພັນແມ່ຍິງກະຊວງການຕ່າງປະເທດມາມອບເງິນຈຳນວນ 5 ແສນບາດ ຫຼືປະມານ 140 ລ້ານກີບ ກັບອີກ 26 ລ້ານກີບ, ໃຫ້ກະຊວງ ຮສສ ເພື່ອນຳໄປຊ່ວຍເຫຼືອປະຊາຊົນຜູ້ ໄດ້ຮັບຜົນກະທົບຈາກໄພນໍ້າຖ້ວມ, ຊຶ່ງຕາງໜ້າບໍລິສັດມອບແມ່ນທ່ານ ສຸຣະສັກ ໃຈເຢັນ ຄະນະບໍລິຫານງານບໍລິສັດເມືອງໂຂງ ຄຣີນ ເອເນີຈີ ຈໍາກັດ ແລະຕາງໜ້າຄະນະສະຫະພັນແມ່ຍິງມອບໂດຍທ່ານ ນາງ ວັນເພັງ ໄຊສົມພູ ຮອງປະທານສະຫະພັນແມ່ຍິງກະຊວງການຕ່າງປະເທດ ແລະຕາງໜ້າຮັບແມ່ນທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ທັງເປັນປະທານຄະນະກຳມະການປ້ອງກັນ ແລະຄວບຄຸມໄພພິບັດແຫ່ງຊາດ. 

  ທ່ານ ສຸຣະສັກ ໃຈເຢັນ ກ່າວວ່າ: ພາຍຫຼັງທີ່ຮູ້ຂ່າວວ່າພາກກາງ ແລະ ພາກໃຕ້ຂອງລາວໄດ້ຮັບຜົນກະທົບກໍຄືໄພນໍ້າຖ້ວມ, ທາງບໍລິສັດໄດ້ມີຄວາມເປັນຫ່ວງເປັນໄຍຕໍ່ກັບຜູ້ປະສົບໄພ, ພ້ອມນັ້ນກໍຢາກ ເປັນສ່ວນໜຶ່ງໃນການແບ່ງເບົາຄວາມທຸກໂສກແລະປະກອບສ່ວນຊ່ວຍເຫຼືອເທົ່າທີ່ຈະເຮັດໄດ້ເປັນຕົ້ນແມ່ນເງິນ ຫຼື ວັດຖຸສິ່ງຂອງອັນໃດທີ່ເຫັນວ່າຈຳເປັນ ແລະຍັງມີຄວາມຕ້ອງການກໍສາມາດແຈ້ງມາ ໄດ້, ທັງນີ້ກໍເພື່ອເຮັດແນວໃດໃຫ້ວິກິດການຄັ້ງນີ້ຂອງປະຊາຊົນໃນ 6 ແຂວງ ຜ່ານພົ້ນໄປໄດ້ດ້ວຍດີແລະການນຳເອົາ ເງິນສົດຈຳນວນ 5 ແສນບາດ ຫຼື ປະ ມານ 140 ລ້ານກີບ ມາມອບໃຫ້ກັບກະຊວງເທື່ອນີ້ກໍເພື່ອໃຫ້ກະຊວງນຳໄປຈັດສັນເຂົ້າໃນການແກ້ໄຂໄພພິບັດໂດຍ ສະເພາະໃນວຽກງານທີ່ຈຳເປັນ ແລະ ຮີບດ່ວນ, ລວມທັງການແກ້ໄຂໃນໄລຍະຍາວອີກດ້ວຍ.

  ທ່ານ ນາງ ວັນເພັງ ໄຊສົມພູ ກ່າວວ່າ: ຄະນະສະພັນແມ່ຍິງກະຊວງການຕ່າງປະເທດກໍແມ່ນໜ່ວຍງານໜຶ່ງທີ່ໄດ້ເປັນຄວາມສຳຄັນ ແລະ ຄວາມຈຳເປັນໃນການປະ ກອບສ່ວນຊ່ວຍເຫຼືອຜູ້ປະສົບ ໄພໃນເຂດພາກກາງ ແລະພາກໃຕ້ ໂດຍ ສະເພາະໃນ 6 ແຂວງທີ່ໄດ້ຮັບຜົນກະ ທົບໜັກຄັ້ງນີ້, ດັ່ງນັ້ນ ຄະນະສະຫະ ພັນແມ່ຍິງກະຊວງ ກໍໄດ້ມີການລະດົມເພື່ອສົມທົບທຶນໂດຍຮ່ວມກັບຫຼາຍພາກສ່ວນທີ່ກ່ຽວຂ້ອງຈຶ່ງໄດ້ເງິນຈຳນວນ 26 ລ້ານກີບ ທີ່ນຳມາມອບໃຫ້ກັບກະຊວງ ຮສສ ເທື່ອນີ້, ສ່ວນການຈັດ ຕັ້ງປະຕິບັດກໍຄືການແກ້ໄຂຊ່ວຍປະຊາຊົນໃນແຂວງພາກກາງ ແລະພາກໃຕ້ເພື່ອຊ່ວຍໃຫ້ພາກເຂົາເຫຼົ່ານັ້ນຜ່ານພົ້ນວິກິດແລະກັບຄືນສູ່ສະພາບປົກກະຕິໂດຍໄວ.

 ໂອກາດດຽວກັນນັ້ນ, ທ່ານ ຄຳແພງ ໄຊສົມແພງ ກໍໄດ້ສະແດງຄວາມຂອບໃຈຕໍ່ກັບສອງພາກສ່ວນທີ່ນຳເງິນມາມອບເທື່ອນີ້, ພ້ອມດຽວກັນນັ້ນກໍຍັງໃຫ້ຄຳໝັ້ນວ່າ ລັດ ຖະບານກໍຄືກະຊວງຈະນຳໃຊ້ເງິນທຸກກີບເຂົ້າໃນການແກ້ໄຂໄພພິບັດທັງໄລຍະບັນເທົາທຸກສຸກເສີນ ແລະ ໄລຍະຂອງການຟື້ນຟູໃຫ້ເກີດປະໂຫຍດສູງສຸດ, ລັດຖະບານຈະສູ້ຄຽງຂ້າງປະ ຊາຊົນຜູ້ທີ່ໄດ້ຮັບຜົນກະທົບຈາກເຫດ ການຊຸດນີ້ໃຫ້ສາມາດພົ້ນຜ່ານວິກິດໄປໄດ້, ສ່ວນເຄື່ອງບໍລິຈາກທີ່ໄດ້ຮັບໃນປີນີ້, ທາງກະຊວງແມ່ນໄດ້ມີການຈັດສັນແບ່ງປັບໃຫ້ກັບບັນດາແຂວງທີ່ໄດ້ຮັບຜົນກະທົບຕາມເຫັນສົມຄວນ, ແຕ່ເຖິງຢ່າງໃດກໍຕາມຄວາມເສຍຫາຍຈາກໄພພິບັດທີ່ເກີດຂຶ້ນໃນປີນີ້ເປັນລັກສະນະວົງກວ້າງ, ດັ່ງ ນັ້ນເພື່ອສຸມໃສ່ແກ້ໄຂ ແລະການຟື້ນຟູຄືນໃໝ່ເຫັນວ່າຍັງມີຄວາມຕ້ອງການຫຼາຍໂດຍສະເພາະງົບປະມານ ແລະ ຄວາມຕ້ອງການດ້ານອື່ນໆຕົ້ນຕໍແມ່ນເຂົ້າ, ນໍ້າ, ອາ ຫານ, ຢາປົວພະຍາດຕະຫຼອດຮອດເຄື່ອງໃຊ້ໃນຄົວເຮືອນຕ່າງໆລ້ວນແລ້ວແຕ່ຕ້ອງການໝົດ.

  ຂ່າວຍັງໃຫ້ຮູ້ຕື່ມອີກວ່າໃນວັນທີ 26 ກັນຍາ ທີ່ກະຊວງ ຮສສ ຍັງມີການຮັບ ເຂົ້າຊ່ວຍເຫຼືອຈາກຫ້ອງວ່າການປະທານປະເທດຕື່ມອີກຈຳນວນ 2 ໂຕນ ມູນຄ່າ 15 ລ້ານກີບ.

--------------------

ໜັງສືພິມເສດຖະກິດ-ສັງຄົມ

แชร์