ມອບ-ຮັບສູນພາສາຍີ່ປຸ່ນ ທີ່ໂຮງຮຽນ ມສ ໜອງບອນ

  ລັດຖະບານຍີ່ປຸນ ໄດ້ມອບ ຮັບສູນພາສາຍີ່ປຸ່ນຢູ່ທີ່ໂຮງຮຽນມັດທະຍົມສຶກສາສົມບູນໜອງ ບອນ,ນະຄອນຫຼວງວຽງຈັນ,ຊຶ່ງໄດ້ຮັບທຶນສະໜັບສະໜູນ ແລະກໍ່ສ້າງຄືພາຍໃຕ້ໂຄງການຊ່ວຍເຫຼືອລ້າດ້ານວັດທະນະທຳຂັ້ນຮາກຖານຈາກລັດຖະບານ ແລະປະຊາຊົນຍີ່ປຸ່ນ (CGP),ພິທີມອບຮັບຢ່າງເປັນທາງການເພື່ອເປັນ ການສະເຫຼີມສະຫຼອງນີ້ແມ່ນໄດ້ຈັດຂຶ້ນໃນວັດທີ 26 ກັນຍາ 2019, ໂດຍການເຂົ້າຮ່ວມຂອງທ່ານ ບົວລານສິລິປັນຍາຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ ເຄໂຊ ທາເກວະກະເອກອັກຄະຣາຊະທູດຍີ່ປຸ່ນປະຈຳສປປ ລາວ ແລະພະນັກງານລັດ,ພາກສ່ວນທີ່ກ່ຽວຂ້ອງ,ຂໍ້ຕົກລົງ ສຳລັບໂຄງການດັ່ງກ່າວແມ່ນໄດ້ຖືກເຊັນຮັບຮອງໃນທຶນຈຳນວນ 89.195 ໂດລາ ໃນເດືອນມັງ ກອນ 2019.

ຈຸດປະສົງຂອງໂຄງການດັ່ງ ກ່າວແມ່ນເພື່ອປັບປຸງສະພາບແວດ ລ້ອມການສຶກສາ ໂດຍການສ້ອມແປງອາຄານເກົ່າ ແລະຍົກລະດັບເຄື່ອງອຳນວຍຄວາມສະດວກ ຕ່າງໆ ໂດຍເຮັດໃຫ້ຫ້ອງຮຽນ,ຫ້ອງກິດຈະກຳ ແລະຫ້ອງກຽມ ສອບພາສາຍີ່ປຸ່ນຂອງອາຈານໃຫ້ມີອຸປະກອນການຮຽນ-ການສອນຢ່າງຄົບສຸດໃນຂອບເຂດຂອງໂຮງຮຽນດັ່ງກ່າວ.

ໃນປະຈຸບັນນີ້ ມີໂຮງຮຽນມັດທະຍົມ 4 ແຫ່ງ ໃນນະຄອນຫຼວງ ວຽງຈັນ, ລວມທັງມັດທະຍົມສຶກສາສົມບູນໜອງບອນທີ່ໄດ້ນຳເອົາຫຼັກສູນພາສາຍີ່ປຸ່ນເຂົ້າມາສອນຫຼັງຈາກທີ່ລັດຖະບານລາວໄດ້ຕົກລົງເອົາພາສາຍີ່ປຸ່ນເປັນໜຶ່ງໃນພາສາຕ່າງປະເທດທີສອງໃນຫຼັກສູດການສຶກສາລະດັບສາມັນໃນປີ 2011, ໃນເດືອນນີ້ຄູຜູ້ຊ່ວຍສອນພາສາຍີ່ປຸ່ນທັງ 3 ຄົນກໍ່ໄດ້ຖືກສົ່ງມາປະຈຳການເພື່ອພາລະກິດຂອງ ພວກເຂົາໃນໂຮງຮຽນມັດທະຍົມສຶກສາສົມບູນທັງ 4 ແຫ່ງນີ້ ໂດຍ ມູນນິທິຍີ່ປຸ່ນ, ໂຄງການດັ່ງກ່າວ ແມ່ນຖືກຄາດຫວັງເປັນຢ່າງຍິ່ງວ່າ ການຍົກລະດັບຂອງໂຮງຮຽນມັດທະຍົມສຶກສາໜອງບອນນີ້ຈະເພີ່ມຈຳນວນນັກຮຽນທີ່ຮຽນພາສາຍີ່ ປຸ່ນໄດ້ໃນຕໍ່ໜ້າຢູ່ໃນ ສປປ ລາວ.

ທ່ານ ທາເກວະກະໄດ້ເນັ້ນເຖິງຄວາມສຳຄັນຂອງໂຄງການປັບປຸງທີ່ໄດ້ປະສົບຜົນສຳເລັດ ແລະ ທ່ານຍັງຄາດຫວັງວ່າສູນພາສາຍີ່ປຸ່ນຢູ່ໂຮງຮຽນມັດທະຍົມສຶກສາສົມບູນໜອງບອນນີ້ຈະຖືກນຳໃຊ້ຢ່າງມີປະສິດຕິພາບ ແລະຮັກສາໄວ້ໃນສະພາບທີ່ດີຢ່າງດົນນານລວມທັງເປັນຖານໃນການແນະນຳກ່ຽວກັບຍີ່ປຸ່ນໃນຂົງເຂດດັ່ງກ່າວອີກດ້ວຍ.

--------------------

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์