ໄຟໄໝ້ເຮືອນເສຍຫາຍ 1 ຫຼັງຢູ່ບ້ານດອນສຳພັນ

  ເວລາປະມານ 8:30 ນາທີ ຂອງວັນທີ 23 ກັນຍາ 2019 ໄດ້ເກີດເຫດໄຟໄໝ້ເຮືອນຂອງ ທ້າວ ບຸນໄຊ ອາຍຸ 54 ປີ ຢູ່ບ້ານດອນສຳພັນ ແຂວງຫຼວງນໍ້າທາເສຍ ຫາຍທັງຫຼັງພ້ອມນີ້ກໍຍັງມີເລົ້າເຂົ້າ, ຄຳເຄິ່ງບາດ, ເງິນໝັນ 10 ໝັນ, ເງິນກີບ 1,5 ລ້ານກີບ, ໂທລະພາບ 1 ເຄື່ອງ, ຕູ້ເຢັນ 1 ໜ່ວຍ, ໄມ້ແປ່ຮູບ 7 ຄິວ, ລົດຈັກ 2 ຄັນ ລວມມູນຄ່າເສຍຫາຍທັງໝົດ 194 ລ້ານກີບ.

 ຜ່ານຄໍາໃຫ້ການຂອງນາງ ນ້ອຍ ຜູ້ເປັນລູກສາວຂອງເຈົ້າຂອງເຮືອນຮູ້ວ່າ: ກ່ອນເກີດເຫດຕົນເອງໄດ້ແຕ່ງກິນຢູ່ເຮືອນຄົວແລະກໍ່ໄດ້ດັບມອບໄຟໝົດແລ້ວສ່ວນພໍ່ແມ່ເອື້ອຍອ້າຍກໍ່ໄດ້ອອກໄປເຮັດວຽກໝົດຕົນຈຶ່ງໄດ້ພາລູກຂຶ້ນມາຢູ່ເຮືອນໃຫ່ຍປະມານ2 ຊົ່ວໂມງກວ່າ ໄດ້ຍີນສຽງແຕກດັງຂຶ້ນຢ່າງແຮງຕົນເອງຈຶ່ງໄດ້ລົງມາເບິ່ງເຫັນໄຟລຸກລາມຈາກເຮືອນຄົວໃສ່ເຮືອນໃຫ່ຍຈຶ່ງໄດ້ໄປຮ້ອງຄົນມາມອດຊ່ວຍໄຟ.

 ທ່ານ  ຮອ ໂປນ ແສນສິດ ຮອງຫົວໜ້າພະແນກສະກັດກັ້ນ ແລະຕ້ານອັກຄີໄພໃຫ້ຮູ້ວ່າ: ພາຍຫຼັງໄດ້ຮັບແຈ້ງຄວາມວ່າໄຟໄໝ້ເຮືອນຂອງປະຊາຊົນ 1 ຫຼັງກໍ່ໄດ້ນຳລົດດັບເພີງ ແລະ ສົມທົບກັບອົງການປົກຄອງບ້ານ, ພໍ່ແມ່ປະຊາຊົນ ແລະ ເຈົ້າຂອງເຮືອນຊ່ວຍສະກັດກັ້ນ ແລະມອດໄຟບໍ່ໃຫ້ລຸກລາມໄປໃສ່ເຮືອນອື່ນໃຊ້ເວລາປະມານ 1 ຊົ່ວໂມງກວ່າຈຶ່ງຄວບຄຸມໄຟໄວ້ໄດ້ສ່ວນສາເຫດເຈົ້າໜ້າທີ່ໄດ້ສົມທົບກັບອົງການປົກຄອງບ້ານ ແລະ ເຈົ້າຂອງເຮືອນສັນນິຖານໃນເບື້ອງຕົ້ນອາດເກີດຈາກການຊົມໃຊ້ໄຟໂດຍບໍ່ລະມັດລະວັງຈຶ່ງເຮັດໃຫ້ໄຟໄໝ້ໃນຄັ້ງນີ້.

 ---------------

ຂຽນໂດຍ: ສົມພອນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

• 27/09/2019