ເຈດີບີ ເດີນສາຍແບ່ງນໍ້າໃຈມອບເຂົ້າຊ່ວຍຜູ້ປະສົບໄພນໍ້າຖ້ວມທີ່ຈຳປາສັກ

 ເພື່ອເປັນສ່ວນໜື່ງໃນການປະກອບສ່ວນແບ່ງເບົາບັນເທົາທຸກໃຫ້ແກ່ປະຊາຊົນບັນດາເຜົ່າທີ່ໄດ້ຮັບຜົນກະທົບຢ່າງຮ້າຍແຮງຈາກເຫດຝົກຕົກໜັກຕິດຕໍ່ກັນຫຼາຍວັນເຮັດໃຫ້ເກີດມີນໍ້າຖ້ວມຢູ່ໃນເທສະບານນະຄອນປາກເຊ ແລະເມືອງໃກ້ຄຽງຂອງແຂວງຈຳປາສັກ ໄດ້ຮັບຜົນກະທົບຢ່າງໜັກດັ່ງນັ້ນທະນາຄານຮ່ວມພັດທະນາ ຫຼື ເຈດີບີ ຈຶ່ງໄດ້ສົ່ງນໍ້າໃຈໄປບັນເທົາທຸກປະຊາຊົນຜູ້ເດືອດຮ້ອນຍ້ອນເຫດນໍ້າຖ້ວມຄັ້ງນີ້ເປັນເຂົ້າສານຈຳນວນ 10 ໂຕນ ມູນຄ່າ 75 ລ້ານກີບ.

 ການມອບ-ຮັບເຂົ້າສານດັ່ງກ່າວຈັດ ຂຶ້ນໃນວັນທີ 19 ກັນຍາຜ່ານມາທີ່ຫ້ອງການຄະນະກໍາມະການຄຸ້ມຄອງໄພພິບັດແຂວງຈໍາປາສັກ ຊຶ່ງຕາງໜ້ານໍາພາຄະນະມອບໂດຍ ທ່ານ ຖາວອນ ອ້ວນມາລາ ທີ່ປຶກສາທັງເປັນຜູ້ປະສານງານພາກໃຕ້ຂອງເຈດີບີ, ທ່ານ ບົວວອນ ຈັນທະນີເລີດ ສະມາຊິກສະພາບໍລິຫານທັງເປັນຫົວໜ້າຫ້ອງການເຈດີບີ ແລະ ຕາງໜ້າ ແຂວງຈໍາປາສັກຮັບມີ ທ່ານ ບຸນຖອງ ດີວິໄຊ ເຈົ້າແຂວງຈໍາປາສັກ, ທ່ານ ບົວລິນ ວົງພະຈັນ ຮອງເຈົ້າແຂວງຈໍາປາສັກ ແລະ ທ່ານ ຄໍາໃສໝື່ນຫຼວງ ຫົວໜ້າພະແນກແຮງງານ ແລະສະຫວັດດີການແຂວງ ແລະພະນັກງານທີ່ກ່ຽວຂ້ອງເຂົ້າຮ່ວມ.

 ທ່ານ ບຸນຖອງ ດີວິໄຊ ເຈົ້າແຂວງຈໍາປາສັກ ໄດ້ສະແດງຄວາມຂອບອົກຂອບໃຈ ແລະຮູ້ບຸນຄຸນ ຕໍ່ປະທານສະພາບໍລິຫານທະນາຄານຮ່ວມພັດທະນາທີ່ມີນໍ້າໃຈອັນປະເສີດ ທີ່ໄດ້ຊ່ວຍເຫຼືອປະຊາຊົນທີ່ປະສົບໄພໃນຄັ້ງນີ້ຫຼັງຈາກນັ້ນທ່ານກໍ່ໄດ້ມອບໃບຍ້ອງຍໍໃຫ້ແກ່ທະນາຄານຮ່ວມພັດທະນາທີ່ມີຜົນງານປະກອບສ່ວນຊ່ວຍເຫຼືອໄພນໍ້າຖ້ວມໃນຄັ້ງນີ້.----------------

ຂຽນໂດຍ: ຄໍາຕົ້ນ ວໍລະຈັກ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 27/09/2019