8 ເດືອນດ່ານພາສີສາກົນນໍ້າກັ່ນເກັບລາຍຮັບໄດ້ເກືອບ 60 ຕື້ກີບ

  ດ່ານພາສີສາກົນນໍ້າກັ່ນຕັ້ງຢູ່ເມືອງໜອງແຮດແຂວງຊຽງຂວາງ, ເປັນດ່ານສາກົນທີ່ມີການບໍລິການສິນຄ້າຜ່ານດ່ານເຊື່ອມຕໍ່ຊາຍແດນລະຫວ່າງລາວ-ຫວຽດນາມ; ຈຶ່ງເປັນເງື່ອນໄຂໃຫ້ແກ່ການນໍາເຂົ້າ-ສົ່ງອອກປະເພດສິນຄ້າຕ່າງໆເປັນຕົ້ນ: ແມ່ນນໍ້າມັນເຊື້ອໄຟ, ເຄື່ອງອຸປະໂພກບໍລິໂພກ ແລະມີຄວາມພ້ອມໃນການບໍລິການ, ອຳ ນວຍຄວາມສະດວກໃຫ້ນັກທຸລະກິດ, ຜູ້ປະກອບການ ແລະປະຊາຊົນເຂົ້າ-ອອກຜ່ານດ່ານສະດວກວ່ອງໄວໂດຍໃນ 8 ເດືອນຜ່ານມານີ້ດ່ານດັ່ງກ່າວສາມາດເກັບລາຍຮັບເຂົ້າງົບໄດ້ແລ້ວ 58,2 ຕື້ກີບ.

 ທ່ານ ເອື່ອງທິດ ອາລຸນທອງ ຮອງຫົວໜ້າດ່ານພາສີສາກົນນໍ້າກັ່ນໃຫ້ຮູ້ວ່າ: ດ່ານພາສີສາກົນນໍ້າກັ່ນປະກອບມີ 2 ໜ່ວຍງານຄື: ໜ່ວຍງານຄຸ້ມຄອງການແຈ້ງພາສີ ແລະໜ່ວຍງານກວດກາຄຸ້ມ ຄອງພາຫະນະ-ຜູ້ໂດຍສານ; ດ້ານວຽກ ງານວິຊາສະເພາະແມ່ນມີຄວາມເປັນເອ ກະພາບກັນວາງແບບແຜນວິທີເຮັດວຽກ, ມອບຄວາມ

ຮັບຜິດຊອບໃຫ້ບຸກຄົນຢ່າງລະອຽດ; ເພື່ອຮັບປະກັນໃຫ້ແກ່ການປະຕິບັດໜ້າທີ່ຂອງພະນັກງານໃຫ້ມີປະສິດທິຜົນໃນການຈັດເກັບລາຍຮັບເຂົ້າງົບປະມານຈາກການສົ່ງ ອອກ-ນໍາເຂົ້າສິນຄ້າພ້ອມນັ້ນ, ກໍ່ໄດ້ປະສານສົມທົບກັບບັນດາຂະແໜງການກ່ຽວຂ້ອງພາຍໃນດ່ານ; ເພື່ອອຳນວຍຄວາມສະດວກໃຫ້ແກ່ຜູ້ໂດຍສານ ແລະພາຫະນະເຂົ້າ-ອອກດ່ານໄດ້ຢ່າງວ່ອງໄວ ແລະຮັບປະກັນຄວາມຖືກຕ້ອງຕາມລະບຽບກົດໝາຍ.

 ສຳລັບການຈັດເກັບລາຍຮັບເຂົ້າງົບປະມານໃນປີ 2019 ທ່ານຮອງຫົວໜ້າລະບຸວ່າ: ໄດ້ຮັບຕົວເລກແຜນການທັງໝົດ 80 ຕື້ກີບ; ຜ່ານການຈັດຕັ້ງປະຕິບັດຕົວຈິງ 8 ເດືອນ ສາມາດປະຕິບັດໄດ້ 58,2 ຕື້ກວ່າກີບ ເທົ່າກັບ 72,81% ຂອງແຜນການປີໃນນັ້ນ, ລາຍຮັບຫຼັກແມ່ນໄດ້ຈາກຄ່າຊັກພິເສດ; ນໍ້າມັນເຊື້ອໄຟ; ພາຫະນະ, ສິ້ນສ່ວນອາໄຫຼ່; ເຄື່ອງກໍ່ສ້າງ;  ເຄື່ອງອຸປະໂພກ-ບໍລິໂພກ; ເຄື່ອງໃຊ້ໄຟຟ້າ; ຄ່າທຳນຽມຕ່າງໆ; ຄ່າທໍານຽມຄັງແຮນໍ້າ ມັນເຊື້ອໄຟ; ຄ່າປັບໃໝ ແລະອື່ນໆ.

  ຢ່າງໃດກໍຕາມເພື່ອເຮັດໃຫ້ລາຍຮັບບັນລຸໄດ້ຕາມແຜນການທີ່ວາງໄວ້ໃນ 4 ເດືອນທ້າຍປີ 2019 ຄະນະດ່ານພາສີສາກົນນໍ້າກັ່ນຈະເພີ່ມທະວີສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ ພະນັກງານຢ່າງເປັນປົກກະຕິ, ເອົາໃຈ ໃສ່ໃນການກວດກາ, ລົງຕິດຕາມ ການປະຕິບັດໜ້າທີ່ ແລະການເຄື່ອນໄຫວຂອງພະນັກງານເພື່ອຕ້ານ ແລະສະກັດກັ້ນປະກົດການຫຍໍ້ທໍ້, ເຂັ້ມງວດໃນການຄຸ້ມຄອງກວດກາສິນຄ້າເຂົ້າ-ອອກດ່ານ,ເພີ່ມທະວີໃນການກວດກາດ້ານຈຳນວນ,ບໍລິມາດ,ຊະນິດ, ຂະໜາດໃນການນໍາເຂົ້າ-ສົ່ງອອກຂອງນໍ້າມັນເຊື້ອໄຟເພື່ອຮັບປະກັນໃນການເກັບລາຍຮັບເຂົ້າງົບປະມານໃຫ້ຖືກຕ້ອງຄົບຖ້ວນ ແລະທັນກຳນົດເວລາ.

-----------------

ຂຽນໂດຍ: ກະຊວງການເງິນ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

แชร์