ຄະນະຜູ້ແທນພະສົງລາວ ສໍາເລັດເຄື່ອນໄຫວວຽກງານພຸດທະສາສະໜາທີ່ຝຣັ່ງ

  ຄະນະຜູ້ແທນພະສົງລາວ ຈາກສູນກາງອົງການພຸດທະສາ ສະໜາສໍາພັນ ແຫ່ງ ສປປ ລາວ (ອພສ)  ໄດ້ສໍາເລັດການຢ້ຽມຢາມ ແລະວຽກງານພຸດທະສາສະໜາ ທີ່ ປະເທດຝຣັ່ງ ໃນລະຫວ່າງວັນທີ 18-22 ກັນຍາ 2019.

ອີງຕາມຄຳຂາບອາຣາທະນານິມົນຂອງສະຖານເອກອັກຄະລັດ ຖະທູດແຫ່ງ ສປປ ລາວ ທີ່ປາຣີ ປະເທດຝຣັ່ງ,ພະເດດພະຄຸນພະຫຼັກແກ້ວມະຫາວໍຣະຍານາທິບໍດີມະຫາເຫວດ ມະເສໄນ ຮອງປະທານສູນກາງອົງການພຸດທະສາສະໜາສໍາພັນ ແຫ່ງ ສປປ ລາວ, ອົງຜູ້ຊີ້ນໍາລວມວຽກງານເຜີຍແຜ່ ແລະປະຕິບັດກໍາມະຖານສູນກາງ ທົ່ວປະເທດພ້ອມດ້ວຍຄະນະຜູ້ແທນພະສົງລາວ ຈາກສູນກາງ (ອພສ) ໄດ້ເຄື່ອນໄຫວຢ້ຽມຢາມ ແລະ ເກັບກຳຂໍ້ມູນບັນດາວັດທີ່ປະເທດ ຝຣັ່ງເຊັ່ນ: ວັດທຳມະລັງສີທີ່ຊວງ ວີລ,ວັດສີມຸງຄຸນທີ່ສຕຣັສບວກ,ວັດເວລູວະນາຣາມ ແລະວັດທຳມະ ພິລົມທີ່ປາຣີ ແລະວັດສີບຸນເຮືອງ ທີ່ເຢຍລະມັນ,ຊຶ່ງໃນວັນທີ 21 ກັນຍາ 2019 ຢູ່ວັດສີສັດຕະນາກ ທີ່ປາຣີ ໄດ້ມີກອງປະຊຸມວ່າດ້ວຍ ວຽກງານພຸດທະສາສະໜາທີ່ປະ ເທດຝຣັ່ງ ແລະຕ່າງປະເທດພາຍ ໃຕ້ການເປັນປະທານຂອງພະຄູວິນັຍທອນ ສວັສດ໌ ຍານະພະໂລປະທານອົງການຄະນະສົງເຖຣະວາດ ລາວປະຈຳປະເທດຝຣັ່ງ-ເອີຣົບ.

ຈຸດປະສົງຂອງກອງປະຊຸມ ແມ່ນເພື່ອປຶກສາຫາລືແລກປ່ຽນ ຄຳຄິດຄຳເຫັນກ່ຽວກັບສາສະໜາພຸດລາວທີ່ປະເທດຝຣັ່ງ ແລະຕ່າງປະເທດ ໂດຍເນັ້ນໜັກການເຜີຍແຜ່ ສາສະໜາພຸດລາວ,ການເຂົ້າ-ອອກຕ່າງປະເທດຂອງພະສົງ ແລະຄຸ້ມ ຄອງພະສົງລາວ ຢູ່ປະເທດຝຣັ່ງ ແລະຕ່າງປະເທດ,ຊຶ່ງກອງປະຊຸມເຫັນດີເປັນເອກພາບໃຫ້ມີການຈັດຕັ້ງຄະນະພະສົງຮັບຜິດຊອບການອະນຸມັດຮັບເອົາພະສົງທີ່ຈະສົ່ງຈາກລາວມາປະຈຳຢູ່ວັດຕ່າງໆ ຢປະເທດຝຣັ່ງ ໂດຍຕ້ອງມີເງື່ອນໄຂມາດຖານ ແລະຖືກຕ້ອງຕາມ ກົດລະບຽບພະທຳມະວິໄນທາງພຸດທະສາສະໜາກໍຄືພະທຳມະທູດຂອງອົງການພຸດທະສາສະໜາສຳພັນລາວ ແລະຕ້ອງສອດຄ່ອງກັບລະບຽບກົດໝາຍຂອງປະເທດເຈົ້າພາບ,ເພື່ອອໍານວຍຄວາມສະດວກໃຫ້ແກ່ການເກັບກຳຂໍ້ມູນ ແລະການຄຸ້ມຄອງຕ່າງໆຂອງພະສົງໃຫ້ເປັນລະບົບ ແລະເກີດປະໂຫຍດພາຍໃຕ້ຄວາມເຫັນອົກເຫັນໃຈເຊິ່ງກັນ ແລະກັນ ເພື່ອໃຫ້ການເຄື່ອນໄຫວວຽກງານພຸດທະສາສະໜາກໍຄືວຽກງານການເຜີຍແຜ່ວັດທະນະທຳ,ຮີດຄອງປະເພນີຂອງລາວເຮົາສູ່ສາກົນມີປະສິດທິພາບຍິ່ງໆ ຂຶ້ນ; ນອກຈາກນັ້ນ, ກອງປະຊຸມ ຍັງໄດ້ສະເໜີເງື່ອນໄຂຈຸດດີ ແລະຂໍ້ຄົງຄ້າງຂອງວຽກງານຜ່ານມາຕະຫຼອດຮອດແຜນວຽກງານການຮ່ວມມືໃນຕໍ່ໜ້າ.

-------------------

ພາບ ແລະຂ່າວຈາກ:ໜັງສືພິມເສດຖະກິດ-ສັງຄົມ

แชร์