ຍົກລະດັບວຽກງານຫຼຸດຜ່ອນຄວາມສ່ຽງທາງດ້ານເຄມີ

   ກົມແຜນການ ແລະຮ່ວມມື, ກະຊວງວິທະຍາສາດ ແລະເຕັກໂນໂລຊີ (ກວຕ) ໃນນາມຈຸດປະສານງານແຫ່ງຊາດດ້ານເຄມີ, ຊີວະ, ລັງສີ ແລະນິວເຄຣຍ ຫຼືເອີ້ນວ່າ CBRN ໄດ້ຈັດຝຶກອົບຮົມໃນ ຫົວຂໍ້: ການຫຼຸດຜ່ອນຄວາມສ່ຽງ ທາງດ້ານເຄມີແລະສິ່ງເສດເຫຼືອ ທາງດ້ານເຄມີ ຂຶ້ນໃນລະຫວ່າງ ວັນທີ 23-28 ກັນຍາ 2019 ຢູ່ ນະຄອນຫຼວງວຽງຈັນ ໂດຍເປັນ ປະທານຂອງທ່ານ ຄໍາເພັດ ວົງ ດາລາ ຫົວໜ້າກົມແຜນການ ແລະ ຮ່ວມມື, ທ່ານ Andrew Proudlove ຫົວໜ້າໂຄງການທີ 61 ຈາກສະຫະພາບເອີຣົບ, ມີບັນດາ ນັກສຳມະນາກອນຈາກ ກວຕ, ກະ ຊວງສາທະລະນະສຸກ, ກະຊວງ ຊັບພະຍາກອນທໍາມະຊາດແລະ ສິ່ງແວດລ້ອມ, ກະຊວງກະສິກໍາ ແລະປ່າໄມ້, ອົງການຄຸ້ມຄອງຕົວ ເມືອງວຽງຈັນ ແລະພາກສ່ວນເອກະຊົນທີ່ກ່ຽວຂ້ອງເຂົ້າຮ່ວມ.

   ຈຸດປະສົງຂອງການຝຶກອົບຮົມໃນຄັ້ງນີ້ແມ່ນໄດ້ເນັ້ນໃສ່ການສ້າງຄວາມຮັບຮູ້ກ່ຽວກັບຄວາມສ່ຽງຈາກວັດຖຸເຄມີໃຫ້ແກ່ນັກສຳມະນາກອນທີ່ເປັນພະນັກງານຜູ້ຮັບຜິດ ຊອບການຄຸ້ມຄອງເຄມີ ແລະສິ່ງ ເສດເຫຼືອທີ່ມາຈາກພາກສ່ວນ ຕ່າງໆ ແລະທັງເປັນການຍົກລະດັບ ເພີ່ມທະວີຄວາມອາດສາມາດສຳ ລັບການປ້ອງກັນ, ການຄົ້ນຫາ, ການກຽມ ຄວາມພ້ອມ ແລະການ ໂຕ້ຕອບຕໍ່ກັບເຫດການ ທາງເຄມີ ແລະ ບົດຮຽນອື່ນໆອີກ ຈາກຊ່ຽວຊານ ທີ່ມາຈາກສະຫະພາບເອີຣົບ, ພ້ອມ ນັ້ນ, ໃນການຝຶກອົບຮົມຄັ້ງນີ້ ຍັງຈະ ເປັນໂອກາດໃຫ້ຜູ້ເຂົ້າຮ່ວມໄດ້ ແລກປ່ຽນປະສົບການ ຫຼືເຫດການ ເຄມີຕ່າງໆໃນໄລຍະຜ່ານມາ ໂດຍສະເພາະແມ່ນບັນຫາ ແລະຂໍ້ຫຍຸ້ງ ຍາກທີ່ໄດ້ພົບເຫັນເພື່ອຊອກຫາວິທີການແກ້ໄຂບັນຫາດັ່ງກ່າວ, ນອກນັ້ນ, ຍັງເປັນການເພີ່ມທະວີການປະສານງານລະຫວ່າງໜ່ວຍງານຂອງລັດ ແລະເອກະຊົນເພື່ອແນ່ໃສ່ການຄຸ້ມຄອງ ແລະສິ່ງເສດເຫຼືອທາງດ້ານເຄມີເພື່ອການເຝົ້າລະວັງໄພ ແລະການກຽມຄວາມພ້ອມຮັບມືໃນການຕອບໂຕ້ເຫດການສຸກເສີນທາງດ້ານ CBRN ໃຫ້ສອດຄ່ອງກັບລະບຽບຫຼັກການການຂອງສາກົນ.

  ທ່ານ ຄຳເພັດ ວົງດາລາ ກ່າວວ່າ: ປະຈຸບັນສະພາບເສດຖະກິດ-ສັງຄົມຂອງ ສປປ ລາວ ເຮົາຢູ່ໃນຊ່ວງກຳລັງເຕີບໂຕຢ່າງຕໍ່ເນື່ອງ, ການນໍາໃຊ້ວັດຖຸເຄມີໄດ້ມີບົດບາດ ສໍາຄັນ ແລະຖືກນຳໃຊ້ເຂົ້າໃນຫຼາຍຂະແໜງການເພື່ອການພັດທະນາເສດຖະກິດ-ສັງຄົມຂອງປະເທດນັບມື້ນັບຂະຫຍາຍຕົວຂຶ້ນເປັນຕົ້ນແມ່ນ: ຂະແໜງສາທາລະນະສຸກ, ກະສິກຳ ແລະອຸດສະຫະກຳການ ຄ້າແລະອື່ນໆ, ຊຶ່ງວັດຖຸເຄມີຈະມີ ຜົນດີຫຼາຍ ດ້ານຕໍ່ກັບການພັດທະນາປະເທດໂດຍລວມແຕ່ກໍປາສະຈາກທ່າອ່ຽງທີ່ຈະປະເຊີນກັບຄວາມສ່ຽງຈາກເຫດການ ແລະ ຜົນກະທົບດ້ານລົບຈາກທາດເຄມີຕໍ່ກັບຄວາມປອດໄພຂອງຄົນພາຍໃນຊາດສະນັ້ນ, ຈຶ່ງຈຳເປັນຕ້ອງມີວິທີການ ແລະ ລະບຽບການຄຸ້ມຄອງ-ຕິດຕາມກວດກາທີ່ມີປະສິດທິພາບ ແລະຮັດກຸມຕໍ່ກັບຄວາມປອດໄພໃນການນຳໃຊ້ວັດຖຸດັ່ງກ່າວ.

--------------

ຂຽນໂດຍ: ນໍ້າເໝີຍ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์