ຫຼາຍພາກສ່ວນຮ່ວມພັດທະນາເຕັກນິກປູກມອນ-ລ້ຽງມອນ

  ສະຖາບັນນິເວດວິທະຍາ ແລະເຕັກໂນໂລຊີຊີວະພາບ, ກະຊວງວິທະຍາສາດ ແລະເຕັກໂນໂລຊີ ຮ່ວມກັບບໍລິສັດ ສອງມືນາງ ຈໍາກັດ ແລະມະຫາວິທະຍາໄລຊູໂຈໄດ້ຈັດຝຶກອົບຮົມກ່ຽວກັບເຕັກນິກການປູກມອນ-ລ້ຽງມ້ອນ ຂຶ້ນໃນລະຫວ່າງວັນທີ 23-25 ກັນຍາ 2019, ທີ່ສະຖາບັນນິເວດວິທະຍາ ແລະເຕັກໂນໂລຊີຊີວະພາບຊຶ່ງເປັນໜຶ່ງກິດຈະກໍາທີ່ນອນໃນໂຄງການຮ່ວມມືພັດທະນາການປູກມອນ-ລ້ຽງມ້ອນເປັນອຸດສະຫະກໍາ ແລະທັນສະໄໝ.

  ໃຫ້ກຽດເຂົ້າຮ່ວມເປັນປະທານໃນພິທີເປີດການຝຶກອົບຮົມຄັ້ງນີ້ມີ ທ່ານ ບໍ່ວຽງຄໍາ ວົງດາລາ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ, ທ່ານ ນາງ ແກ້ວສາຍໃຈ ໄຊຍະສອນ ປະທານບໍລິສັດສອງມືນາງ ຈໍາກັດ ແລະ ທ່ານ Huang Xing ຮອງອະທິການບໍດີມະຫາວິທະຍາໄລຊູໂຈລາວ, ຊຶ່ງມີສໍາມະນາກອນທີ່ມາຈາກຂະແໜງວິທະຍາສາດ ແລະເຕັກໂນໂລຊີ, ກະສິກໍາ, ຜູ້ຜະລິດທີ່ປູກມອນ-ລ້ຽງມ້ອນ, ຜູ້ປະກອບການ, ນັກຄົ້ນຄວ້າ ແລະນັກສຶກສາເຂົ້າຮ່ວມ.

  ຈຸດປະສົງຂອງການຝຶກອົບຮົມດັ່ງກ່າວແມ່ນເພື່ອຖ່າຍທອດຄວາມຮູ້ກ່ຽວກັບເຕັກນິກການປູກມອນ-ລ້ຽງມ້ອນ ແລະສ້າງໂອກາດອັນດີ ໃຫ້ແກ່ຜູ້ເຂົ້າຮ່ວມຝຶກອົບຮົມໃນ ການແລກປ່ຽນບົດຮຽນປະສົບ ການກ່ຽວກັບວຽກງານດັ່ງກ່າວ ແນໃສ່ຊຸກຍູ້ສົ່ງເສີມການຜະລິດ ການປູກມອນ-ລ້ຽງມ້ອນເປັນສິນຄ້າ, ຊຶ່ງຜູ້ເຂົ້າຮ່ວມຈະໄດ້ຮັບຟັງການນໍາສະເໜີບົດຈາກຊ່ຽວຊານສະເພາະດ້ານຈາກມະຫາວິທະຍາ ໄລຊູໂຈ ສປ ຈີນ ແລະວິຊາການປູກ ມອນ-ລ້ຽງມ້ອນຈາກສະຖາບັນນິ ເວດວິທະຍາ ແລະເຕັກໂນໂລຊີຊີ ວະພາບ, ນອກຈາກນັ້ນ, ຍັງຈະໄດ້ລົງພາກປະຕິບັດຕົວຈິງກ່ຽວ ກັບບັນດາເຕັກນິກຕ່າງໆຂອງການ ປູກມອນ-ລ້ຽງມ້ອນທີ່ສວນສາ ທິດປູກມອນ-ລ້ຽງມ້ອນຫຼັກ 18 ຂອງບໍລິສັດສອງມືນາງຈໍາກັດ ແລະ ຜູ້ເຂົ້າຮ່ວມທັງໝົດຈະໄດ້ຮັບເບ້ຍມອນນໍາໄປປູກທົດລອງທີ່ສວນຂອງຕົນເອງພ້ອມທັງນໍາເອົາບົດຮຽນໄປເຜີຍແຜ່ໃຫ້ເກີດຜົນຢູ່ຂັ້ນທ້ອງຖິ່ນ.

------------------

ໜັງສືພິມເສດຖະກິດ-ສັງຄົມ

• 26/09/2019