ກຳປູເຈຍຈະຂຶ້ນຄ່າແຮງງານຂັ້ນຕໍ່າເປັນ 190 ໂດລາຕໍ່ເດືອນ

  ກະຊວງແຮງງານ ແລະອາຊີວະກຳປູເຈຍກ່າວວ່າ: ລັດຖະບານກຳປູເຈຍຈະປັບເພີ່ມຄ່າແຮງງານຂັ້ນຕໍ່າໃຫ້ແກ່ພາກອຸດສາຫະກຳຕັດຫຍິບເສື້ອຜ້າສຳເລັດຮູບຊຶ່ງເປັນພາກສ່ວນແຫຼ່ງລາຍໄດ້ຈາກການສົ່ງອອກຂະໜາດໃຫຍ່ທີ່ສຸດຂອງປະເທດ.

  ຕາມຂ່າວຕ່າງປະເທດລາຍງານວ່າ: ຄາດວ່າການປັບເພີ່ມຄ່າແຮງງານໃໝ່ຄັ້ງນີ້ຈະເລີ່ມມີຜົນນັບແຕ່ເດືອນມັງກອນປີ 2020 ເປັນຕົ້ນໄປໂດຍຄ່າແຮງງານຂັ້ນຕໍ່າປັບເພີ່ມຂຶ້ນ 4,4% ເປັນ 190 ໂດລາສະຫະລັດຕໍ່ເດືອນຈາກເດີມ 182 ໂດລາສະຫະລັດຕໍ່ເດືອນເຖິງແມ່ນວ່າ: ການປັບຄ່າແຮງງານຄັ້ງນີ້ຈະຍັງບໍ່ເທົ່າກັບອັດຕາຄ່າແຮງງານທີ່ສະຫະພັນແຮງງານຮຽກຮ້ອງ 195 ໂດລາສະຫະລັດແຕ່ກໍເປັນອັດຕາທີ່ຫຼາຍກວ່າເຈົ້າຂອງໂຮງງານກຳນົດໄວ້ 186  ໂດລາສະຫະລັດ, ອຸດສາຫະກຳຕັດ

ຫຍິບເສື້ອຜ້າ ແລະ ເກີບເປັນຂະແໜງການສົ່ງອອກຂະໜາດໃຫຍ່ທີ່ສຸດຂອງກຳປູເຈຍມີການຈ້າງແຮງງານເກືອບ 800.000 ຄົນ ປະຈຸບັນກຳປູເຈຍມີໂຮງງານປະ ມານ 1.000 ແຫ່ງໃນທົ່ວປະເທດ ແລະເມື່ອປີກາຍນີ້ກຳປູເຈຍໄດ້ສົ່ງອອກສິນຄ້າໄປຍັງອາເມລິກາ ແລະເອີຣົບກວມເອົາມູນຄ່າເກືອບ 10 ຕື້ໂດລາສະຫະລັດ.

  ກະຊວງແຮງງານລະບຸວ່າ: ເມື່ອຜົນປະໂຫຍດອື່ນໆຂອງແຮງງານເຊັ່ນ: ຄ່າລ່ວງເວລາຖືກລວມເຂົ້າໃນການຄິດໄລ່ຄ່າແຮງແລ້ວຈະເຮັດໃຫ້ແຮງງານມີລາຍໄດ້ສະເລ່ຍປະມານ 207-218 ໂດລາ ຕໍ່ເດືອນ.

--------------

ໜັງສືພິມເສດຖະກິດ-ສັງຄົມ

แชร์