ທຸລະກິດຂາຍອາຫານສຸກ ສາມາດສ້າງລາຍຮັບ 90 ລ້ານກີບຕໍ່ເດືອນ

 ທຸລະກິດຂາຍອາຫານເປັນທຸລະກິດທີ່ໜ້າສົນໃຈຫຼາຍທີ່ສຸດອີກປະເພດເພາະເປັນປັດໄຈໃນການດໍາລົງຊີວິດຊຶ່ງມີແນວໂນ້ມຄວາມຕ້ອງການສູງຂຶ້ນເລື້ອຍໆ ຕາມຈໍານວນປະຊາກອນ ແລະ ຊຸມຊົນຂອງບ້ານເມືອງທີ່ຂະຫຍາຍອອກໄປເລື້ອຍໆ, ຜູ້ຄົນໃນປະຈຸບັນນິຍົມຊື້ອາຫານມາກິນຫຼາຍກວ່າເຮັດເອງເພາະສະດວກກ່ອນອີກທັງຄ່າໃຊ້ຈ່າຍຍັງຖືກກ່ອນທີ່ຈະໄປຊື້ມາເຮັດເອງ, ສໍາລັບອາຫານຕາມສັ່ງໃນແຕ່ລະມື້ອີກທັງປະຢັດເວລາການເຮັດວຽກແຂ່ງກັບການ ສັນຈອນໄປມາທີ່ຕິດຄັດ, ສະພາບແວດລ້ອມຟ້າແດດ-ຝົນຕົກ ດັ່ງນັ້ນແລ້ວ, ທຸລະກິດຂາຍອາຫານສຸກປະເພດຕ່າງໆທີ່ເປັນທັງອາຫານຫຼັກ ແລະຂອງກິນຫຼິ້ນຈຶ່ງຍັງເຕີບໃຫຍ່ຂຶ້ນໄປເລື້ອຍໆ.

 ຄອບຄົວ ແມ່ ສຸກໃຈ ສິງຄໍາພົນ ຢູ່ບ້ານວັດຫຼວງ ເມືອງສາມັກຄີໄຊ ແຂວງອັດຕະປື ໄດ້ໃຫ້ການສໍາ ພາດຕໍ່ສື່ມວນຊົນແຂວງວ່າ: ປະຈຸບັນແມ່ສຸກໃຈ ສິງຄໍາພົນ ອາຍຸໄດ້ 70 ປີ, ໄດ້ສ້າງຄອບຄົວກັບພໍ່ ທອງໄຫຼ ສິງຄໍາພົນ ອາຍຸ 78 ປີ, ແຕ່ປີ 1972 ພາຍຫຼັງໄດ້ສ້າງ ຄອບຄົວແລ້ວແມ່ນໄດ້ຢຶດຖືອາຊີບຊາວນາເປັນຫຼັກ ແລະຄ້າຂາຍຍ່ອຍສໍາຮອງໄດ້ລູກນໍາກັນ 2 ຄົນ, ການດໍາລົງຊີວິດໃນເມື່ອກ່ອນກໍພໍຖູໄຖກຸ້ມກິນສືບມື້ສືບວັນແຕ່ບໍ່ສາມາດສ້າງລາຍຮັບໄດ້ເປັນກອບເປັນກໍາ ແລະການຄ້າຂາຍບໍ່ຄ່ອຍດີເນື່ອງຈາກວ່າເປັນແຂວງນ້ອຍ, ປະຊາກອນບໍ່ຫຼາຍ, ການທໍາມາ ຫາກິນງ່າຍ, ໄລເວລານັ້ນອາຫານຊາມປາມີຄວາມອຸດົມສົມບູນມີແຕ່ອາໄສຄ້າຂາຍລາຍລ່ອງໄປໆມາໆໃນຕ່າງແຂວງ, ມາຮອດປີ 1990 ຍ້ອນຄວາມດຸໝັ່ນຂະຫຍັງພຽນໃນ ການຊອກຊື້ຫາຂາຍບົນພື້ນຖານ ການຫັນເອົາແນວທາງນະໂຍບາຍ ຂອງພັກ-ລັດໃນການສົ່ງເສີມການສ້າງລາຍຮັບໃຫ້ແກ່ຄອບຄົວຕາມທິດຊີ້ນໍາເພິ່ງຕົນເອງ-ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ທີ່ພັກ-ລັດຂັ້ນເທິງວາງອອກ, ບວກ ກັບຄວາມມັກຮັກໃນການປຸງແຕ່ງ ອາຫານ ຈຶ່ງປຶກສາກັບຄອບຄົວ ຫາທາງອອກດ້ວຍການຂາຍອາ ຫານສຸກປະຈໍາວັນໃນເບື້ອງຕົ້ນ ໃຊ້ທຶນເລັກນ້ອຍ (ເມນູມີແຕ່ລາບ ກັບແກງ ເທົ່ານັ້ນ) ແຮງງານ ສົມບູນມີແຕ່ 2 ຄົນຜົວ-ເມຍ ໃນເວລານັ້ນ, ສາມາດສັງເກດໄດ້ວ່າກໍພໍໄດ້ຂາຍ ແລະສາມາດເບິ່ງເຫັນຕົ້ນທຶນ ແລະ ກໍາໄລເປັນທຶນໝູນວຽນໃນແຕ່ລະວັນດັ່ງນັ້ນແຕ່ລະ ປີຄ່ອຍໆຂະຫຍາຍໆຈາກນ້ອຍຫາໃຫຍ່ຈົນເຖິງປີ 2012 ຈຶ່ງໄດ້ມີຈຸດເລີ່ມທີ່ພາໃຫ້ຄອບຄົວຂອງແມ່ກາຍເປັນຄອບຄົວເດັ່ນໃນການເຮັດທຸລະກິດຂາຍອາຫານ ແລະເປັນທີ່ຍອມຮັບຈາກສັງຄົມພາຍໃນ ແລະຕ່າງປະເທດ, ສາມາດປຸກຮ້ານໃຫຍ່ຖາວອນ, ມີແຮງງານສົມບູນ 5 ຄົນ, ສໍາຮອງ 2 ຄົນ, ລ້ວນແລ້ວເປັນລູກ, ຫຼານ, ໄພ້, ລາຍຮັບສະເລ່ຍຕໍ່ວັນ ລວມທັງຕົ້ນທຶນ ແລະກໍາໄລບໍ່ຫຼຸດ 3 ລ້ານກີບ ຕໍ່ວັນຫຼືເທົ່າກັບ 90 ລ້ານກີບ ຕໍ່ເດືອນ, ສະເລ່ຍກໍາໄລຕົວຈິງ 5 ແສນກີບຕໍ່ວັນຈາກການເຮັດທຸລະກິດຂາຍອາຫານສຸກ,ລວມມີ 19 ລາຍການເປັນຕົ້ນ: ຫຼັກມີກ້ອຍ, ລາບ, ຕົ້ມ, ຕົ້ມຈືດ, ແກງເພັດ, ອ່ອມ, ໝົກໃບຮຸ່ງ, ທອດ, ປີ້ງ, ຕໍາໝາກຮຸ່ງ, ຂົ້້ວ, ແຈ່ວເອກະລັກ, ໜື້ງປາ ແລະອື່ນໆ.

  ຈາກໝາກຜົນທີ່ກ່າວມານັ້ນ, ຄອບຄົວຂອງແມ່ ສຸກໃຈ ສິງຄໍາພົນ ໄດ້ສ້າງເຮືອນຖາວອນ 2 ຫຼັງ, ມີລົດວິໂກ້ 1 ຄັນ, ລົດຈັກເວັບ 100 ມີ 2 ຄັນ ແລະສາມາດສົ່ງ ເສີມລູກໄດ້ຈົບການສຶກສາໄດ້ເຂົ້າເປັນພະນັກງານສັງກັດ 1 ຄົນ ແລະ 1 ຄົນ ຊ່ວຍຄອບຄົວປະຈຸບັນ.

  ແມ່ ສຸກໃຈ ສິງຄໍາພົນ ກ່າວຕື່ມວ່າ: ມີວັນນີ້ໄດ້ກໍຍ້ອນມີແນວທາງຂອງພັກ-ລັດທີ່ຖືກຕ້ອງ ແລະໄດ້ເອື້ອອຳນວຍເງື່ອນໄຂໃນດ້ານຕ່າງໆຈຶ່ງເຮັດໃຫ້ຄອບຄົວຂອງເຮົາມີຊີວິດການເປັນຢູ່ທີ່ດີຂຶ້ນຊຶ່ງການເຮັດທຸລະກິດຄ້າຂາຍອາຫານຖ້າເຮົາມັກຮັກ ແລະມີປະສົບການແລ້ວກໍບໍ່ຍາກພຽງແຕ່ເຮົາມີຄວາມດຸໝັ່ນເຮັດໃຫ້ທັນເວລາ,ສະອາດ, ສົດ ແລະຮັບປະກັນຄວາມປອດໄພຕໍ່ຜູ້ບໍລິໂພກແລະປະຈຸບັນຢູ່ທີ່ຮ້ານອາຫານແມ່ສຸກໃຈ ສິງຄໍາພົນ ສາມາດບໍລິການທ່ານໄດ້ທຸກເວລາບໍ່ວ່າຈະເປັນອາຫານຕາມສັ່ງ, ອາຫານສົ່ງເຖິງທີ່ພາຍໃນເທສະບານແຂວງ, ມີໄວຟາຍ, ມີຫ້ອງຮັບແຂກຮັບປະທານອາຫານບັນຈຸໄດ້ 100 ຄົນ, ມີຫ້ອງນໍ້າສະອາດ, ບໍລິການສະດວກ, ວ່ອງໄວ ແລະສາມາດໂທສັ່ງໄດ້ທີ່ເບີ 030 9001444.

---------------

ຂຽນໂດຍ: ຊິບປະໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

แชร์