ປີໜ້າຜູ້ປ່ວຍແກ່ນຕາຂຸ່ນ ຈະໄດ້ຮັບການຜ່າຕັດໂດຍບໍ່ໄດ້ເສຍຄ່າ

  ໃນວັນທີ 25 ກັນຍາ 2019 ກະຊວງສາທາລະນະສຸກ ແລະມູນນິທິ ຈີເອັກ ໄດ້ເຊັນບົດບັນທຶກຄວາມເຂົ້າໃຈເພື່ອຈັດຕັ້ງປະຕິບັດໂຄງການຮ່ວມມືຜ່າຕັດແກ່ນຕາຂຸ່ນຢູ່ ສປປ ລາວ, ຊຶ່ງຕາງໜ້າກະຊວງສາທາລະນະສຸກຮ່ວມລົງນາມໂດຍ ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ແລະຕາງໜ້າມູນນິທິແມ່ນ ທ່ານ ຫຼ່ຽວ ເຈີນ ຫຍິງ ຮອງປະທານສະພາທີ່ປຶກສາການເມືອງ ສປ ຈີນ, ທັງເປັນປະທານມູນນິທິ ຈີເອັກ, ພ້ອມນັ້ນກໍຍັງມີທ່ານເອກອັກຄະລັດຖະທູດຈີນປະຈຳລາວ ແລະພາກສ່ວນທີ່ກ່ຽວຂ້ອງຂອງສອງຝ່າຍເຂົ້າຮ່ວມ.

   ທ່ານ ດຣ ບຸນກອງ ສີຫາວົງ ກ່າວວ່າ: ການເຊັນບົດບັນທຶກຄວາມເຂົ້າໃຈໃນ ຄັ້ງນີ້ ກໍເພື່ອໃຫ້ບໍລິການຜ່າຕັດແກ່ນຕາ ຂຸ່ນໂດຍບໍ່ເສຍຄ່າ ເປັນບາດກ້າວທີ່ດີ ແລະຕິດພັນກັບແຜນພັດທະນາຂອງກະ ຊວງສາທາລະນະສຸກທີ່ໄດ້ສຸມໃສ່ປັບ ປຸງຄຸນນະພາບ ແລະການບໍລິການໃຫ້ດີ ຂຶ້ນ ໂດຍສອດຄ່ອງກັບນະໂຍບາຍ 5 ດີ 1 ນະໂຍບາຍ ເພື່ອແນໃສ່ບັນລຸເປົ້າໝາຍ ການຮັກສາສຸຂະພາບຂອງທົ່ວປວງຊົນ ໃນປີ 2025, ດັ່ງນັ້ນ ໂຄງການນີ້ນອກ ຈາກເປັນການຊ່ວຍເຫຼືອປະຊາຊົນຜູ້ມີບັນຫາທາງສາຍຕາແລ້ວ ຍັງເປັນການຊ່ວຍ ສິດສອນໃຫ້ແພດໝໍຂອງລາວໄດ້ມີບົດຮຽນຫຼາຍຂຶ້ນ, ຊຶ່ງພະຍາດແກ່ນຕາຂຸ່ນ ເປັນພະຍາດໜຶ່ງທີ່ບໍ່ສາມາດລຶບລ້າງ ໃຫ້ຫາຍຂາດໄດ້ໝົດບາດດຽວ ເພາະພະ ຍາດດັ່ງກ່າວເກີດກັບກຸ່ມຄົນທີ່ມີອາຍຸສູງ, ສະນັ້ນ ການແກ້ໄຂສຳລັບຜູ້ມີບັນຫາ ທາງດ້ານສາຍຕາໃຫ້ກັບຄືນມາເຫັນໄດ້ຄື ເກົ່າແມ່ນເປັນສິ່ງທີ່ດີ, ຊ່ວຍເຮັດໃຫ້ຄົນ ເຈັບສາມາດກັບມາເບິ່ງເຫັນໄດ້ອີກຄັ້ງໜຶ່ງ, ພ້ອມທັງກັບມາໃຊ້ຊີວິດໄດ້ຢ່າງປົກ ກະຕິ, ກະຊວງພ້ອມທີ່ຈະອຳນວຍຄວາມ ສະດວກ ແລະຮຽກຮ້ອງມາຍັງວິຊາການຂອງຝ່າຍລາວ ແລະຝ່າຍຈີນໃຫ້ພ້ອມກັນປຶກສາຫາລືວາງແຜນຈັດຕັ້ງປະຕິບັດໂຄງການນີ້ໃຫ້ໄດ້ຮັບໝາກຜົນ ແລະປະກອບສ່ວນເຂົ້າໃນການເພີ່ມທະວີສາຍພົວພັນມິດຕະພາບອັນພິເສດລະຫວ່າງ ສປປ ລາວ ແລະ ສປ ຈີນ ທີ່ມີມານັ້ນໃຫ້ນັບມື້ມີການພັດທະນາຂຶ້ນເລື້ອຍໆ.

  ສຳລັບການຈັດຕັ້ງປະຕິບັດແມ່ນຈະໄດ້ເລີ່ມໃນປີ 2020 ເປັນຕົ້ນໄປໃນສັນຍາສະບັບດັ່ງກ່າວ ໄດ້ລະບຸລະອຽດກ່ຽວ ກັບການຈັດຕັ້ງປະຕິບັດຕະຫຼອດເຖິງການອຳນວຍຄວາມສະດວກໃນດ້ານ ຕ່າງໆ ເປັນຕົ້ນແມ່ນ ມູນນິທິ ຈີເອັກ ຈະຮັບຜິດຊອບໃນການນຳເອົາທີມງານ ແພດໝໍມາຜ່າຕັດໃຫ້ກັບປະຊາຊົນລາວ ໂດຍບໍ່ເສຍຄ່າ, ລວມທັງການນຳເຂົ້າອຸປະກອນໃນການຜ່າຕັດ, ມູນນິທິຈະເຮັດ ວຽກຢ່າງໃກ້ຊິດກັບກະຊວງໃນການວາງ ແຜນ ແລະດຳເນີນງານ, ສ່ວນກະຊວງ ຈະຮັບຜິດຊອບໃນການປະຊາສຳພັນໃຫ້ຄົນເຈັບແກ່ນຕາຂຸ່ນມາຮັບການຜ່າຕັດ ແລະມູນນິທິຍັງຈະຮັບຜິດຊອບໃນການເດີນທາງ, ຄ່າອາຫານໃຫ້ກັບຄົນເຈັບທີ່ຈະມາປິ່ນປົວ ແລະກະຊວງຈະຮັບຜິດ ຊອບຄ່າຍົກເວັ້ນພາສີໃນການນຳເຂົ້າອຸປະກອນ.

------------------

ໜັງສືພິມເສດຖະກິດ-ສັງຄົມ

แชร์