ໂຄງການລົດໄຟລາວ-ຈີນ ຈຸດອຸດົມໄຊເລີ່ມຈ່າຍເງິນຊົດເຊີຍງວດ 2 ເກືອບ 50 ຕື້ກີບ

 ອຸດົມໄຊແມ່ນອີກແຂວງໜຶ່ງທີ່ໂຄງການກໍ່ສ້າງທາງລົດໄຟລາວ-ຈີນ ຜ່ານຊຶ່ງຜ່ານມາໂຄງການໄດ້ເອົາໃຈໃສ່ຕໍ່ວຽກງານການກໍ່ສ້າງ ແລະເຫັນວ່າມີຄວາມຄືບໜ້າໄດ້ເປັນຢ່າງດີພ້ອມດຽວກັນນັ້ນກໍໄດ້ຖືສຳຄັນ ແລະ ຂຸ້ນຂ້ຽວໃນການເບີກຈ່າຍຄ່າຊົດເຊີຍໃຫ້ກັບປະຊາຊົນໃນງວດທີ 1 ພ້ອມກຽມ ແລະ ເລີ່ມຈ່າຍຊົດເຊີຍໃນງວດທີ 2 ມູນຄ່າລວມເກືອບ 50 ຕື້ກີບ ໃຫ້ສຳເລັດໃນໄວໆນີ້.

  ຕາມຂໍ້ມູນຈາກແຂວງອຸດົມໄຊ ທີ່ເປີດເຜີຍໃນກອງປະຊຸມປຶກສາຫາລືກ່ຽວກັບການເບີກຈ່າຍເງິນຊົດເຊີຍຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ໄລຍະຜ່ານແຂວງອຸດົມໄຊປະຈຳງວດທີ 2 ທີ່ຈັດຂຶ້ນບໍ່ດົນຜ່ານມານີ້ລະບຸວ່າ: ການເບີກຈ່າຍເງິນຊົດເຊີຍ ແລະເງິນຄ່າເຂົ້າຂອງໂຄງການໃນໄລຍະຜ່ານມາຄືປີ 2017 ມີທັງໝົດ 3 ເມືອງລວມເປັນເງິນ 1,7 ຕື້ກີບໄດ້ຈ່າຍສໍາເລັດໝົດແລ້ວ; ປີ 2018 ລວມທັງໝົດ 2,2 ຕື້ກີບ ໃນນັ້ນເມືອງນາໝໍ້ມີ 10 ບ້ານ, 85 ຄອບຄົວ ຍັງຄ້າງຈ່າຍ 31 ຄອບຄົວ, ເມືອງໄຊ 13 ບ້ານ, 296 ຄອບຄົວຍັງຄ້າງຈ່າຍ 17 ຄອບຄົວ, ເມືອງງາ 9 ບ້ານ, 187 ຄອບຄົວໄດ້ຈ່າຍສໍາເລັດທັງໝົດແລ້ວນອກນັ້ນ ຍັງໄດ້ຈ່າຍເງິນຊົມເຊີຍຜົນກະທົບປະຈຳງວດທີ 1 ໂດຍສະເພາະແມ່ນຄ່າທີ່ດິນ, ຜົນລະປູກຢູ່ ເມືອງໄຊ ຈຳນວນ 13 ຄອບຄົວລວມມູນຄ່າ 4,6 ຕື້ກີບ, ຄ່າໂຮງຮຽນບ້ານຫ້ວຍຂຸມ 15 ຕື້ກວ່າກີບ ລວມທັງໝົດ 20,3 ຕື້ກີບ.

  ສ່ວນແຜນການເບີກຈ່າຍປະຈຳງວດທີ 2 ຂອງແຂວງອຸດົມໄຊມີທັງໝົດຈຳນວນ 16 ບ້ານ ໃນນັ້ນເມືອງນາໝໍ້ 5 ບ້ານ, ເມືອງໄຊ 5 ບ້ານ ແລະເມືອງງາ 6 ບ້ານລວມມູນຄ່າທັງໝົດ 47,4 ຕື້ກີບ.

  ແນວໃດກໍດີເມື່ອວັນທີ 24 ກັນຍາ ຜ່ານມາທີ່ແຂວງດັ່ງກ່າວກໍມີການມອບຄ່າຊົດເຊີຍຈຳນວນ 11 ຕື້ກວ່າກີບ ໃຫ້ກັບປະຊາຊົນຈຳນວນ 6 ບ້ານ ພາຍໃນເມືອງງາ ທີ່ໄດ້ປະກອບສ່ວນດິນປຸກສ້າງ, ເຮືອນ, ດິນປູກຝັງ ແລະຜົນລະປູກແກ່ໂຄງການກໍ່ສ້າງທາງລົດໄຟລາວ-ຈີນ ນອກນັ້ນໂຄງການຍັງຈະສືບຕໍ່ມອບໃຫ້ແກ່ຜູ້ຖືກໂຄງ ການຢູ່ເມືອງອື່ນໆໃນຂັ້ນຕໍ່ໄປ.

  ສຳລັບໂຄງການກໍ່ສ້າງທາງລົດໄຟ ລາວ-ຈີນ ຈຸດຜ່ານແຂວງອຸດົມໄຊ ແມ່ນມີຄວາມຍາວທັງໝົດ 126 ກິໂລແມັດຈະສ້າງ 9 ສະຖານີ ແຕ່ເບື້ອງຕົ້ນໂຄງການຈະສ້າງເມືອງທີ່ເສັ້ນທາງຜ່ານລະ 1 ສະຖານີກ່ອນຄືຢູ່ເມືອງໄຊ, ງາ ແລະ ເມືອງນາໝໍ້ໂດຍການກໍ່ສ້າງມາຮອດເດືອນສິງຫາໜ້າວຽກໂດຍລວມສຳເລັດກາຍແລ້ວ 60 %.

---------------

ຂຽນໂດຍ: ຖວທ ອຸດົມໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์