ຜູ້ປະສົບໄພນໍ້າຖ້ວມສາລະວັນຮັບເຂົ້າຊ່ວຍເຫຼືອຈາກທະນາຄານຮ່ວມພັດທະນາ

   ເພື່ອປະກອບເປັນສ່ວນໜຶ່ງໃນການບັນເທົາທຸກປະຊາຊົນບັນດາເຜົ່າທີ່ໄດ້ຮັບຜົນກະທົບຢ່າງຮ້າຍແຮງຈາກໄພນໍ້າຖ້ວມຢູ່ຫຼາຍແຂວງທາງພາກກາງ ແລະພາກໃຕ້ເປັນຕົ້ນຢູ່ໃນເທສະບານ ເມືອງສາລະວັນ ແລະເມືອງໃກ້ຄຽງຂອງແຂວງສາລະວັນດັ່ງນັ້ນທະນາຄານຮ່ວມພັດທະນາ ຫຼື ເຈດີບີ ຈຶ່ງໄດ້ສືບຕໍ່ສົ່ງນໍ້າໃຈໄປບັນເທົາທຸກຜູ້ປະ ສົບໄພດ້ວຍການນຳເຄື່ອງຊ່ວຍເຫຼືອໄປມອບໃຫ້ແກ່ອົງການປົກຄອງແຂວງເພື່ອແຈກຢາຍປະຊາຊົນຜູ້ຖືກກະທົບເປັນເຂົ້າສານໜຽວ 10 ໂຕນ ລວມມູນຄ່າ 75 ລ້ານກີບ.

 

 ການມອບເຂົ້າສານດັ່ງກ່າວຈັດຂຶ້ນໃນວັນທີ 18 ກັນຍາ 2019 ທີ່ສຳນັກງານປົກຄອງແຂວງສາລະວັນ ຊຶ່ງນໍາພາຄະນະໄປມອບໂດຍ ທ່ານ ຖາວອນ ອ້ວນມາລາ ທີ່ປຶກສາທັງເປັນຜູ້ປະສານງານພາກໃຕ້ຂອງ ເຈດີບີ, ທ່ານ ບົວວອນ ຈັນທະນີເລີດສະມາຊິກສະພາບໍລິຫານທັງເປັນຫົວໜ້າຫ້ອງການ ເຈດີບີ ແລະຕາງໜ້າແຂວງສາລະວັນຮັບມີ ທ່ານ ພູທົງ ຄໍາມະນີວົງ ຮອງເຈົ້າແຂວງສາລະວັນ ທັງເປັນປະທານຄະນະກໍາມະການປ້ອງກັນ ແລະ ແກ້ໄຂໄພພິບັດຂັ້ນແຂວງ, ທ່ານ ສະໄໝ ໂພທິສານຫົວ ໜ້າຫ້ອງວ່າການປົກຄອງແຂວງ ແລະ ທ່ານ ສຸດດາໄລ ອິນດາວົງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງຕະຫຼອດຮອດພະນັກງານທີ່ກ່ຽວ ຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

 ທ່ານ ພູທົງ ຄໍາມະນີວົງ ຮອງເຈົ້າແຂວງສາລະວັນ ໄດ້ສະແດງຄວາມຂອບອົກຂອບໃຈ ແລະຮູ້ບຸນຄຸນຕໍ່ປະທານສະພາບໍລິຫານທະນາຄານຮ່ວມພັດທະນາທີ່ມີນໍ້າໃຈອັນປະເສີດຊ່ວຍເຫຼືອປະຊາຊົນທີ່ປະສົບໄພໃນຄັ້ງນີ້ຫຼັງຈາກນັ້ນທ່ານກໍ່ໄດ້ມອບໃບຍ້ອງຍໍໃຫ້ແກ່ທະນາຄານຮ່ວມພັດທະນາທີ່ມີຜົນງານປະກອບສ່ວນຊ່ວຍເຫຼືອໄພນໍ້າຖ້ວມໃນຄັ້ງນີ້ຕື່ມອີກ.

---------------------

ຂຽນໂດຍ: ຄໍາຕົ້ນ ວໍລະຈັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์