ສະແດງສິລະປະເພີ່ມທະວີມິດຕະພາບ ລາວ-ຈີນ

 ກຸ່ມບໍລິສັດວິສະວະກຳທາງລົດໄຟເລກ 8 ສປ ຈີນ ຈຳກັດໄດ້ຈັດງານສະແດງສິລະປະລາວ-ຈີນ ພາຍໃຕ້ຫົວຂໍ້ “ທາງລົດໄຟລາວ-ຈີນ ຊ່ວຍບັນລຸຄວາມຝັນສືບຕໍ່ເພີ່ມທະວີມິດຕະພາບ ລາວ-ຈີນ” ເນື່ອງໃນໂອກາດວຽກງານກໍ່ສ້າງພື້ນຖານທາງຂອງທາງລົດໄຟລາວ-ຈີນຢູ່ ໃນໄລຍະບາດລ້ຽວບາດຕໍ່ໃນການບັນລຸວຽກງານເພື່ອບົ່ງບອກເຖິງໝາກຜົນສຳເລັດຂອງການກໍ່ສ້າງ.

 ພິທີໄດ້ຈັດຂຶ້ນໃນວັນທີ 24 ກັນຍາ ທີ່ໂຮງແຮມແລນມາກ ນະຄອນຫຼວງວຽງຈັນເຂົ້າຮ່ວມມີທ່ານ ສັນຕິສຸກ ສິມມະລາວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ຈ້າວເສີງກ່າງ ຕາງໜ້າສະຖານທູດຈີນປະຈຳລາວ, ທ່ານ ຫຼີປີງສວນ ອຳນວຍການໃຫຍ່ບໍລິສັດທາງລົດໄຟ ລາວ-ຈີນ ຈຳກັດ, ພ້ອມແຂກຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.

  ງານສະແດງສິລະປະ ລາວ-ຈີນ ຄັ້ງນີ້ມີຄວາມໝາຍຄວາມສຳຄັນຕໍ່ການກໍ່ສ້າງ ໂຄງການລົດໄຟລາວ-ຈີນ ໃນໂອກາດວຽກງານການກໍ່ສ້າງພື້ນຖານທາງລົດໄຟລາວ-ຈີນ ໄດ້ບັນລຸໃນຫຼາຍໜ້າວຽກ, ການກໍ່ສ້າງເສັ້ນທາງລົດໄຟລາວ-ຈີນ ທີ່ກຳລັງເລັ່ງການກໍ່ສ້າງແມ່ນໄດ້ກາຍເປັນສັນຍາລັກແຫ່ງມິດຕະພາບທີ່ມີມູນເຊື້ອຂອງລາວ-ຈີນ ໃນຍຸກສະໄໝໃໝ່ເປັນຕົວຂັບເຂື່ອນໃນການໃນການພັດທະນາສັງຄົມທີ່ທັນສະໄໝຂອງ ສປປ ລາວ.

  ສຳລັບລາຍການທີ່ນຳມາສະແດງຄັ້ງນີ້ມາຈາກພາກສ່ວນບໍລິສັດທາງເລກ 8 ສປ ຈີນ ຈໍາກັດ, ກຸ່ມບໍລິສັດວິສະວະກໍາທາງລົດໄຟສາກົນ ສປ ຈີນ, ກຸ່ມບໍລິສັດວິສະວະກໍາທາງລົດໄຟເລກ 2 ສປ ຈີນ, ວິທະຍາໄລວິຊາຊີບສິລະປະເສສວນ, ກຸ່ມບໍລິສັດກໍ່ສ້າງພະລັງງານໄຟຟ້າ ສປ ຈີນ, ຄະນະຟ້ອນບ້ານລາວແດນຈຳປາ, ກຸ່ມບໍລິສັດວິສະວະກໍາທາງລົດໄຟກວາງໂຈວ ສປ ຈີນຈຳກັດ ຊຶ່ງທັງໝົດມີ 20 ລາຍການເຊັ່ນ: ບົດຟ້ອນ, ບົດຮ້ອງເພງ, ສະແດງລະຄອນເວທີ ແລະກາຍະສິນໃນແຕ່ລະລາຍການສະທ້ອນໃຫ້ເຫັນຄວາມຄືບໜ້າຫ້າວຫັນ ແລະຄວາມເບີກບານມ່ວນຊື່ນໃນການປະຕິບັດໜ້າທີ່ວຽກງານໃນການສ້າງທາງລົດໄຟ.

--------------

ຂຽນໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 26/09/2019