ເຂົ້າກິນ ຄືສິ່ງຈຳເປັນຮີບດ່ວນຂອງຜູ້ປະສົບໄພນໍ້າຖ້ວມຢູ່ສະຫວັນນະເຂດ

  ສະຫວັນນະເຂດ ເປັນແຂວງໜຶ່ງທີ່ໄດ້ຮັບຜົນເສຍຫາຍຢ່າງໜັກຈາກໄພພິບັດທີ່ເກີດຂຶ້ນໃນຊ່ວງທ້າຍເດືອນສິງຫາ ຫາຕົ້ນເດືອນກັນຍາເຮັດໃຫ້ທີ່ຢູ່ອາໄສ 11 ເມືອງຖືກນໍ້າຖ້ວມສ່ວນເນື້ອທີ່ທຳການຜະລິດ 14 ເມືອງ ແລະ 1 ນະຄອນຖືກກະທົບຂະນະທີ່ປະຈຸບັນເຖິງນໍ້າຈະບົກແຫ້ງລົງແລ້ວແຕ່ສິ່ງທີ່ຜູ້ປະສົບໄພຕ້ອງການຫຼາຍກວ່າໝູ່ເພື່ອມາບັນເທົາ ແລະຟື້ນຟູຊີວິດແມ່ນເຂົ້າກິນ, ສ່ວນເຄື່ອງບໍລິໂພກ-ອຸປະໂພກອື່ນໆເປັນອັນສຳຮອງ.

  ທ່ານ ບຸນລົບ ໂຄດລັກຄຳ ຫົວໜ້າ ພະແນກແຮງງານ ແລະສະຫວັດດີການ ສັງຄົມ (ຮສສ) ແຂວງສະຫວັນນະເຂດ, ທັງເປັນຮອງປະທານຄະນະກຳມະການຕ້ານໄພພິບັດຂັ້ນແຂວງໃຫ້ສຳພາດ ວ່າ: ໄພນ້ຳຖ້ວມທີ່ເກີດຂຶ້ນນັບແຕ່ວັນທີ 24 ສິງຫາ ຫາວັນທີ 16 ກັນຍາປີນີ້ ແມ່ນເປັນໄພພິບັດທີ່ຮ້າຍແຮງຮອບຫຼາຍສິບປີກວມເອົາວົງກວ້າງ, ສະເພາະສະຫວັນນະເຂດ ມີ 11 ເມືອງຖືກຖ້ວມທີ່ຢູ່ອາໄສ, ລວມມີ 179 ບ້ານ, 16,9 ພັນຄອບຄົວ, 1,22 ແສນຄົນ, ຖືກຍົກຍ້າຍມີ 114 ບ້ານມີ 10 ພັນກວ່າຄອບຄົວ,ເນື້ອທີ່ທຳການຜະລິດທີ່ຖືກນໍ້າຖ້ວມລວມມີ 14 ເມືອງກັບອີກ 1 ນະຄອນ, ມີ 526 ບ້ານ, ເນື້ອທີ່ນາຖືກຖ້ວມ 50,8 ພັນເຮັກຕາ, ເສຍຫາຍ 40,5 ພັນເຮັກຕາ, ໃນນັ້ນຖ້ວມໜັກມີ 3 ເມືອງຄື: ຈຳ ພອນ, ຊົນນະບູລີ ແລະເມືອງສອງຄອນ,  ມາຮອດປະຈຸບັນ ສະພາບນໍ້າໄດ້ມີການບົກແຫ້ງໂດຍລວມບັນດາເມືອງທີ່ຖືກນໍ້າຖ້ວມໄດ້ກັບຄືນສູ່ສະພາບປົກກະຕິແລ້ວ, ສ່ວນຢູ່ເມືອງພິນ ຍັງ 3 ບ້ານທີ່ບໍ່ທັນມີໄຟຟ້າໃຊ້, ເນື່ອງຈາກໄລຍະຜ່ານມາເສົາໄຟຫັກການເຂົ້າໄປຕິດຕັ້ງໃໝ່ ຍັງບໍ່ທັນເຮັດໄດ້ເພາະສະພາບທາງບໍ່ເອື້ອອຳນວຍ.

  ທ່ານຫົວໜ້າພະແນກ ຮສສ ແຂວງຍັງໃຫ້ຮູ້ອີກວ່າ: ເຖິງແມ່ນວ່າສະພາບ ນ້ຳຖ້ວມຈະບົກແຫ້ງລົງແລ້ວກໍຕາມ, ແຕ່ຄວາມຕ້ອງການອັນຮີບດ່ວນໃນປະຈຸບັນຂອງປະຊາຊົນຍັງແມ່ນເຂົ້າກິນ, ຊຶ່ງເປັນ ສິ່ງທ້າທາຍ ເພາະການຈະສະໜອງເຂົ້າ ກິນໃຫ້ກັບປະຊາຊົນ 61 ພັນກວ່າຄົນ ຕ້ອງໃຊ້ເຂົ້າ 3,32 ພັນໂຕນ ໂດຍແຂວງໄດ້ເລີ່ມສະໜອງໃຫ້ເລີ່ມແຕ່ດຽວນີ້ໄປ,ນອກຈາກເຂົ້າກໍຍັງມີເຄື່ອງບໍລິໂພກ ແລະອຸປະໂພກອື່ນໆ, ໂດຍໄລຍະຜ່ານ ມາຂັ້ນເທິງກໍໄດ້ສົ່ງເຄື່ອງເພື່ອມາບັນເທົາທຸກໃຫ້ກັບປະຊາຊົນແລ້ວ ເປັນຕົ້ນເຂົ້າ ແລະເຄື່ອງບໍລິໂພກ-ອຸປະໂພກຈຳນວນໜຶ່ງ, ສ່ວນພາຍໃນແຂວງກະໄດ້ມີການລະດົມກັນຊ່ວຍເຫຼືອໄລຍະນໍ້າຖ້ວມເຊັ່ນກັນ.

  ສຳລັບຄວາມເສຍຫາຍທີ່ເກີດຂຶ້ນໃນຄັ້ງນີ້ນອກຈາກເຮືອນຊານທີ່ຢູ່ອາໄສທີ່ໄດ້ຮັບຄວາມເສຍຫາຍແລ້ວກໍຍັງມີເນື້ອທີ່ທຳການຜະລິດ, ໂຄງລ່າງຖະໜົນຫົນທາງ, ໄຟ ຟ້າ, ນໍ້າປະປາ, ໂຮງຮຽນ, ໂຮງໝໍ ແລະສຸກສາລາ, ລວມແລ້ວເສຍ ຫາຍຫຼາຍສົມຄວນ, ສະເພາະເນື້ອທີ່ທຳ ການຜະລິດຕາມການປະເມີນເບື້ອງຕົ້ນ ຕ້ອງການ 48 ຕື້ກວ່າກີບ ເພື່ອເລັ່ງສ້ອມ ແປງຊົນລະປະທານ ແລະການສະໜອງ ແນວພັນຕ່າງໆ, ໂຄງລ່າງຖະໜົນຫົນທາງ ຕ້ອງການ 68 ຕື້ກີບ, ໃນນັ້ນ ມີເສັ້ນທາງ 57 ເສັ້ນ ແລະຂົວຈຳນວນໜຶ່ງ, ເພື່ອເລັ່ງຟື້ນຟູໃນໄລຍະຍາວແຂວງກໍຄືແຕ່ລະພະແນກພວມສຸມໃສ່ເກັບກຳຂໍ້ມູນປະເມີນຄວາມເສຍຫາຍ ແລະຄວາມຕ້ອງການ, ທ່ານຫົວໜ້າພະແນກ ຮສສ ໃຫ້ຮູ້ຕື່ມ.

-----------------

ຂຽນໂດຍ: ພິມພອນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์