ເຈດີບີມອບເຂົ້າຊ່ວຍເຫຼືອຜູ້ປະສົບໄພນໍ້າຖ້ວມທີ່ສະຫວັນນະເຂດ

  ໃນວັນທີ 17 ກັນຍາຜ່ານມາທະນາຄານຮ່ວມພັດທະນາ ຫຼືເຈດີບີຊຶ່ງນໍາພາຄະນະໂດຍທ່ານ ຖາວອນ ອ້ວນມາລາ ທີ່ປຶກສາທັງເປັນຜູ້ປະສານງານພາກໃຕ້ຂອງທະນາ ຄານຮ່ວມພັດທະນາພ້ອມນີ້ກໍມີ ທ່ານ ປອ ບົວວອນ ຈັນທະນີເລີດ ສະມາຊິກສະພາບໍລິຫານທັງເປັນຫົວໜ້າຫ້ອງການເຈດີບີຕະຫຼອດຮອດພະນັກງານທີ່ກ່ຽວຂ້ອງ ເດີນທາງຈາກນະຄອນຫຼວງວຽງຈັນ ເພື່ອນໍາເອົາເຄື່ອງຊ່ວຍເຫຼືອໄປມອບໃຫ້ຜູ້ປະສົບໄພນໍ້າຖ້ວມທີ່ແຂວງສະຫວັນນະເຂດ.

  ເຄື່ອງທີ່ນໍາໄປມອບໃນຄັ້ງນີ້ມີເຂົ້າສານໜຽວ 20 ໂຕນ ລວມມູນຄ່າ 150 ລ້ານກີບ ເພື່ອເປັນສ່ວນໜຶ່ງໃນການປະກອບສ່ວນບັນເທົາທຸກໃຫ້ແກ່ປະຊາຊົນບັນດາເຜົ່າ ທີ່ໄດ້ຮັບຜົນກະທົບຢ່າງຮ້າຍ ແຮງຈາກຝົກຕົກໜັກຕິດຕໍ່ກັນຫຼາຍວັນ ເຮັດໃຫ້ເກີດນໍ້າຖ້ວມຢູ່ສາມເມືອງຄື: ເມືອງຈໍາພອນ, ເມືອງສອງຄອນ,ເມືອງ ຊົນບູລີ ທີ່ໄດ້ຮັບຜົນກະທົບໜັກດັ່ງນັ້ນທະນາຄານຮ່ວມພັດທະນາຈຶ່ງໄດ້ສົ່ງນໍ້າໃຈໄປບັນເທົາທຸກ.

  ຕາງໜ້າແຂວງສະຫວັນນະເຂດ ກ່າວຮັບໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ຊຶ່ງທ່ານໄດ້ສະແດງຄວາມຂອບອົກຂອບໃຈ ແລະ ຮູ້ບຸນຄຸນຕໍ່ປະທານສະພາບໍລິຫານທະນາຄານຮ່ວມພັດທະນາທີ່ມີນໍ້າໃຈອັນປະເສີດ ຊ່ວຍເຫຼືອປະຊາຊົນທີ່ປະສົບໄພຄັ້ງນີ້ຫຼັງຈາກນັ້ນ ທ່ານ ສັນຕິພາບ ພົມວິຫານ ກໍ່ໄດ້ມອບໃບຍ້ອງຍໍໃຫ້ແກ່ທະນາຄານຮ່ວມພັດທະນາທີ່ມີຜົນງານປະກອບສ່ວນຊ່ວຍເຫຼືອໄພນໍ້າຖ້ວມໃນຄັ້ງນີ້ຕື່ມອີກ.

-----------------

ຂຽນໂດຍ: ຄໍາຕົ້ນ ວໍລະຈັກ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 25/09/2019