ບໍ່ຄຳເຊໂປນ ມອບວັດຖຸບູຮານ 7,8 ພັນລາຍການໃຫ້ແກ່ລັດ

 ວັນທີ 24 ກັນຍາຜ່ານມາ ທີ່ນະຄອນຫຼວງວຽງຈັນ ໄດ້ມີພີທິມອບ-ຮັບວັດຖຸບູຮານທີ່ຄົ້ນພົບຢູ່ໂຄງການບໍ່ຄຳ-ທອງເຊໂປນໃຫ້ແກ່ລັດຖະບານລາວຢ່າງເປັນທາງການໂດຍລົງນາມມອບ-ຮັບລະຫວ່າງ ທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດລ້າງຊ້າງມິເນໂຣນສ໌ລິມິເຕັດ (ລຊມລ), ທ່ານ ນາງ ວັນເພັງ ແກ້ວປັນຍາ

ຜູ້ອຳນວຍການຫໍພິພິທະພັນແຫ່ງຊາດ, ທ່ານ ອາລາທິເວດ ອຳມະລາ ທິທາດາ ຜູ້ອຳນວຍການຫໍພິພິທະພັນ ແຂວງສະຫວັນນະເຂດ ແລະທ່ານນາງ ຕຸ້ຍທອງ ແກ້ວວົງສາ ຫົວໜ້າຫ້ອງການ ຖວທ ເມືອງວິລະບູລີ ໂດຍເຂົ້າຮ່ວມຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ, ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 

 ສຳລັບວັດຖຸບູຮານທີ່ບໍລິສັດນຳມາມອບແມ່ນນັບແຕ່ເລີ່ມຕົ້ນໂຄງການມີທັງໝົດ 7.881 ລາຍການໂດຍວັດຖຸເຫຼົ່ານີ້ເຮັດດ້ວຍທອງ, ທອງແດງ, ເພັດພອຍ, ເຄື່ອງປັ້ນດິນເຜົາ, ໄມ້ ແລະອື່ນໆແມ່ນລ້ວນແຕ່ໄດ້ຄົ້ນພົບຢູ່ບໍ່ຄຳ-ທອງເຊໂປນຂອງບໍລິສັດຊຶ່ງເປັນຜົນງານທີ່ພົ້ນເດັ່ນຈາກການສະໜັບສະໜູນຂອງບໍລິສັດ ລຊມລ ໃຫ້ແກ່ລັດຖະບານລາວໃນການສຶກສາຄົ້ນຄວ້າບູຮານຄະດີ ແລະ ການອະນຸລັກມໍລະດົກທາງວັດທະນະທຳ, ພາຍຫຼັງການມອບ-ຮັບວັດຖຸດ່ັງກ່າວຈະນຳໄປວາງສະແດງຢູ່ຫໍພິພິທະພັນແຫ່ງຊາດ 828 ລາຍການ, ຫໍພິພິທະພັນແຂວງສະຫວັນນະເຂດ 409 ລາຍການ ແລະຫໍວັດທະນະທຳເມືອງວິລະບູລີ 6.644 ລາຍການ.

 ນັບແຕ່ປີ 2008 ເປັນຕົ້ນມາບໍລິສັດລ້ານຊ້າງມິເນໂຣນສ໌ລິມິເຕັດໄດ້ລົງທຶນຫຼາຍກວ່າ 1,3 ລ້ານໂດລາ ເຂົ້າໃນການສະໜັບສະໜູນການອະນຸລັກປະຫວັດສາດລາວ ແລະມໍລະດົກທາງວັດທະນະທຳກວ່າ 3 ພັນປີ ຜ່ານການຮ່ວມມືດ້ານການຄົ້ນຄວ້າບູຮານຄະດີກັບກົມມໍລະດົກຂອງກະຊວງຖະແຫຼງຂ່າວ, ວັດທະນະທຳ ແລະທ່ອງ ທ່ຽວ, ມະຫາວິທະຍາໄລແຫ່ງຊາດ ແລະມະຫາວິທະຍາໄລເຈມສ໌ຄຸກຂອງອົດສະຕຣາລີ.

 ໂດຍວັດຖຸທີ່ຄົ້ນພົບຢູ່ບໍ່ຄຳ-ທອງເຊໂປນລວມມີອຸປະກອນນຳໃຊ້ໃນການຂຸດຄົ້ນແຮ່ເຊັ່ນ: ຂັ້ນໄດທີ່ເຮັດດ້ວຍໄມ້ ແລະລູກລອກ, ໄມ້ຄໍ້າ, ກະຕ່າໄມ້ໄຜ່ ແລະເຊືອກ, ຄ້ອງບ້າງທອງສຳລິດຈາກຍຸກທອງ, ກ້ອນທອງ, ເຄື່ອງປັ້ນດິນເຜົາ, ກະທິງທອງສຳລິດ, ເຄື່ອງປະດັບ, ເຄື່ອງໃຊ້ໃນພິທີກຳ ແລະວັດຖຸອື່ນໆ ຊຶ່ງຊີ້ໃຫ້ເຫັນວ່າປະເທດລາວໃນອະດີດເປັນສະຖານທີ່ສຳຄັນໃນປະຫວັດສາດໃນຂົງເຂດພາກພື້ນນີ້.

--------------

ໜັງສືພິມເສດຖະກິດ-ສັງຄົມ

 

แชร์