ຫຼາຍພາກສ່ວນຈັດງານສະແດງ ວັດທະນະທຳຍີ່ປຸ່ນ

 ສະຖານເອກອັກຄະຮາຖະທູດຍີ່ປຸ່ນ ປະຈຳ ສປປ ລາວ ຮ່ວມກັບສູນອາຊີມູນນິທິຍີ່ປຸ່ນຫ້ອງການພົວພັນນະຄອນຫຼວງວຽງຈັນ, ສະຖາບັນລາວ-ຍີ່ປຸ່ນ ແລະສູນການຄ້າວຽງຈັນເຊັນເຕີຈັດງານແລກປ່ຽນວັດທະນະທຳຍີ່ປຸ່ນໃນວັນທີ 21 ກັນຍາ 2019, ໂດຍມີຜູ້ຄົນເຂົ້າຮ່ວມຢ່າງຫຼວງຫຼາຍທີ່ມາຈາກ ໄວແຕກຕ່າງກັນເພື່ອມາສຳຜັດກັບວັດທະນະທຳຂອງຍີ່ປຸ່ນ.

  ໃນງານປະກອບມີຫຼາຍກິດຈະກຳທາງດ້ານວັດທະນະທຳຍີ່ປຸ່ນເຊັ່ນ: ການລອງນຸ່ງຊຸດຢູ່ຄາຕະ (ຊຸດທີ່ໃຊ້ນຸ່ງໃນລະດູຮ້ອນຂອງຍີ່ປຸ່ນ), ໂອລິງາມິ (ການຜັບເຈ້ຍ ແບບຍີ່ປຸ່ນ), ຟຸໂລຊິກິ (ການຫໍ່ເຄື່ອງ), ໂຊໂດ່ (ການແຕ້ມໂຕ ໜັງສືຍີ່ປຸ່ນ), ໂຊງິ (ການຫຼິ້ນໝາກດ້າມຍີ່ປຸ່ນ), ເຄື່ອງຫຼິ້ນດັ່ງເດີມຂອງຍີ່ປຸ່ນ ແລະເກມຖາມ-ຕອບກ່ຽວ ກັບພາສາຍີ່ປຸ່ນ, ງານດັ່ງກ່າວໄດ້ເປີດໂອກາດໃຫ້ແກ່ຜູ້ທີ່ສົນໃຈລອງມາສຳຜັດກັບກິດຈະກຳຕ່າງຂອງຍີ່ປຸ່ນ, ມີການແນະ ນຳຈາກອາຈານ ແລະ ບັນດາຜູ້ຊ່ວຍທີ່ກຳລັງຮຽນພາສາຍີ່ປຸ່ນ.

  ພາຍໃນງານດັ່ງກ່າວມີຜູ້ສິດສອນທີ່ມີປະສົບການຈາກສະຖາບັນລາວ-ຍີ່ປຸ່ນ ຊຶ່ງເປັນໂອກາດທີ່ດີທີ່ຜູ້ຄົນມາຮ່ວມງານຈະໄດ້ຮຽນຮູ້ກ່ຽວກັບວັດທະນະທໍາຂອງຊຸດຄິໂມໂນະໃນປະເທດຍີ່ປຸ່ນ, ເຄື່ອງນຸ່ງຖືພື້ນເມືອງຍີ່ປຸ່ນ ແລະ ໄດ້ໃຫ້ຄໍາແນະນໍາສາທິດກ່ຽວກັບວິທີການມັດໂອບິ,  ສາຍຮັດແອວ ສໍາລັບຊຸດຄິໂມໂນະ, ນອກຈາກນີ້ຍັງມີການສະແດງຈາກສິນລະປິນທີ່ມີຊື່ສຽງໃນລາວເປັນທີ່ຮູ້ຈັກ ກັນດີໃນຊື່ໂອລ້າ ຫຼື ວົງ Blackeyes ກໍ່ໄດ້ມາເພື່ອສົນທະນາ ກ່ຽວກັບປະສົບການຂອງລາວທີ່ຢູ່ປະເທດຍີ່ປຸ່ນ ແລະຍັງມີການສະແດງໄອກິໂດ້ (ສິນລະປະປ້ອງກັນຕົວຍີ່ປຸ່ນສະໄໝໃໝ່), ການສະແດງຈາກລາວເນວີ, ການເຕັ້ນໂດຍນັກຮຽນຈາກໂຮງຮຽນຮວງເຂົ້າ ແລະ ການສະແດງອື່ນໆອີກຢ່າງຫຼວງຫຼາຍຊຶ່ງພາຍໃນງານເຕັມໄປດ້ວຍຄວາມມ່ວນຊື່ນ, ສະໜຸກສະໜານຂອງຜູ້ຄົນທີ່ມາຮ່ວມງານ.

------------------

ຂຽນໂດຍ: ລຸນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 25/09/2019