ຈີນມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ 6 ແຂວງ

 ວັນທີ 20 ກັນຍາທີ່ກະຊວງແຮງງານ ແລະສະຫວັດດີການສັງຄົມ (ຮສສ) ລັດຖະບານ ແຫ່ງ ສປ ຈີນໄດ້ນຳເງິນສົດ ມູນຄ່າຫຼາຍກວ່າ 8 ຮ້ອຍລ້ານກີບ ມາມອບໃຫ້ກະຊວງ ຮສສ ເພື່ອນຳໄປຊ່ວຍເຫຼືອຜູ້ປະສົບໄພນໍ້າຖ້ວມຢູ່ 6 ແຂວງພາກກາງ ແລະພາກໃຕ້ຂອງລາວ, ໂດຍຕາງໜ້າລັດຖະບານຮັບແມ່ນ ທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ທັງເປັນປະທານຄະນະກຳມະການປ້ອງກັນ ແລະຄວບຄຸມໄພພິບັດແຫ່ງຊາດ ແລະຕາງໜ້າລັດຖະບານຈີນມອບແມ່ນທ່ານ ຈ່ຽງ ຈາຍ ດົ່ງ ເອກອັກຄະລັດຖະທູດ ຈີນ ປະຈຳລາວ, ພ້ອມນັ້ນຍັງມີພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຈ່ຽງ ຈາຍ ດົ່ງ ກ່າວວ່າ: ຈຳນວນເງິນສົດທີ່ຕາງໜ້າລັດຖະບານ ສປ ຈີນ ນຳມາມອບຄັ້ງນີ້ ແມ່ນໄດ້ຈາກການລະດົມທຶນຂອງອົງການກາແດງ ສປ ຈີນ 1 ແສນໂດລາ ຫຼື ປະມານ 8,5 ຮ້ອຍລ້ານກີບ, ລະດົມຈາກບັນດາພະນັກງານຂອງບໍລິສັດກໍ່ສ້າງສົງທຶນ ແລະຖືຮຸ້ນແຂວງຢຸນນານ 18,52 ລ້ານກີບ, ນັກສຶກສາລາວທີ່ກຳລັງສຶກສາຢູ່ແຂວງຫູເປີຍ ສປ ຈີນ 3,12 ລ້ານກີບ, ເພື່ອໃຫ້ກະຊວງນຳໄປຈັດສັນແບ່ງປັນແກ່ຜູ້ທີ່ໄດ້ຮັບຜົນກະທົບ ແລະເຫັນວ່າຍັງຂາດແຄນຕາມຄວາມເໝະສົມ, ທັງນີ້ ກໍເພື່ອໃຫ້ເຂົາເຈົ້າສາມາດຜ່ານພົ້ນວິດກິດໄປໄດ້ໂດຍໄວ ແລະຕາງໜ້າລັດຖະບານ ສປ ຈີນ ກໍຫວັງວ່າດ້ວຍການນຳພາຂອງພັກ-ລັດລາວທີ່ເຂັ້ມແຂງຈະເຮັດໃຫ້ຜູ້ປະສົບໄພກໍຄືປະຊາຊົນລາວສາມາດຜ່ານພົ້ນວິກິດໄດ້ ແລະກັບຄືນສູ່ສະພາບປົກກະຕິໂດຍໄວ.

 ໂອກາດດຽວກັນນັ້ນ, ທ່ານ ຄຳແພງ ໄຊສົມແພງ ກໍໄດ້ສະແດງຄວາມຂອບໃຈຕໍ່ກັບການຊ່ວຍເຫຼືອຂອງຝ່າຍຈີນ, ພ້ອມໃຫ້ຄຳໝັ້ນວ່າຈະນຳໃຊ້ເງິນທຸກກີບບໍ່ສະເພາະແຕ່ເງິນທີ່ລັດຖະບານຈີນຊ່ວຍເຫຼືອເທົ່ານັ້ນເພື່ອເຮັດໃຫ້ປະຊາຊົນລາວໂດຍສະເພາະແມ່ນຜູ້ທີ່ໄດ້ຮັບຜົນກະທົບຈາກໄພພິບັດໃນເທື່ອນີ້ສາມາດຜ່ານພົ້ນວິກິດ ແລະກັບມາໃຊ້ຊີວິດໄດ້ຢ່າງປົກກະຕິໄວເທົ່າທີ່ຈະໄວໄດ້, ແຕ່ທັງນີ້ທັງນັ້ນເພື່ອເລັ່ງຟື້ນຟູແກ້ໄຂໃນໄລຍະຍາວແລ້ວເຫັນວ່າບັນດາແຂວງເຫຼົ່ານັ້ນຍັງມີຄວາມຕ້ອງການຢ່າງມະຫາສານໃນການສ້ອມແປງຟື້ນຟູຖະໜົນຫົນທາງ, ໂຮງຮຽນ, ໂຮງໝໍ, ໄຟຟ້າ, ນໍ້າປະປາ ແລະອື່ນໆ.

ນອກຈາກນັ້ນໃນວັນດຽວກັນສະມາຄົມໂຊນແດນ (SODEL) ປະເທດຝຣັ່ງມອບຊ່ວຍອີກ 48,5 ລ້ານກີບ, ຊຶ່ງຕາງໜ້າສະມາຄົມມາມອບໂດຍ ທ່ານ ສີສະຫຼຽວ ສະແວງສຶກສາ ແລະຮັບແມ່ນທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ.

-------------------

ໜັງສືພິມເສດຖະກິດ-ສັງຄົມ

แชร์