ຜົ້ງສາລີ ມອບເງິນຮ້ອຍລ້ານກີບຊ່ວຍຜູ້ປະສົບໄພນໍ້າຖ້ວມ

 ວັນທີ 23 ກັນຍາ 2019, ແຂວງຜົ້ງສາລີ ໄດ້ນຳເງິນສົດ ມູນຄ່າ 1 ຮ້ອຍລ້ານກີບ ມາມອບໃຫ້ກະຊວງແຮງງານ ແລະ ສະຫວັດດີການສັງຄົມ (ຮສສ) ເພື່ອໃຫ້ກະ ຊວງນຳໄປຈັດຕັ້ງປະຕິບັດໃນວຽກແກ້ໄຂໄພນໍ້າຖ້ວມໃນ 6 ແຂວງພາກກາງ ແລະພາກໃຕ້, ໂດຍຕາງໜ້າ ແຂວງມອບແມ່ນ ທ່ານ ຄໍາເຈນ ວົງໂພສີ ເຈົ້າແຂວງຜົ້ງສາລີ ແລະ ຕາງໜ້າກະຊວງຮັບແມ່ນທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງຮສສ, ທັງເປັນຮອງປະທານຄະນະກຳມະການປ້ອງກັນ ແລະຄວບຄຸມໄພພິບັດແຫ່ງຊາດ, ພ້ອມນັ້ນຍັງມີໜ່ວຍງານທີ່ກ່ຽວຂ້ອງຂອງກະຊວງເຂົ້າຮ່ວມ.

  ທ່ານ ຄໍາເຈນ ວົງໂພສີ ກ່າວວ່າ: ເງິນຈຳນວນ 1 ຮ້ອຍລ້ານກີບທີ່ນຳ ມາມອບເທື່ອນີ້ ແມ່ນໄດ້ຈາກການລະດົມ ຂອງທຸກພາກສ່ວນນັບທັງພາກລັດ, ພາກ ເອກະຊົນ ແລະຕະຫຼອດຮອດປະຊາຊົນ ພາຍໃນແຂວງ, ປະກອບສ່ວນຊ່ວຍເຫຼືອ ຟື້ນຟູຜູ້ປະສົບໄພຢູ່ 6 ແຂວງພາກກາງ ແລະພາກໃຕ້, ເພື່ອເຮັດໃຫ້ຜູ້ປະສົບໄພ ເຫຼົ່ານັ້ນມີຊີວິດການເປັນຢູ່ທີ່ດີຂຶ້ນ ແລະໄດ້ຮັບການແກ້ໄຂໂດຍໄວ ເພື່ອທີ່ພວກເຂົາເຫຼົ່ານັ້ນຈະສາມາດກັບມາໃຊ້ຊີວິດ ໄດ້ຢ່າງເປັນປົກກະຕິ.

 ທ່ານ ນາງ ໃບຄຳ ຂັດທິຍະ ກ່າວວ່າ: ພາຍຫຼັງທີ່ເກີດເຫດກະຊວງ ຮສສ ໄດ້ຮັບມອບໝາຍຈາກລັດຖະບານ, ຊຶ່ງກໍໄດ້ຕັ້ງໜ້າປະຕິບັດພາລະບົດບາດຂອງກະຊວງເລີ່ມແຕ່ມື້ເກີດໄພພິບັດມາຮອດປະຈຸບັນແມ່ນຍັງສືບຕໍ່ຂົນສົ່ງເຄື່ອງ, ພ້ອມທັງສະໜອງງົບປະມານທີ່ຈຳເປັນໃຫ້ກັບບັນດາ 6 ແຂວງ ເປັນຕົ້ນເງິນສົດ, ເຄື່ອງອຸປະໂພກ-ບໍລິ ໂພກ ເພື່ອສົ່ງ ໃຫ້ກັບແຂວງທີ່ຍັງຈຳເປັນຮີບດ່ວນ, ດັ່ງນັ້ນການປະກອບສ່ວນຂອງແຂວງຜົ້ງສາລີເທື່ອນີ້ແມ່ນຈະໄດ້ນຳໄປຊ່ວຍເຫຼືອປະຊາຊົນຜູ້ປະສົບໄພນໍ້າາຖ້ວມດັ່ງກ່າວນັ້ນ ໃຫ້ເກີດປະໂຫຍດສູງສຸດ, ຢ່າງໃດກໍດີ ໄລຍະນີ້ຍັງຈັດຢູ່ໃນໄລຍະຂອງການບັນເທົາທຸກ, ການຊ່ວຍເຫຼືອສຸກເສີນ ແລະໃນຕໍ່ໜ້າແມ່ນໄລຍະຂອງການຟື້ນຟູຍິ່ງຕ້ອງການຫຼາຍໂດຍສະເພາະການຟື້ນຟູຊີວິດການເປັນຢູ່, ຟື້ນຟູພື້ນຖານໂຄງລ່າງ ແລະການຟື້ນຟູທາງດ້ານວິຊາຊີບຄືນໃໝ່.

  ສະເພາະຍອດບໍລິຈາກເພື່ອຊ່ວຍເຫຼືອຜູ້ປະສົບໄພນໍ້າຖ້ວມຢູ່ບັນດາແຂວງພາກກາງ ແລະພາກໃຕ້ທີ່ໄດ້ເລີ່ມມາແຕ່ວັນທີ 7-19 ກັນຍາ 2019, ໂດຍໄດ້ຮັບເປັນເງິນສົດທີ່ແຕ່ລະພາກສ່ວນມາມອບຢູ່ ກະຊວງ ຮສສ, ມອບຜ່ານ ຫ້ອງການສຳ ນັກງານນາຍົກລັດຖະມົນຕີ (ຫສນຍ) ແລະໂອນເຂົ້າບັນຊີກອງທຶນບໍລິຈາກ ເພື່ອຊ່ວຍເຫຼືອຜູ້ປະສົບເຄາະຮ້າຍຈາກໄພພິບັດກະຊວງ ຮສສ ຢູ່ທະນາຄານການຄ້າຕ່າງປະເທດລາວມະຫາຊົນ (ບັນຊີສະກຸນເງິນກີບ, ບາດ ແລະໂດລາ) ມີ 41 ພາກສ່ວນ, ໃນນັ້ນຍອດເງິນທີ່ກະຊວງ ຮສສ ໄດ້ຮັບຈຳນວນ 37 ພາກສ່ວນເປັນເງິນ 8,27 ຕື້ກີບ ແລະບັນດາບໍລິສັດທີ່ຍົກປ້າຍມອບເງິນບໍລິຈາກ (ມອບຜ່ານ ຫສນຍ) ແຕ່ຍັງບໍ່ໄດ້ຮັບເງິນຈຳນວນ 4 ພາກສ່ວນເປັນເງິນທັງໝົດ 4 ຕື້ກີບ ແລະ 1,80 ແສນໂດລາ.

----------------

ໜັງສືພິມເສດຖະກິດ-ສັງຄົມ

แชร์