9 ເດືອນໄຊຍະສົ່ງອອກສິນຄ້າກາຍແຜນປີເກືອບ 3%

 ການສົ່ງອອກສິນຄ້າໄປຕ່າງປະເທດ ແລະຕ່າງແຂວງຂອງ ແຂວງໄຊຍະບູລີ ຜະລິດຕະພັນກະສິກໍາ ແລະເຄື່ອງປ່າຂອງດົງຍັງເປັນສິນຄ້າຫຼັກໂດຍໃນ 9 ເດືອນ ສາມາດສົ່ງອອກ ໄດ້ 33 ລ້ານກວ່າໂດລາ ທຽບໃສ່ແຜນການປີປະຕິບັດໄດ້ 102,83% ທຽບໃສ່ໄລຍະດຽວກັນຂອງປີກ່ອນເພີ່ມຂຶ້ນ 19,60%.

  ທ່ານ ຈັນເພັງ ພັນທຸອາມາດ ຫົວໜ້າພະແນກອຸດສາຫະກຳ ແລະການຄ້າ ແຂວງໄຊຍະບູລີ ໄດ້ໃຫ້ຮູ້ວ່າ: ໃນສິນຄ້າສົ່ງອອກທັງໝົດເປັນຜະລິດກະສິກໍາມູນຄ່າ 32 ລ້ານກວ່າໂດລາ; ເຄື່ອງປ່າຂອງດົງ 586.185 ໂດລາ, ປຸ໋ຍຊີວະພາບ, ເຫຼັກເສດ, ເສດເຈ້ຍ, ຂີ້ເຖົ່າລອຍ, ຫີນຄົບ, ແຮ່ບາຣິດ, ສ່ວນການນໍາເຂົ້າສິນຄ້າມີມູນຄ່າທັງ ໝົດ 77 ລ້ານກວ່າໂດລາ, ທຽບໃສ່ແຜນການປະຕິບັດໄດ້ 411,97%, ທຽບໃສ່ໄລຍະດຽວກັນຂອງປີກ່ອນເພີ່ມຂຶ້ນ 9,53 ສິນຄ້າທີ່ນໍາເຂົ້າມີໝວດສະບຽງອາຫານ ແລະເຄື່ອງດື່ມ, ອຸປະກອນກໍ່ສ້າງ ແລະເຄື່ອງໄຟຟ້າ, ອຸປະກອນແນວພັນຮັບໃຊ້ການຜະລິດ, ພາຫະນະ ແລະເຄື່ອງອາໄຫຼ່, ເຄື່ອງປັບປຸງໂຮງງານ, ອົກຊີແຊນສໍາເລັດຮູບ, ການນໍາເຂົ້າໂຄງການກໍ່ສ້າງພື້ນຖານໂຄງລ່າງຂອງແຂວງມີມູນຄ່ານໍາເຂົ້າທັງໝົດ 71 ລ້ານໂດລາ, ອຸປະກອນກໍ່ສ້າງ ແລະ ເຄື່ອງໃຊ້ໄຟຟ້າມູນຄ່າ 3 ລ້ານກວ່າໂດລາ, ສານເຄມີອຸດສາຫະກໍາມູນຄ່າ 1 ລ້ານກວ່າໂດລາ ແລະນໍ້າມັນເຊື້ອໄຟມູນຄ່າ 66 ລ້ານກວ່າໂດລາ.  

  ຂະນະດຽວກັນໃນການອອກອະນຸຍາດຂຶ້ນທະບຽນວິສາຫະກິດໃຫ້ຜູ້ປະກອບການທົ່ວແຂວງໃນ 9 ເດືອນຜ່ານ ມາໄດ້ທັງໝົດ 348 ທະບຽນມີທຶນທັງໝົດ 201,7 ຕື້ກີບ ໃນນີ້ຂະແໜງອຸດສາຫະກໍາ 30 ທະບຽນ 28,9 ຕື້ກີບ, ຂະແໜງການຄ້າ 159 ທະບຽນມີທຶນ 106,7 ຕື້ກີບ, ຂະແໜງບໍລິການ 150 ທະບຽນມີທຶນ 33,9 ຕື້ກີບ, ຂະແໜງກະສິກໍາ 9 ທະບຽນມີທຶນ 32 ຕື້ກວ່າກີບ.

  ມາຮອດປະຈຸບັນໃນທົ່ວແຂວງໄຊຍະບູລີ ມີຫົວໜ່ວຍທຸລະກິດທັງໝົດ 9.761 ຫົວໜ່ວຍ, ມີທຶນທັງໝົດ 3.563 ຕື້ກີບ. ໃນນັ້ນຂະແໜງອຸດສາຫະກໍາມີ 770 ທະບຽນມີທຶນ 551 ຕື້ກີບ, ຂະແໜງ ການຄ້າມີ 4.745 ທະບຽນ ມີທຶນ 1.161 ຕື້ກີບ, ຂະແໜງບໍລິການມີ 3.897 ທະບຽນມີທຶນ 1.410 ຕື້ກີບ, ຂະແໜງກະສິກໍາມີ 349 ທະບຽນ ມີທຶນ 439 ຕື້ກີບ.

  ທ່ານ ຈັນເພັງ ພັນທຸອາມາດ ຍັງກ່າວຕື່ມວ່າໃນ 3 ເດືອນທ້າຍປີ 2019 ຕ້ອງເອົາໃຈໃສ່ສູ້ຊົນສົ່ງອອກສິນຄ້າໃຫ້ໄດ້ 3 ລ້ານກວ່າໂດລາ ແລະປະຕິບັດການຄຸ້ມຄອງນໍາເຂົ້າສິນຄ້າຈາກຕ່າງປະເທດໃຫ້ໄດ້ 9 ລ້ານກວ່າໂດລາ.  

--------------

ຂຽນໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์